جس کا راہب شیخ ہو بت خانہ ایسا چاہیے محتسب ساقی بنے مے خانہ ایسا چاہیے رکھتا ہے سر خوش ہمیں ایک چشم میگوں کا خیال ہو نہ جو پیماں شکن پیمانہ ایسا چاہیے ہو خیال دیر دل میں اور نہ ہو پاس حرم عاشقوں کا مسلک رندانہ ایسا چاہیے اک نگاہ ناز پر قرباں کرے ہوش و خرد عشق بازی کے لیے فرزانہ ایسا چاہیے اس کے دل میں سوز ہو اور اس کے دل میں ہو گداز شمع ایسی چاہیے پروانہ ایسا چاہیے شمع ساں گھلتے رہیں ہم اور نہ ہو اس کو لگن مشرقیؔ معشوق بے پروانہ ایسا چاہیے

jis kaa raahib shaikh ho but-khaana aisaa chaahiye

غزل · Ghazal

دیکھا کسی کا ہم نے نہ ایسا سنا دماغ ان سنگ دل بتوں کا ہے اللہ کیا دماغ کرتا نہیں تمیز شریف و رذیل میں اس چرخ پیر کا ہے مگر پھر گیا دماغ دیکھے بہت ہیں ہم نے حسینان پر غرور لیکن عجب طرح کا ہے کچھ آپ کا دماغ کل جتنا ہم نے اس کو منا کے بنایا تھا اتنا ہی آج اور ہے بگڑا ہوا دماغ جب ہوں گے پیش داور محشر کے سامنے ہم دیکھ لیں گے آپ کا روز جزا دماغ آیا نہیں سمجھ میں یہ الٹا معاملہ بن بن کے کیوں بگڑتا ہے یہ آپ کا دماغ گل کی بہار گلستاں میں چند روز ہے اچھا نہیں ہے اس قدر اے مہ لقا دماغ اے مشرقیؔ کبھی تھا دماغ اپنا عرش پر ہے آج کل تو خاک میں اپنا ملا دماغ

dekhaa kisi kaa ham ne na aisaa sunaa dimaagh

غزل · Ghazal

کچھ بدگمانیاں ہیں کچھ بد زبانیاں ہیں مدت سے ان کی ہم پر یہ مہربانیاں ہیں آتا ہے جب کسی پر رکتا نہیں ہے ہرگز مانند موج دریا دل کی روانیاں ہیں پیدا کہاں ہیں ہوتے اب ذوقؔ اور غالبؔ ہاں داغؔ اور حالیؔ ان کی نشانیاں ہیں جو پاس تھا وہ کھویا نام سلف ڈبویا کیا خاک اپنی اے دل اب زندگانیاں ہیں اے دل نہ چھیڑ قصہ ہو درد جس سے پیدا یہ شعر خوانیاں ہے یا نوحہ خوانیاں ہیں کیا ہم نے یہ نکالی طرز غزل نرالی کچھ گلفشانیاں ہیں کچھ خوں فشانیاں ہیں باد خزاں نے گلشن ویراں کیا ہے سارا بلبل کی اب کہاں وہ رنگیں بیانیاں ہیں جور و جفا کے ایسے ہم ہو گئے ہیں خوگر نا‌ مہربانیاں بھی اب مہربانیاں ہیں اے مشرقیؔ جہاں میں دیکھا یہی تماشا کچھ ماتم‌ و الم ہے کچھ شادمانیاں ہیں

kuchh bad-gumaaniyaan hain kuchh bad-zabaaniyaan hain

غزل · Ghazal

مرا یہ زخم سینہ کا کہیں بھرتا ہے سینے سے لگائے اے صنم جب تک نہ تو سینہ کو سینے سے فلک نے شادماں دیکھا جسے آیا اسی کے سر خدا محفوظ ہر انساں کو رکھے اس کمینے سے جو لے جاتے ہیں دل میرا بچانا ٹھیس سے اس کو وہ ہے اے سنگ دل نازک زیادہ آبگینے سے نہ ہوگی دور غش میری گلاب و مشک و عنبر سے مرے رخ کو تو دھو اے گل بدن اپنے پسینے سے کہیں یہ صاف ہوتا ہے کدورت اور کینے سے اگر زخم جگر مل بھی گیا دشمن کے سینے سے دل اک دہنے رہا گر دوسرا دائم رہا بائیں نہ دو باہم ہوئے دل گو ملا سینہ بھی سینے سے کوئی رنج و الم آئے نہ دل کے پاس اے ساقی جو ہو آغاز مے نوشی محرم کے مہینے سے تو چاہے دوسروں کو اور ہم مرتے پھریں تجھ پر ہمارے واسطے مرنا ہے بہتر ایسے جینے سے سمجھنا چاہیے کینے سے سینہ ہے بھرا اس کا کیا ہے مشرقیؔ انکار جس نے مے کے پینے سے

miraa ye zakhm siine kaa kahin bhartaa hai siine se

Similar Poets