ham shab-e-gham jo ashk-baar rahe — Bismil Aghai

"zindagi bhar ki du'aaon kaa sila hotaa hai ik vo sajda jo tire dar pe adaa hotaa hai dosto pursish-e-ahvaal se kyaa hotaa hai is tasalli se to gham aur sivaa hotaa hai jo halaak-e-ravish-e-khud-nigari ho jaaein un ko aaina dikhaane se bhi kyaa hotaa hai phuul khud aatish-e-jazbaat se jal jaate hain varna tabdili-e-haalaat se kyaa hotaa hai koi manzil ho magar zinda-e-jaaved hai 'ishq aaj bhi tazkira-e-ahl-e-vafaa hotaa hai rahbar-e-kor-nazar ko ye bataa do 'bismil' gard-e-manzil hi mein manzil kaa pata hotaa hai"

"zeb-e-gulshan na bane raunaq-e-viraana bane kitne hoshyaar the jo ishq mein divaana bane jurat-e-did agar meri tamaasha na bane dar-haqiqat miraa afsaana phir afsaana bane kuchh patangon hi pe mauquf nahin jaan-e-vafaa jo bhi aa jaae tiri bazm mein parvaana bane kitne dilchasp hain us shokh-nazar ke andaaz koi divaana na bantaa ho to divaana bane dil khulus-e-gham-e-ulfat se hai khaali varna ishq afsaana banaa kar bhi na afsaana bane dil ki duniyaa ki ulaT pher ilaahi tauba jitnaa aabaad kiyaa jaae ye viraana bane kaash ik rabt rahe un ki nazar se 'bismil' kabhi aaina bane dil kabhi paimaana bane"

"sab umr to jaari nahin rahtaa hai safar bhi aataa hai kisi din to bashar lauT ke ghar bhi manzil to baDi shai na mili raahguzar bhi baandhaa thaa baDe shauq se kyaa rakht-e-safar bhi andar se phahonde hue divaar bhi dar bhi dekhe hain baDe logon ke ham ne baDe ghar bhi har samt hai viraani si viraani kaa aalam ab ghar saa nazar aane lagaa hai miraa ghar bhi tanhaai-pasand itnaa bhi mat ban ye samajh le tanhaai mein hai chain to tanhaai mein Dar bhi paagal hai pataa puchh rahaa hai mire ghar kaa kyaa khaana-ba-doshon kaa huaa kartaa hai ghar bhi"

"viraan jaziron kaa safar khatm na ho jaae ye silsila-e-fikr-o-nazar khatm na ho jaae ai ham-nafaso aur qarib aur qarib aao ye mahfil-e-firdaus-nazar khatm na ho jaae ghar mein bhi nazar aaeinge andaaz-e-bayaabaan jab tak miri vahshat kaa asar khatm na ho jaae tauqir-e-mohabbat pe kahin harf na aa jaae ai chaaragaro dard-e-jigar khatm na ho jaae us shahr ki jaanib baDho ai qaafile vaalo gunjaaish-e-arbaab-e-hunar khatm na ho jaae hoti rahi aankhon se jo yuun khuun ki baarish dil khatm na ho jaae jigar khatm na ho jaae 'bismil' ko na is tarh nigaahon se giraao dariyaa-e-mohabbat kaa guhar khatm na ho jaae"

"koshishein jitni bhi hoti rahin suljhaane ki zindagi aur ulajhti rahi divaane ki jaada-paimaai kaa phir shauq huaa hai mujh ko vus'atein aur baDhaa do zaraa viraane ki ho sadaaqat pe jo mabni tire aane ki khabar aur baDh jaaegi raunaq mire kaashaane ki log kahte hain ki iksir-sifat hoti hai ham bhi kuchh khaak uThaa laae hain maikhaane ki hai baDaa farq agar ghaur se dekhaa jaae ek manzil hi sahi sham' ki parvaane ki 'ishq ne mujh ko kahin kaa bhi na chhoDaa 'bismil' ab hai pahchaan yagaane ki na begaane ki"

"har ik qadam pe maatam-e-mehr-o-vafaa huaa aksar ye sochtaa huun zamaane ko kyaa huaa vo saamne nahin hain magar dam-ba-khud huun main kyaa baat kar sakungaa agar saamnaa huaa maayusiyaan hujum-e-tamannaa tumhaari yaad ik dil hai vo bhi kitne ghamon se bharaa huaa raah-e-junun mein aisaa bhi ik moD thaa jahaan khud meraa naqsh-e-paa hi miraa rahnumaa huaa kaliyon mein kahkashaan mein sitaaron mein phuul mein jaaun kahaan kahaan main tumhein DhunDhtaa huaa achchhaa kalaam achchhaa tarannum hasin khayaal sab kuchh hai mere paas khudaa kaa diyaa huaa 'bismil' miri misaal kuchh is ke sivaa nahin aandhi mein jaise ek diyaa ho jalaa huaa"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kyaa apne shahr mein koi aisaa makaan hai samjhun jise ki asl mein vo ik jahaan hai DhunDo haqiqat is mein na afsaana hi koi is kaa bayaan kuchh nahin us kaa bayaan hai apnaa shi'aar ab hai faqat amn-dushmani ye aur baat faakhta apnaa nishaan hai likhne ko ek harf na kahne ko ek lafz yuun to qalam hai haath mein munh mein zabaan hai vo lams jis ke baa'd zamaane guzar gae vo lams ab bhi taaza hai ab bhi javaan hai ho jaaegaa yaqin sabhon kaa hi kal jo aaj meraa yaqin aur sabhon kaa gumaan hai shatranj ki bisaat ki thi apni mez par shatranj ki bisaat ki saaraa jahaan hai"

"charaaghon se kuchh to churaayaa gayaa hai jo thi aag us ko bujhaayaa gayaa hai likhaa thaa jinhein sirf apne lahu se mire un khaton ko jalaayaa gayaa hai hazaaron daf'a us ne ki bevafaai mujhe bevafaa kyon bataayaa gayaa hai mujhe khud nikalnaa paDaa apne ghar se ye mat sochnaa ki bhagaayaa gayaa hai khabar ye mili hai ki mere hi ghar mein kisi ghair ko ab basaayaa gayaa hai mujhe hi sataa kar mujhe hi rulaa kar ye ilzaam mujh par lagaayaa gayaa hai tumhein kyaa bataaun mohabbat mein 'raavat' mujhe kis qadar aazmaayaa gayaa hai"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"