mohabbaton ko kahin se madad nahin milti — Wasim Nadir

hami akele nahin zindagi se haare hue
bahut se log khaDe hain badan utaare hue

mohabbat bojh ban kar hi bhale rahti ho kaandhon par
magar ye bojh haTtaa hai to kandhe Tuut jaate hain

sab log jo hairat se tujhe dekh rahe hain
sar teraa bahut chhoTaa hai dastaar baDi hai

tire baghair bhi kahti hai mujh se jiine ko
ye zindagi bhi sahi mashvara nahin deti

main khushbuon ke zikr pe khaamosh hi rahaa
haalaanki ek phuul mire haafize mein thaa

ehsaan kar rahaa hai tiraa hijr in dinon
main in dinon khudaa ke ziyaada qarib huun

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

jis bhi fankaar kaa shahkaar ho tum
us ne sadiyon tumhein sochaa hogaa

zakhm itne hain badan par ki kahin dard nahin
ham bhi pathraav mein patthar ke hue jaate hain

pinhaan hain sad-savaal pas-e-parda-e-hayaa
dil de diyaa javaab thaa lekin rahe khamosh