ek fitna saa uThaayaa hai chalaa jaaegaa — Asghar Velori

"hamaare haath mein khanjar nahin the kisi bhi vaqt ham kaayer nahin the har ik gham se shanaasaa ho gae hain kabhi ham ranj ke khugar nahin the vo kitne khush the be-chhat ki zamin par sabab ye hai ki un ke ghar nahin the vo baatein kar rahe the aasmaan ki vo jin ke baazuon mein par nahin the unhein thi fikr naahaq apne sar ki mire to haath mein patthar nahin the hui thi sher se tamhid pahle vo sab naqqaal the shaair nahin the use dekhein palaT kar phir dobaara tiri galiyon mein vo manzar nahin the jo chalte the hamaare saath 'asghar' zaraa aage the vo rahbar nahin the"

"suno kuchh dida-e-nam bolte hain jo chup the aaj vo gham bolte hain kaho saanson mein hai aavaaz kis ki ye tum kahte ho yaa ham bolte hain tumhaare husn ki khushbu gulon mein tumhaaraa naam mausam bolte hain kisi ki bhi kabhi sunte nahin vo magar un se kaho ham bolte hain tumhaaraa raag ghungru ke labon par tumhaare honT sargam bolte hain tumhaare husn kaa jaadu hai kitnaa tumhaari zulf ke kham bolte hain vo dekhaa hai tumhaari chashm-e-nam mein jise ham saaghar-e-jam bolte hain use ham ne kahin dekhaa nahin hai jise ahbaab hamdam bolte hain har ik suntaa hai un ki baat 'asghar' jo sunte hain bahut kam bolte hain"

"koi chhoTaa yahaan koi baDaa hai ye saaraa khel zaalim vaqt kaa hai vo sar karte hain jin ko hausla hai vagarna zindagi ik marhala hai tujhe maalum kyaa hai lazzat-e-gham tiraa dil ishq se naa-aashnaa hai jo khud vaaqif nahin manzil se apni khudaa bakhshe hamaaraa rahnumaa hai Duboegaa use kyaa koi tufaan khudaa kashti kaa jis ki naakhudaa hai chhupaaun aaine se kyaa haqiqat baDaa kam-bakht hai sach boltaa hai faqat ik darmiyaan pardaa hai varna tiraa meraa azal se vaasta hai milaa kar haath ham se faaeda kyaa vahi ab tak dilon mein faasla hai nazar jaati nahin 'asghar' kisi par nazar mein jab se vo jalva-numaa hai"

"kisi ki chaah mein gham kyaa hai aur khushi kyaa hai tujhe khabar nahin mafhum-e-aashiqi kyaa hai tapish mein dhuup ke hoti hai qadr saae ki na ho jo maut kaa khatra to zindagi kyaa hai nahin hai farq andhere mein aur ujaale mein nazar na aae jahaan to vo raushni kyaa hai hain yuun to saikDon makhluq bazm-e-hasti mein nahin hai dil mein mohabbat to aadmi kyaa hai rahe jo dil se lipaT kar vo gham hi behtar hai jo chand lamhon ki mehmaan hai vo khushi kyaa hai hai aadmi to uThaanaa hai baar hasti kaa hai aas jiine ki honTon pe kapkapi kyaa hai tire liye to jhukaanaa bhi sar ibaadat hai agar jhukaa na sake dil to bandagi kyaa hai tumhaare jalva-e-aqdas kaa ek partav hai ye najm aur ye zohra ye mushtari kyaa hai vo dil-lagi hai agar gudgudi si aa jaae jalaa de dil ko jo 'asghar' vo dil-lagi kyaa hai"

"ho gai apnon ki zaahir dushmani achchhaa huaa chhoD di ham ne bhi un ki dosti achchhaa huaa bach gae apnon ke har mashq-e-sitam se shukr hai doston ne ham ko samjhaa ajnabi achchhaa huaa jis ko jiine kaa zaraa saa bhi nahin thaa hausla Dar ke gham se mar gayaa vo aadmi achchhaa huaa jaane main aur tu ke jhagDe kaise suljhaate bhi ham aa gai thi kaam apni be-khudi achchhaa huaa shaam ke saae se bhi Darti rahi jo raushni khaa gai us raushni ko tirgi achchhaa huaa gham hi apnaa yaar hai dil se judaa hotaa nahin chand lamhon ki khushi ab jaa chuki achchhaa huaa kaun detaa mujh ko un ki bevafaai kaa subut aap ne kar di kahi ko an-kahi achchhaa huaa mujh ko divaana samajh kar log mujh se duur hain muft mein jo mujh pe ye tohmat lagi achchhaa huaa is tarah se laaj rakh li ham ne 'asghar' pyaar ki rote rote aa gai lab par hansi achchhaa huaa"

"kahne aae the kuchh kahaa hi nahin chal diye jaise kuchh sunaa hi nahin is qadar zulm ibn-e-aadam par jaise us kaa koi khudaa hi nahin ham jamaa kar nigaah baiThe hain apni qismat kaa dar khulaa hi nahin fikr aaghaaz hi ki hai sab ko koi anjaam sochtaa hi nahin tere maqtal mein aa gae aakhir aur kuchh ham ko raasta hi nahin vo tire naqsh-e-paa ko kyaa samjhe jis kaa sajde mein sar jhukaa hi nahin tu kitaabon mein DhunDhtaa kyaa hai ishq ki chaara-gar davaa hi nahin jis ko siine se ham lagaa lete ham ko aisaa koi milaa hi nahin aur ab ji ke kyaa karein 'asghar' ab to jiine mein kuchh mazaa hi nahin"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kyaa apne shahr mein koi aisaa makaan hai samjhun jise ki asl mein vo ik jahaan hai DhunDo haqiqat is mein na afsaana hi koi is kaa bayaan kuchh nahin us kaa bayaan hai apnaa shi'aar ab hai faqat amn-dushmani ye aur baat faakhta apnaa nishaan hai likhne ko ek harf na kahne ko ek lafz yuun to qalam hai haath mein munh mein zabaan hai vo lams jis ke baa'd zamaane guzar gae vo lams ab bhi taaza hai ab bhi javaan hai ho jaaegaa yaqin sabhon kaa hi kal jo aaj meraa yaqin aur sabhon kaa gumaan hai shatranj ki bisaat ki thi apni mez par shatranj ki bisaat ki saaraa jahaan hai"

"charaaghon se kuchh to churaayaa gayaa hai jo thi aag us ko bujhaayaa gayaa hai likhaa thaa jinhein sirf apne lahu se mire un khaton ko jalaayaa gayaa hai hazaaron daf'a us ne ki bevafaai mujhe bevafaa kyon bataayaa gayaa hai mujhe khud nikalnaa paDaa apne ghar se ye mat sochnaa ki bhagaayaa gayaa hai khabar ye mili hai ki mere hi ghar mein kisi ghair ko ab basaayaa gayaa hai mujhe hi sataa kar mujhe hi rulaa kar ye ilzaam mujh par lagaayaa gayaa hai tumhein kyaa bataaun mohabbat mein 'raavat' mujhe kis qadar aazmaayaa gayaa hai"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"