jab talak us ne ham se baatein kiin — Shakeel Azmi

tumhaari maut ne maaraa hai jite-ji ham ko
hamaari jaan bhi goyaa tumhaari jaan mein thi

kuchh dinon ke liye manzar se agar haT jaao
zindagi bhar ki shanaasaai chali jaati hai

isi khataa pe bujhaae gae charaagh mire
main jaantaa thaa bahut kuchh havaa ke baare mein

ghar ke divaar-o-dar pe shaam hi se
nazm likhtaa huaa hai sannaaTaa

haar ho jaati hai jab maan liyaa jaataa hai
jiit tab hoti hai jab Thaan liyaa jaataa hai

mujh ko bikhraayaa gayaa aur sameTaa bhi gayaa
jaane ab kyaa miri miTTi se khudaa chaahtaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

kahaan milegi misaal meri sitamgari ki
ki main gulaabon ke zakhm kaanTon se si rahaa huun

kuchh karo fikr mujh divaane ki
dhuum hai phir bahaar aane ki

kisi gul ko jo apnaa turra-e-dastaar samjhe ham
to barson Tokraa sar par uThaayaa sargiraani kaa

gulshan-parast huun mujhe gul hi nahin aziiz
kaanTon se bhi nibaah kiye jaa rahaa huun main