mere rone par kisi ki chashm giryaan haae haae — Basit Bhopali

"hayaat-o-maut kaa ik silsilaa hai mohabbat intihaa tak ibtidaa hai main kyaa jaanun ki baab-e-tauba kyaa hai abhi to mai-kade kaa dar khulaa hai zaraa phir dil pe nazrein Daal diije charaagh-e-aarzu khaamosh saa hai ataa kar di tumhaari aarzu ne vo ik duniyaa jo duniyaa se judaa hai hasin hon laakh duniyaa ke manaazir vo kyaa dekhe jo tum ko dekhtaa hai nazar ke saath nazzaara bhi gum hai dil-e-muztar ye kis kaa saamnaa hai mire dil ko na rakh be-rang saaqi ki har saaghar gulaabi ho rahaa hai na dozakh hai na jannat hai to 'baasit' mire aamaal-e-gham kaa kyaa silaa hai"

"pi rahaa huun ki haqiqat ye faraamosh nahin ahl-e-dil ke liye ik haadisa hai hosh nahin nigah-o-dil se mire bach ke samaa jaa mujh mein main khud aaghosh huun meraa koi aaghosh nahin na haTaa saaghar-e-gul-rang labon se mere tujh ko to hosh hai saaqi jo mujhe hosh nahin sach to ye hai nigah-e-naaz tire sar ki qasam miT ke bhi dil tire ehsaan se subuk-dosh nahin aaj samjhaa tiri mastaana nigaahon ke nisaar hosh kahte hain jise asl mein vo hosh nahin mere aaghosh-e-mohabbat mein na aane vaale kyaa hai duniyaa agar aaghosh hi aaghosh nahin kab nahin dil mein mire kashmakash-e-vasl-o-firaaq kab vo aaghosh mein begaana-e-aaghosh nahin vo bhi chaahein to judaa ho nahin sakte 'baasit' dil miraa dil hai kisi aur kaa aaghosh nahin"

"muddaaa koi apnaa na paayaa jab duaa ke liye haath uThaayaa us mein apnaa hi sab aks paayaa un ke chehre pe jo rang aaya be-khudi par miri hansne vaalo lo sambhaalo mujhe hosh aaya vo zamin sajda-gaah-e-vafaa hai paD gayaa hai jahaan apnaa saayaa ham ne khaayaa fareb-e-mohabbat chain kho kar hamein chain aaya raahzan hi vo niklaa bil-aakhir rahnumaa jis ko apnaa banaayaa tu ne uqbaa ko firdaus bakhshi ham ne duniyaa ko jannat banaayaa yaad un ki baDhaai shab-e-gham aag ko aag hi se bujhaayaa band aankhon ke the sab karishme aankh kholi to kuchh bhi na paayaa vo bhi hairaan ham bhi pareshaan ishq 'baasit' kise raas aaya"

"nahin ye jalva-haa-e-raaz-e-irfaan dekhne vaale tumhein kab dekhte hain kufr-o-imaan dekhne vaale khudaa rakkhe tire gham kaa bahut naazuk zamaana hai sahar dekhein na dekhein shaam-e-hijraan dekhne vaale ye kis ne laa ke rakh di saamne tasvir mahshar ki abhi chaunke hi the khvaab-e-pareshaan dekhne vaale kahaan tak aaina-daar-e-tajalliyaat-e-khud-bini ye parda bhi ulaT de o dil-o-jaan dekhne vaale ye divaane sujud-e-shauq ki 'azmat ko kyaa jaanein mujhe kyaa paaein farq-e-kufr-o-imaan dekhne vaale kabhi girdaab se bhi khel maujon se bhi Takraa jaa are saahil pe rah kar josh-e-tufaan dekhne vaale tire qurbaan 'baasit' aur 'baasit' ki har ik duniyaa bahaar-e-vahshat-e-aashufta-haalaan dekhne vaale"

"na furqat ne luuTaa na aahon ne maaraa mohabbat bhare ishtibaahon ne maaraa mire dil ko un ki nigaahon ne maaraa inhin do mohabbat-panaahon ne maaraa mohabbat ki in sair-gaahon ne maaraa tiri multafit si nigaahon ne maaraa tumhaari nigaahon ki be-shak khataa kyaa mujhe khud hi meri nigaahon ne maaraa pareshaan pareshaan vo maasum nazrein gham-e-ishq ke daad-khvaahon ne maaraa duhaai hai ai manzil-e-husn-e-jaanaan mohabbat ki sunsaan raahon ne maaraa na dekho mohabbat se aaina dekho ki aisi hi mujh ko nigaahon ne maaraa vo kyaa qadr-o-qimat tire gham ki jaanein jinhein ziist ki aam raahon ne maaraa miri ehtiyaat-e-junun haae 'baasit' na manzil ne luuTaa na raahon ne maaraa"

"mohabbat ki intihaa chaahtaa huun unhein haasil-e-ibtidaa chaahtaa huun use barmalaa dekhnaa chaahtaa huun adab ai mohabbat ye kyaa chaahtaa huun gham-e-ishq kaa silsilaa chaahtaa huun main tujh tak tiraa vaastaa chaahtaa huun karam-haa-e-naa-mustaqil kaa gila kyaa sitam-haa-e-be-intihaa chaahtaa huun vo ghabraa ke jis par nazar Daal hi dein main vo qalb-e-shorish-adaa chaahtaa huun karam kijiye to karam kaa huun taalib sazaa dijiye to sazaa chaahtaa huun tiri yaad achchhi tarah zikr pyaaraa magar main tujhe dekhnaa chaahtaa huun tire ishq hi se bani meri hasti tire ishq hi mein miTaa chaahtaa huun jo taaza kare qissa-e-tur 'baasit' main aisaa hi ik vaaqia chaahtaa huun"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"hai jo ik maa'raka faisal nahin hone detaa jin vo ho ke mujhe botal nahin hone detaa qatl ik roz hi kartaa huun isi goshe mein aur saabit ise maqtal nahin hone detaa zid hai us ki ki har ik shaakh ho phir sabz hi sabz garche paidaa koi konpal nahin hone detaa raushni apne khayaalon hi se karni hogi koi raushan kahin mash'al nahin hone detaa chun-ki miTTi ki bhi ek apni alag khushbu hai main kahin bhi ise sandal nahin hone detaa ik parinda ki jo sahtaa hai havaaon kaa dabaao aur parvaaz ko paidal nahin hone detaa Dar hai us ko nazar aae na kahin zehn kaa 'aks vo miraa aaina saiqal nahin hone detaa tiraa qaanun hai jangal kaa ghanimat hai ki tu mire is shahr ko jangal nahin hone detaa chalo baat us ki sunein ek 'ajab mantiq se jo kisi baat ko muhmal nahin hone detaa"

"muzhda ai zauq-e-asiri ki nazar aataa hai daam-e-khaali qafas-e-murgh-e-giraftaar ke paas jigar-e-tishna-e-aazaar tasalli na huaa ju-e-khun ham ne bahaai bun-e-har khaar ke paas mund gaiin kholte hi kholte aankhein hai hai khuub vaqt aae tum is 'aashiq-e-bimaar ke paas main bhi ruk ruk ke na martaa jo zabaan ke badle dashna ik tez saa hotaa mire gham-khvaar ke paas dahan-e-sher mein jaa baiThe lekin ai dil na khaDe ho jiye khubaan-e-dil-aazaar ke paas dekh kar tujh ko chaman bas-ki numu kartaa hai khud-ba-khud pahunche hai gul gosha-e-dastaar ke paas mar gayaa phoD ke sar 'ghaalib'-e-vahshi hai hai baiThnaa us kaa vo aa kar tiri divaar ke paas kab faqiron ko rasaai bu-e-mai-khvaar ke paas to bane bu dijiye maikhaane ki divaar ke paas"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"