bazm-e-farhat raas aai hi nahin — Madhu Madhuman

"the kabhi ham ko bhi hangaame 'aziz ab magar lagte hain sannaaTe 'aziz jo hamein hain jaan ke jaise 'aziz kaash hote ham bhi yuun un ke 'aziz zindagi mahfuz ho jin ke tale kis qadar hote hain vo saae 'aziz jin se hain mansub yaadein aap ki ham ko hain vo sab gali kuche 'aziz zindagi kaTti nahin un ke binaa log kuchh hote hain kyon itne 'aziz dil ko chhu jaate the jo bhitar talak aaj bhi hain ham ko vo naghme 'aziz jaam khushiyon ke mubaarak aap ko ham ko to hain gham ke paimaane 'aziz ahl-e-duniyaa ko hain pyaari manzilein aur 'madhuman' ham ko hain raste 'aziz"

"ham pe kuchh yuun hai zindagi kaa qarz jaise lamhe pe ho sadi kaa qarz vaqt mahdud aur saansein kam kaise chuktaa karein sabhi kaa qarz ye jo hain vus'atein samundar ki us ke sar par hai har nadi kaa qarz do gunaa kar ke sab ko lauTaayaa ham ne rakkhaa nahin kisi kaa qarz aansuon se adaa kiyaa ham ne ek chhoTi si bhi khushi kaa qarz daur-e-nau ke sukhanvaron par hai 'mir'-o-'ghaalib' ki shaa'iri kaa qarz chaah kar bhi nahin utar saktaa ham pe 'madhuman' jo hai nabi kaa qarz"

"chaman se khushbuon kaa isti'aara le gayaa koi hamaare gulsitaan se rang saaraa le gayaa koi hamein jo raah dikhlaataa thaa jivan ke andheron mein hamaare aasmaan se vo sitaara le gayaa koi bahut viraan rahtaa hai falak aankhon kaa ye jab se churaa kar us se us kaa maah-paara le gayaa koi bhalaa ab zindagi mein dekhne ko kyaa rahaa baaqi jo bhaataa thaa hamein vo har nazaara le gayaa koi lagegi paar kaise naav ab ye khudaa jaane use manjdhaar mein rakh kar kinaara le gayaa koi badal detaa thaa jo meinDak ko ik raaja ki surat mein jahaan se ab vo jaadu kaa piTaaraa le gayaa koi dil-e-betaab ko 'madhuman' qaraar aae bhi to kaise sukun to chhin kar ham se hamaaraa le gayaa koi"

"maazi ke gulsitaan mein jab le chaleingi aankhein lamhon ki khushbuon se mahkaa kareingi aankhein yaadon ke abr jab bhi chhaaeinge zehn-o-dil par be-saakhta jhamaa-jham bahne lageingi aankhein alfaaz jab na honge honTon pe honge taale aise mein dil ki saari baatein kaheingi aankhein maa'lum hai ki us ne aanaa nahin hai vaapas har-vaqt phir bhi us kaa rasta takeingi aankhein kitne bhi hon samundar ashkon ke un mein chaahe duniyaa ke saamne par hansti raheingi aankhein divaar taakte hi guzregi raat shaayad nindein hi ruuTh jaaein to kyaa kareingi aankhein ziddi hain is qadar ye sunti nahin hai kahnaa bojhal hon chaahe palkein phir bhi jageingi aankhein majbur hain ye shaayad fitrat se apni 'madhuman' maayusiyon mein bhi kuchh sapne buneingi aankhein"

"pal khushi ke to kabhi aankh mein paani degaa vaqt har roz nai ek kahaani degaa dil mire chheD na tu phir vo puraane qisse zikr-e-maazi mujhe bas ashk-fishaani degaa peD kikar ke bhi aaeinge kahin raahon mein har jagah to vo nahin raat ki raani degaa zindagi ek jagah par hi ruki hai kab se jaane ab kab vo use aa ke ravaani degaa bas isi aas pe aTki hai miri jaan ab tak koi to rut vo kabhi mujh ko suhaani degaa lauT aaegaa vo mausam hai bharosa ye mujhe phir mire baagh ko vo rang-fishaani degaa dil se kahne ki to koshish to zaraa kar 'madhuman' tere alfaaz ko phir khud vo maaani degaa"

"pairahan jism pe aur munh mein nivaalaa hotaa kaash har shakhs ke aangan mein ujaalaa hotaa chhoD kar shaakh na jaate ye parinde shaayad pyaar se ham ne agar un ko sanbhaalaa hotaa raabta toD diyaa ek hi jhaTke mein kyon guftugu kar ke koi hal to nikaalaa hotaa itne rishton ko bikharne se bachaa sakte the kaash is pal ko kisi tarah to Taalaa hotaa mil ke rahte jo mohabbat se sabhi gul is mein phir to gulshan kaa nazaara hi niraalaa hotaa kho chuke hote udaasi ke samundar mein ham khud ko gar vaqt ke saanche mein na Dhaalaa hotaa ham bhi auron ki tarah vaqt pe sote 'madhuman' rog ham ne jo sukhan kaa nahin paalaa hotaa"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"zindagi bojhal hui aazaar se jism jhuktaa jaa rahaa hai baar se doston ne is qadar dhoke diye aur raghbat baDh gai aghyaar se zindagi kaa ik nayaa imkaan huaa ik daricha khul gayaa divaar se ab bayaan kaise karun rudaad-e-gham kaam mushkil hai dil-e-naa-chaar se hijr ki raaton mein bahtaa hi rahaa ek naala chashm-e-dariyaa-baar se misl-e-majnun regzaaron mein rahe sar paTakte ret ki divaar se ham asiraan-e-mohabbat hain yahaan uljhe hain ab gesu-e-khamdaar se 'qalb' teri ghazlein yuun shaadaan karein dard nikle hai tire ashaar se"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"jis din se meraa khvaab suhaanaa badal gayaa us din se zindagi kaa fasaana badal gayaa sunne lagaa huun jab se nasihat baDon ki main jaari thaa jo labon pe taraana badal gayaa pahchaan kaa havaala bhi baaqi nahin rahaa chehre ke saath aaina-khaana badal gayaa uThti nahin hai aankh bhi ab aasmaan ki samt jab se gali kaa chaand puraanaa badal gayaa tahzib jin ke ghar ki 'alaamat thi kal talak afsos aaj un kaa gharaanaa badal gayaa 'azmat kaa taaj sar pe hai 'akhilesh' ke sajaa aisi havaa chali ki zamaana badal gayaa itni sharaafaton mein kami aa gai hai aaj pahle thaa jo libaas puraanaa badal gayaa ahl-e-vafaa ne jis ki thi taarikh ki raqam 'faaruq' 'ishq kaa vo fasaana badal gayaa"

"jab tak mizaaj-e-dost mein kuchh barhami rahi goyaa bujhi bujhi si miri zindagi rahi jis par nigaah-e-lutf-e-karam aap ki rahi hairat se har nigaah use dekhti rahi go main rahaa kashaakash-e-dauraan se ham-kanaar lekin mire labon pe hansi khelti rahi laayaa hai ishq ne mujhe aise maqaam par khud-aagahi rahi na khudaa-aagahi rahi josh-e-junun ne manzil-e-maqsud paa liyaa aql-e-salim dekhti hi dekhti rahi sab kuchh mujhe 'khayaal' ki duniyaa mein mil gayaa lekin tumhaare husn-e-nazar ki kami rahi"

"aaina toD de rihaa kar de bevafaa ik yahi vafaa kar de rishta-e-dard toD de dil se rang ko phuul se judaa kar de zindagi-bhar tujhi ko chaahaa hai qarz kuchh to miraa adaa kar de de rahaa hai zakaat-e-husn agar mire haq se zaraa baDhaa kar de muddatein ho gaiin tujhe dekhe ab to milne kaa silsila kar de phir koi gul khile sar-e-mizhgaan phir dar-e-khvaab koi vaa kar de ik sitaare ko bakhsh kar mire khvaab phir use meraa aaina kar de baiThtaa jaa rahaa hai jaan kaa ghubaar ab use mujh se maavaraa kar de ai faqir-e-dayaar-e-laili-jaan mire haq mein bhi kuchh duaa kar de"