bhigi hui ik shaam ki dahliz pe baiThe — Shakeb Jalali

aalam mein jis ki dhuum thi us shaahkaar par
dimak ne jo likhe kabhi vo tabsire bhi dekh

dil saa anmol ratan kaun kharidegaa 'shakeb'
jab bikegaa to ye be-daam hi bik jaaegaa

rote hain dil ke zakhm to hanstaa nahin koi
itnaa to faaeda mujhe tanhaaiyon se hai

khud apni aag se shaayad gudaaz ho jaaein
paraai aag se kab sang-dil pighalte hain

ham-safar rah gae bahut pichhe
aao kuchh der ko Thahar jaaein

jo motiyon ki talab ne kabhi udaas kiyaa
to ham bhi raah se kankar sameT laae bahut

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

phir aaj kaise kaTegi pahaaD jaisi raat
guzar gayaa hai yahi baat sochte hue din

pahle us ki aankhein sochi jaati hain
phir aankhon mein raat bitaai jaati hai

yaad aati hai achchhi si koi baat sar-e-shaam
phir subh talak sochte rahte hain vo kyaa thi

mujh ko ye soch hai jiite hain ve kyun-kar yaa-rab
apne maashuqon se jo shakhs judaa rahte hain