rone se aur lutf vafaaon kaa baDh gayaa — Shahid Meer

ganvaae baiThe hain aankhon ki raushni 'shaahid'
jahaan-panaah kaa insaaf dekhne vaale

aur kuchh bhi mujhe darkaar nahin hai lekin
meri chaadar mire pairon ke baraabar kar de

shajar ne lahlahaa kar aur havaa ne chuum kar mujh ko
tiri aamad ke afsaane sunaae jhuum kar mujh ko

pahle to chhin li miri aankhon ki raushni
phir aaine ke saamne laayaa gayaa mujhe

vahi saffaak havaaon kaa sadaf bante hain
jin darakhton kaa nikaltaa huaa qad hotaa hai

bujhti hui si ek shabih zehn mein liye
miTti hui sitaaron ki saf dekhte rahe

jab vafaa hi nahin zamaane mein
ishq sar par savaar kaun kare

dekhiye ahd-e-vafaa achchhaa nahin
marnaa jiinaa saath kaa ho jaaegaa

main girdaabon mein ghumungaa main tufaanon se khelungaa
lab-e-dariyaa mujhe Dar Dar ke mar jaanaa nahin aataa

mujhe malaal nahin teri bevafaai kaa
main apne aap se aankhein nahin milaa saktaa

tumhaare saath mire mukhtalif maraasim hain
miri vafaa pe kabhi inhisaar mat karnaa

ghalat-ravi ko tiri main ghalat samajhtaa huun
ye bevafaai bhi shaamil miri vafaa mein hai