jab koi tang-haal hotaa hai — Ali Asar Bandvi

"main to khudaa-parast thaa aisaa na ho sakaa mujh se amir-e-shahr kaa sajda na ho sakaa us ne bhi mujh ko Tuut ke chaahaa nahin kabhi mujh se bhi 'ishq had se ziyaada na ho sakaa main ne tire firaaq mein likkhe the jo khutut un mein se ek khat kaa bhi ijraa na ho sakaa ab to yaqin ho gayaa jaaegaa qabr tak is dard-e-dil kaa koi mudaavaa na ho sakaa nas kaaTnaa ki phaansi ke phande pe jhulnaa ham se to hijr mein ye tamaasha na ho sakaa ham ne ghazal kahi hai 'asar' jis ke vaaste us kaa ghazal mein koi bhi charchaa na ho sakaa"

"shaayad ho use dard kaa ehsaas ilaahi kuchh der jo baiThe vo mire paas ilaahi ab un se bhalaa kaisi koi aas ilaahi jin ko na vafaa kaa ho koi paas ilaahi mujh ko mire mahbub kaa didaar karaa de ab toD de nazron kaa ye upvaas ilaahi ham ne hi nibhaayaa hai yahaan 'ahd-e-vafaa bhi ham ko hi mili dard ki miraas ilaahi honTon se lagaayaa hai mire yaar ne shaayad khushbu se mo'attar hai ye qirtaas ilaahi jab zaaviya nazron kaa badal kar use dekhaa patthar se vo lagne lagaa almaas ilaahi ab bughz hai nafrat hai 'adaavat hai dilon mein ab miltaa nahin logon mein ikhlaas ilaahi sahraa mein bhaTaktaa hai 'asar' qais ke maanind milti hi nahin yaar ki bu-baas ilaahi"

"kyaa zaruri hai ki phande pe hi laTkaa jaae ban ke faulaad chalo hijr ko kaaTaa jaae kaun hai kis ko bayaabaan mein pukaaraa jaae khud hi ab paanv ke kaanTon ko nikaalaa jaae itni jaldi na use dil mein basaayaa jaae aur kuchh roz nae shakhs ko parkhaa jaae 'ain mumkin hai palaT kar tumhein de dein na javaab ab nai nasl ke bachchon ko na Tokaa jaae ik daf'a Duub ke niklaa huun yahi kaafi hai kaun ab 'ishq ke dariyaa mein dubaara jaae main 'asar' 'ishq mein tanhaa to khataavaar nahin us ke sar bhi koi ilzaam lagaayaa jaae"

"'azm-e-safar hamaaraa kabhi raaegaan na ho ham jis ko DhunDte hain jahaan vo vahaan na ho sharmaa ke sun rahe the vo qissa visaal kaa dil chaahtaa thaa khatm kabhi daastaan na ho har dard-o-gham ke baa'd bhi khush-baash main rahun lab par khudaa kare kabhi aah-o-fughaan na ho main ne bujhaa diyaa thaa charaaghon ko is liye ye hai shab-e-visaal koi darmiyaan na ho aisaa bhi 'ishq mein kahin hotaa hai ai 'asar' vo chaahtaa hai aag lage aur dhuaan na ho"

"tum ko ye lag rahaa thaa ki pichhaa kareinge ham yaa'ni ki 'ishq tum se dubaara kareinge ham vo baar-e-zist ho yaa judaai tiri sanam hargiz khudaa ke ghar mein na shikva kareinge ham bachchon ki fees maan ki davaaon kaa farz bhi itni si ik kamaai mein kyaa kyaa kareinge ham kyaa kyaa miri khataaein thiin kyon vo judaa huaa pahron yahi firaaq mein sochaa kareinge ham ye 'ishq dusraa hai so laazim hai ehtiyaat yaa'ni qadam sanbhaal ke rakkhaa kareinge ham anjaam jaante hain ki sahraa hai jab 'asar' kaar-e-jahaan mein vaqt na zaae' kareinge ham"

"ek bevafaa ke gham kaa tamaasha nahin kiyaa yaa'ni kisi se hijr kaa charchaa nahin kiyaa samjhaa rahaa hai mujh ko vo sahraa-navardiyaan jis ne ki 'ishq bhi abhi pahlaa nahin kiyaa jab tak rahaa vo shauq se dil mein rakhaa use is dil ko us ke vaaste pinjra nahin kiyaa apni vafaa kaa is se baDaa kyaa subut duun rukhsat to kar diyaa use rusvaa nahin kiyaa apne kiye pe khud hi pashemaan thaa vo 'asar' so main ne us se koi bhi shikva nahin kiyaa"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kyaa apne shahr mein koi aisaa makaan hai samjhun jise ki asl mein vo ik jahaan hai DhunDo haqiqat is mein na afsaana hi koi is kaa bayaan kuchh nahin us kaa bayaan hai apnaa shi'aar ab hai faqat amn-dushmani ye aur baat faakhta apnaa nishaan hai likhne ko ek harf na kahne ko ek lafz yuun to qalam hai haath mein munh mein zabaan hai vo lams jis ke baa'd zamaane guzar gae vo lams ab bhi taaza hai ab bhi javaan hai ho jaaegaa yaqin sabhon kaa hi kal jo aaj meraa yaqin aur sabhon kaa gumaan hai shatranj ki bisaat ki thi apni mez par shatranj ki bisaat ki saaraa jahaan hai"

"charaaghon se kuchh to churaayaa gayaa hai jo thi aag us ko bujhaayaa gayaa hai likhaa thaa jinhein sirf apne lahu se mire un khaton ko jalaayaa gayaa hai hazaaron daf'a us ne ki bevafaai mujhe bevafaa kyon bataayaa gayaa hai mujhe khud nikalnaa paDaa apne ghar se ye mat sochnaa ki bhagaayaa gayaa hai khabar ye mili hai ki mere hi ghar mein kisi ghair ko ab basaayaa gayaa hai mujhe hi sataa kar mujhe hi rulaa kar ye ilzaam mujh par lagaayaa gayaa hai tumhein kyaa bataaun mohabbat mein 'raavat' mujhe kis qadar aazmaayaa gayaa hai"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"