gaanv mein jitne din guzaare the — Ashfaq Amir

"pahaaDi raaste par aabju ki aazmaaish hai samundar kis taraf hai justuju ki aazmaaish hai pare divaar-e-jaan ke ek dhoke ke sivaa kiyaa hai mire andar musalsal aarzu ki aazmaaish hai kai lahrein si uThti hain jo lafzon mein nahin Dhaltin in aankhon ke muqaabil guftugu ki aazmaaish hai main apne dil ki khaamoshi tujhe email kartaa huun sunaa hai mai-kade mein haa-o-hu ki aazmaaish hai taayyun samt kaa hotaa nahin aankhein bhaTakti hain qadam kaise uThein jab chaar-su ki aazmaaish hai"

"ham jo dehaat se shahron ki taraf aae hain ishq aur husn ke bichhDe hue hamsaae hain ek be-rang se mausam ki havaa chalti hai ab na vo dhuup na peDon ke ghane saae hain kaun saa phuul hamein yaad nahin bachpan kaa kaun saa rang javaani kaa bhulaa paae hain gard-e-ayyaam-e-guzishta bhi to saath aai hai ham tire paas akele to nahin aae hain teri aankhein to ujaale ki amiin hain ab tak ye andhere to kisi aur ne phailaae hain"

"khilte phulon jaisi thi ye duniyaa kabhi achchhi thi giit the us ki aankhon mein shaam bhi mahki mahki thi nae dar khulte dekhe the meri nazar jab bahki thi us ke jism ke shoale se dil ki basti chamki thi main us khvaab kaa hissa thaa vo jis khvaab mein rahti thi jis ne meraa dil toDaa vo to pariyon jaisi thi subh sabaa ki aankhon mein raat vo chaand mein rahti thi"

"mujhe udaas bhi karte rahe mire andar jo phuul khil ke bikharte rahe mire andar mujhe miTaati rahi meri khaamushi aksar mire hi khvaab bikharte rahe mire andar mayassar aaya na un ko libaas-e-saut-o-sadaa mire khayaal sanvarte rahe mire andar ab un ki maar se chehra bujhaa bujhaa hai miraa jo sadme mujh pe guzarte rahe mire andar baDe jatan se jalaae the kuchh diye main ne jo ek jhonke se Darte rahe mire andar vo ashk-e-dil ki zaminon ko kar gae shaadaab jo qatra qatra utarte rahe mire andar miri numu mein rukaavaT bane rahe 'aamir' jo vasvase se ubharte rahe mire andar"

"haalaat se ham ulajh paDeinge khaamosh kabhi nahin raheinge tahzib kareinge nakhl-e-dil ki phir us ko gham-e-bahaar deinge aansu na bahaaeinge magar ham us shakhs ko yaad to kareinge ab soch liyaa hai dil kaa qissa tujh se to kabhi nahin kaheinge jab dard ki mai nahin milegi ham shisha-e-umr toD deinge marham kaa khayaal chhoD 'aamir' ye zakhm abhi nahin bhareinge"

"guzre dinon kaa zikr huaa aur viraani ki baat chali ik muddat se khushk thiin aankhein phir paani ki baat chali us ki gali se shoala uTThaa mere ghar mein aag lagi jalne kaa to zikr nahin thaa taabaani ki baat chali mushkil manzar dekhte rahnaa us ki puraani aadat thi mushkil se is chashm ke aage aasaani ki baat chali baadal aae havaa chali aur baahar mausam badal gayaa dil ke bahte dariyaa mein bhi tughyaani ki baat chali maayusi ke patthar se ik aas kaa chashma phuuT bahaa aas ke bahte paani mein phir hairaani ki baat chali raushan ho gaiin saari galiyaan sab darvaaze chamak uThe jab se 'aamir' shahr mein us ki mehmaani ki baat chali"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"hai jo ik maa'raka faisal nahin hone detaa jin vo ho ke mujhe botal nahin hone detaa qatl ik roz hi kartaa huun isi goshe mein aur saabit ise maqtal nahin hone detaa zid hai us ki ki har ik shaakh ho phir sabz hi sabz garche paidaa koi konpal nahin hone detaa raushni apne khayaalon hi se karni hogi koi raushan kahin mash'al nahin hone detaa chun-ki miTTi ki bhi ek apni alag khushbu hai main kahin bhi ise sandal nahin hone detaa ik parinda ki jo sahtaa hai havaaon kaa dabaao aur parvaaz ko paidal nahin hone detaa Dar hai us ko nazar aae na kahin zehn kaa 'aks vo miraa aaina saiqal nahin hone detaa tiraa qaanun hai jangal kaa ghanimat hai ki tu mire is shahr ko jangal nahin hone detaa chalo baat us ki sunein ek 'ajab mantiq se jo kisi baat ko muhmal nahin hone detaa"

"muzhda ai zauq-e-asiri ki nazar aataa hai daam-e-khaali qafas-e-murgh-e-giraftaar ke paas jigar-e-tishna-e-aazaar tasalli na huaa ju-e-khun ham ne bahaai bun-e-har khaar ke paas mund gaiin kholte hi kholte aankhein hai hai khuub vaqt aae tum is 'aashiq-e-bimaar ke paas main bhi ruk ruk ke na martaa jo zabaan ke badle dashna ik tez saa hotaa mire gham-khvaar ke paas dahan-e-sher mein jaa baiThe lekin ai dil na khaDe ho jiye khubaan-e-dil-aazaar ke paas dekh kar tujh ko chaman bas-ki numu kartaa hai khud-ba-khud pahunche hai gul gosha-e-dastaar ke paas mar gayaa phoD ke sar 'ghaalib'-e-vahshi hai hai baiThnaa us kaa vo aa kar tiri divaar ke paas kab faqiron ko rasaai bu-e-mai-khvaar ke paas to bane bu dijiye maikhaane ki divaar ke paas"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"