ulfat-e-kucha-e-jaanaan ne kiyaa khaana-kharaab — Wazir Ali Saba Lakhnavi

tu apne paanv ki mehndi chhuDaa ke de ai mahr
falak ko chaahiye ghaaza rukh-e-qamar ke liye

na paDhaa yaar ne ahvaal-e-shikasta meraa
khat ke purze kiye baazu-e-kabutar toDaa

khaak mein mujh ko milaa ke vo sanam kahtaa hai
apne allaah se jaa kar miri fariyaad karo

paayaa hai is qadar sukhan-e-sakht ne rivaaj
punjabi baat karte hain pashtu zabaan mein

kyaa banaayaa hai buton ne mujh ko
naam rakkhaa hai musalmaan meraa

ham rind-e-pareshaan hain maah-e-ramazaan hai
chamki hui in rozon mein vaaiz ki dukaan hai

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

janaab-e-khizr raah-e-ishq mein laDne se kyaa haasil
main apnaa raasta le luun tum apnaa raasta le lo

vo kahte hain ye saari bevafaai hai mohabbat ki
na 'muztar' be-vafaa main huun na 'muztar' be-vafaa tum ho

mohabbat kaa asar phir dekhnaa marne to do mujh ko
vo mere saath zinda dafn ho jaaein ajab kyaa hai