Ghazal

"nigaahon mein iqraar saare hue hain ham un ke hue vo hamaare hue hain jin aankhon mein aansu chakaare hue hain ham un ki nigaahon ke maare hue hain na khaTkein kaho kis tarah tir-e-mizhgaan jigar par hamaare utaare hue hain jhaDe jo tiri kafsh-e-zarrin ke zarre falak par vo jaa kar sayyaare hue hain 'abas jaan deti hai bulbul gulon par ye us rukh ke sadqe utaare hue hain kis andaaz se band-e-mahram kase hain ki joban ko un ke ubhaare hue hain yaqin hai balaa ho koi aaj naazil vo baalon ko apne sanvaare hue hain khabar-daar haathon se jaane na paaein ye duzd-e-hinaa maal maare hue hain kahe deti hain saaf aankhein tumhaari kisi ghair se kuchh ishaare hue hain main manjdhaar mein Dubtaa huun ilaahi vo dil le ke meraa kinaare hue hain hamesha jo bharte the dam dosti kaa vahi dushman-e-jaan hamaare hue hain nazar kar du'aa par khudaavand-e-aalam ki ham haath apne pasaare hue hain bhalaa ghair ki is mein hai kyaa shikaayat vahi dushman-e-jaan hamaare hue hain unhein ham ne nahlaa diyaa de ke chhinTein 'ajab lutf dariyaa kinaare hue hain khabar aamad-e-gul ki shaayad hai 'aaghaa' chaman saare jhaaDe bahaare hue hain"

"malte hain haath, haath lageinge anaar kab joban kaa un ke dekhiye hogaa ubhaar kab ushshaaq muntazir hain qayaamat kab aaegi be-parda munh dikhaaegaa vo parda-daar kab ik roz apni jaan pe ham khel jaaeinge tum puchhte rahoge yunhi baar baar kab bekas ko kaun roe gharibon kaa kaun hai meri lahad pe shama hui ashk-baar kab kaun aayaa paDhte faatiha kis ne chaDhaae phuul marne ke baad puchhtaa hai koi yaar kab ummid naa-umid ko un se nahin rahi dushman ke dost hain vo hue mere yaar kab jo unche unche hain vahi jaate hain baam par mahfil mein ham gharibon ko miltaa hai yaar kab jab naqd maal tu ne diyaa ham ne naqd-e-dil saaqi hamein bataa de ki pi thi udhaar kab milnaa chhuDaayaa tum se miraa rashk-e-ghair ne kartaa hai koi aap se jabr ikhtiyaar kab 'aaghaa' ko zabh karte ho apni gali mein kyuun jaaez hai meri jaan haram mein shikaar kab"

"tire jalaal se khurshid ko zavaal huaa tire jamaal se mahtaab ko kamaal huaa khiraam-e-naaz mein un ko ye kab khayaal huaa ki dil kisi kaa pisaa koi paaemaal huaa shabaab se tiri rangat kaa turfa haal huaa sapid joDaa jo pahnaa badan mein laal huaa jo vasl-e-yaar ki tadbir ki visaal huaa khayaal aish kaa aayaa to ik malaal huaa hilaal badar huaa badar se hilaal huaa yahaan kamaal kisi kaa na be-zavaal huaa hazaaron saikDon paidaa hue hue naapaid na ek dam bhi zamaane ko e'tidaal huaa raqib qatl huaa us ki tegh-e-abru se haraam-zaada thaa achchhaa huaa halaal huaa buton kaa zulm kisi ne sunaa na mahshar mein khudaa se bhi miraa jhagDaa na infisaal huaa kiye hain khuun se kisi ke ye dast-o-paa rangin shikaar taaza koi aaj kyaa halaal huaa jalaayaa mujh ko to tujh ko bhi lag gayaa dhabba jigar pe daagh mire rukh pe tere khaal huaa jo main junun mein gayaa su-e-dasht ai 'aaghaa' to mujh ko dekh ke divaana har ghazaal huaa"

"daur saaghar kaa chale saaqi dobaaraa ek aur abr kaa'ba se uThaa hai maan kahnaa ek aur jhumtaa aataa hai vo baadal kaa TukDaa ek aur saaqiyaa bhar kar pilaa de jaam-e-sahbaa ek aur din ko jo kuchh tum ne dekhaa ye to thi sab dil-lagi shab ko rah jaao to dikhlaaein tamaashaa ek aur main unhein kahtaa huun tum bedard ho naa-aashnaa vo lagaate hain mujhe ilzaam ulTaa ek aur dil ko nafrat ho gai nazron se aakhir gir gae tum se behtar apni aankhon mein samaayaa ek aur kyuun sisaktaa chhoDe jaate ho mujhe maqtal mein tum faisla kar duun main qurbaan de ke charkaa ek aur tere aane mein tavaqquf jab huaa ai naama-bar khat unhein bechain ho kar ham ne likkhaa ek aur band mahram ke khule kuchh be-hijaabi ho chuki vo bhi ab uTh jaae jo baaqi hai pardaa ek aur dost dushman ho gae yaaron ne aankhein pher liin rah gayaa hai aap kaa mujh ko bharosaa ek aur vasl ki shab mein kiyaa murgh-e-sahar kaa band-o-bast naara-e-allaahu-akbar kaa hai dhaDkaa ek aur ho chukaa zikr-e-dahan vasf-e-kamar likhte hain ham daam mein sayyaad ke phanstaa hai anqaa ek aur said ki kasrat se 'aaghaa' ban paDi sayyaad ki do ne gar paai rihaai aa ke uljhaa ek aur"

"nahin mumkin ki tire hukm se baahar main huun ai sanam taabe-e-farmaan-e-muqaddar main huun dil to hairaan hai kyuun shashdar-o-muztar main huun ishq kahtaa hai ki us parde ke andar main huun pairav-e-silsila-e-zulf-e-muambar main huun tauq se uzr na zanjir se baahar main huun aab-ru-e-sadaf o zinat-e-gosh-e-mahbub durr-e-naayaab jo sunte ho vo gauhar main huun ab subuk-dosh main huun bojh gale kaa Tal jaae tegh-e-qaatil se ilaahi kahein be-sar main huun taaer-e-qibla-numaa kaa hai ishaara mujh se naama pahunchaane ko pardaar kabutar main huun aai phir fasl-e-bahaari madad ai josh-e-junun do qadam chal nahin saktaa huun vo laaghar main huun nutq kahtaa hai ki iisaa miraa dam bhartaa hai dahan-e-yaar ko daavaa hai ki kausar main huun jaadu bar-haq hai to kaafir hai ayaan raa-che-bayaan teraa maaraa huaa ai chashm-e-fusun-gar main huun mohtasib ko bhi hidaayat karun mai-noshi ki vaaizaa teri jagah gar sar-e-mimbar main huun na unhein meri shikaayat na mujhe un kaa gila na kudurat unhein mujh se na mukaddar main huun hairat-e-husn se ik sakta kaa aalam dekhaa aaina munh ko tire taktaa hai shashdar main huun daur-e-farhaad gayaa ye hai zamaana meraa be-sutun ab to uThaae hue sar par main huun aaj-kal husn-e-javaani pe jo hai un ko ghurur naaz kahtaa hai ki andaaz se baahar main huun barq o simaab kaa 'aaghaa' na rahe naam-o-nishaan dil ki betaabi se ik baar jo muztar main huun"

"muddat ke baad is ne likhaa mere naam khat meri shikaayaton se bharaa hai tamaam khat ghabraa na is qadar dil-e-betaab sabr kar aataa hai koi roz mein ab subh-o-shaam khat likkhaa huaa hai khaas tumhaare hi haath kaa pahchaantaa hai khuub tumhaaraa ghulaam khat tahrir un ki siina pe rakh dijiyo mire badle javaab-e-naama ke aaegaa kaam khat likkhaa hai ab na likkheinge ham koi khat tujhe khat aayaa meri maut kaa laayaa payaam khat zaae' na jaaegi tiri mehnat kisi tarah qaasid ajura detaa huun chuTki mein thaam khat aashiq-navaaziyaan hain tabiat mein yaar ki likkhaa hai har mahine mein bhejo mudaam khat tahrir kar ke saikaDon vaade mukar gae dikhlaaungaa huzur ko roz-e-qayaam khat khat likh ke aaj Daak pe pahuncheinge yaar ko pahunchaaegaa hamaaraa payaam-o-salaam khat 'aaghaa' nisaar hojiye inaam dijiye laayaa hai un kaa qaasid-e-sarsar-khiraam khat"

"vo kahte hain uTTho sahar ho gai azaan ho gai top-sar ho gai gale se milo ab to bahr-e-khudaa taDapte mujhe raat bhar ho gai ilaahi huaa jazb-e-ulfat ko kyaa miri aah kyuun be-asar ho gai zamaana to ai jaan bargashta thaa tumhaari bhi tirchhi nazar ho gai hue sar kaTaane ko tayyaar ham jo vaan tegh zeb-e-kamar ho gai dikhaai mujhe kis liye shaam-e-hijr shab-e-vasl ki kyuun sahar ho gai milaa vasl mein bhi na 'aaghaa' ko chain shikaayat mein shab bhar basar ho gai"

"sarv-qad laala-rukh o ghuncha-dahan yaad aayaa phir bahaar aai mujhe lutf-e-chaman yaad aayaa go ki thi saltanat-e-misr magar aakhir-e-kaar is hukumat pe bhi yusuf ko vatan yaad aayaa rag-e-gul par hai kabhi aur kabhi ghunche pe nigaah baagh mein kis ki kamar kis kaa dahan yaad aayaa safar-e-mulk-e-adam ki hui aisi ujlat zaad-e-rah kuchh na ba-juz gor-o-kafan yaad aayaa sohbat-e-laala-rukhaan ahd-e-shabaab-o-shab-e-vasl mai-e-kohna jo mili daagh-e-kuhan yaad aayaa jab se aayaa hai nazar ye tiraa husn-e-be-daagh kabk ko maah na bulbul ko chaman yaad aayaa tere saudaai ko phir josh huaa vahshat kaa qaidi-e-zulf ko phir tauq-o-rasan yaad aayaa paan khaa kar jo ugaal aap ne thukaa saahab jauhari mahv hue laal-e-yaman yaad aayaa baad muddat ke talab aap ne bande ko kiyaa shukr-sad-shukr main ai mushfiq-e-man yaad aayaa fasl-e-gul aate hi 'aaghaa' ne bhi vahshat ki li kaisi ye chaal chalaa kis kaa chalan yaad aayaa"

"shiddat-e-zaat ne ye haal banaayaa apnaa jism-e-majnun mein huaa tang shalokaa apnaa yaar bantaa nahin vo nuur kaa putlaa apnaa khaak mein mil gayaa taskhir kaa daavaa apnaa mai-kashon mein na koi mujh saa namaazi hogaa dar-e-mai-khaana pe bichhtaa hai musallaa apnaa vasl ki raat bahut tuul huaa aakhir-kaar mukhtasar ye hai ki faisal huaa qissa apnaa gul khilaa kar abhi bulbul ko jalaaun kyaa kyaa vo inaayat karein gar por kaa chhallaa apnaa rabbi-areni ki sadaa ho bhi to but bol uThein aap dikhlaaein agar dair mein jalva apnaa aaina-khaana mein chal baiThiye do-chaar ghaDi dekhnaa hove jo manzur tamaashaa apnaa jite-ji khvesh-o-aqaarib the pas-e-marg afsos khaak mein daab diyaa koi na samjhaa apnaa kisi sayyaad ki paD jaae na chiDiyaa pe nazar aap sarkaaein na mahram se dupaTTaa apnaa aap sau baar ukhaD jaaein nahin kuchh parvaa jam gayaa ek pari-zaad se naqsha apnaa daam-e-mahram mein phansaayaa hai khudaa khair kare aashiyaana na banaa baiThe ye chiDiyaa apnaa garm-khvaabi ne tiri zabh kiyaa ai qaatil ek dam bhi na kalejaa huaa ThanDaa apnaa rind-mashrab hain kisi se hamein kuchh kaam nahin dair apnaa hai na kaaba na kalisaa apnaa hai vahi sar vahi saudaa vahi josh-e-vahshat vasl tabdil hui rang na badlaa apnaa un ki zulfon ko ye daavaa hai ki ham kaale hain ham ne bachte nahin dekhaa kabhi maaraa apnaa ghair se rakhiye na imdaad ki ummid 'aaghaa' kaam aataa hai miri jaan bharosaa apnaa"

"maddaah huun main dil se mohammad ki aal kaa mushtaaq huun vasi-e-nabi ke jamaal kaa khvaahaan guhar kaa huun na main taalib huun laal kaa mushtaaq huun tumhaare dahan ke ugaal kaa dekho to ek jaa pe Thaharti nahin nazar lapkaa paDaa hai aankh ko kyaa dekh-bhaal kaa kyaa un se faiz pahunche jo khud tira-bakht hain khilte na dekhaa ham ne kabhi phuul Dhaal kaa ham hain faqir daulat-e-duniyaa se kaam kyaa behtar hai jaam-e-jam se piyaala sifaal kaa daana dikhaa ke daam mein 'anqaa ko laaungaa mazmun likh rahaa huun tire khat-o-khaal kaa sau jaan se fidaa huun mohammad ke naam par jis ne bataayaa farq haraam o halaal kaa vo aankh bhi uThaa ke hamein dekhte nahin rutba pahunch gayaa hai ye ranj-o-malaal kaa kis zindagi ke vaaste daulat ki aarzu dekho natija ghaur se qaarun ke maal kaa iqbaal gar nahin hai tu inkaar kijiye kuchh dijiye javaab hamaare savaal kaa muTThi ko khol kar yad-e-baizaa dikhaate hain naakhun pe un ke hotaa hai dhokaa hilaal kaa shaa'ir ghazab ke hote hain hargiz na chukte mauqa' nahin dahan mein tire qil-o-qaal kaa ai rashk-e-mehr vasl mein ghussa hai kis liye ye vaqt meri jaan nahin hai jalaal kaa taariki-e-lahad se kuchh 'aaghaa' na khauf kar daaman hai tere haath mein zahraa ke laal kaa"

"aankhon pe vo zulf aa rahi hai kaali jaadu jagaa rahi hai zanjir jo khaDkhaDaa rahi hai vahshat kyaa ghul machaa rahi hai lailaa khaaka uDaa rahi hai majnun ko havaa bataa rahi hai zulfein vo pari hilaa rahi hai divaanon ki shaamat aa rahi hai paamaal-e-khiraam ho chuke dafn pisne ko bas ab hinaa rahi hai hain chaal se un ki zinda dargor murdon pe qayaamat aa rahi hai dil ne ulfat se zak uThaai aankhon dekhaa rulaa rahi hai goyaa hone de be-zabaani kyuun meraa galaa dabaa rahi hai 'aaghaa' saahab gali mein un ki ik huur tumhein bulaa rahi hai"

"jite-ji ke aashnaa hain phir kisi kaa kaun hai naam ke apne huaa karte hain apnaa kaun hai jaan-e-jaan tere sivaa rashk-e-masihaa kaun hai maar kar Thokar jilaa de mujh ko aisaa kaun hai ye siyah khema hai kis kaa is mein lailaa kaun hai chamber-e-aflaak ke parde mein baiThaa kaun hai ham na kahte the ki saudaa zulf kaa achchhaa nahin dekhiye to ab sar-e-baazaar rusvaa kaun hai vo to hai be-nur aur ye nuur se maa'mur hai chashm ko nargis kahegaa aisaa andhaa kaun hai dam-ba-dam har baat mein karte ho ThanDi garmiyaan aap ki ukhDi hui baaton pe jamtaa kaun hai vaadi-e-vahshat mein bhi ham-raah hain aah-o-fughaan apne hamdam saath hain ai jaan tanhaa kaun hai khair hai ai mehrbaan kis ne unhein sidhaa kyaa aap kyuun bal karte hain zulfon se uljhaa kaun hai dukhtar-e-raz sach bataa teri nazar kis par paDi TaTTiyon ki aaD mein se kis ko taakaa kaun hai aaj maqtal mein khaDe kahte hain vo khanjar-ba-kaf bol uTThe chaahne vaalaa hamaaraa kaun hai chaar din jo kuchh tamaashaa dekhnaa hai dekh le sair ko phir gulshan-e-duniyaa mein aataa kaun hai baandh kar tegh o kafan jaate hain us qaatil ke paas ham bhi dekhein rokne vaalaa hamaaraa kaun hai kyaa tajaahul hai ki vo farmaate hain aghyaar se main nahin pahchaantaa mutlaq ki 'aaghaa' kaun hai"

"hazaar jaan se saahab nisaar ham bhi hain tumhaari tir-e-nigah ke shikaar ham bhi hain azal se daakhil-e-fard-e-shumaar ham bhi hain tumhaare chaahne vaalon mein yaar ham bhi hain hamesha ham se kudurat rahi hasinon ko na dil se nikle kabhi vo ghubaar ham bhi hain musaafiron ki tavaazo se naam hotaa hai karam karo ki gharib-ud-dayaar ham bhi hain sharaab piite hain to jaagte hain saari raat mudaam aabid-e-shab-zinda-daar ham bhi hain hazaar baar hasinon se ham ne nok ki li gulon ki aankh mein khaTke vo khaar ham bhi hain ajiib rutba inaayat kiyaa hai qambar ko ghulaam yaa shah-e-duldul-savaar ham bhi hain junun ke haath se hai in dinon garebaan tang qabaa pukaarti hai taar taar ham bhi hain baDe hi chaaliye hain chaal chalte hain har dam vo chukte nahin par hoshiyaar ham bhi hain raqib ko bhi hai baar un ki bazm mein 'aaghaa' sharik-e-sohbat-e-bos-o-kanaar ham bhi hain"

"jaa laDi yaar se hamaari aankh dekho kar baiThi faujdaari aankh shokhiyaan bhuul jaae aahu-e-chin dekh paae agar tumhaari aankh laakh inkaar mai-kashi se karo kahin chhupti bhi hai khumaari aankh hovegaa ranj yaa khushi hogi kyuun phaDakne lagi hamaari aankh jaanib-e-dar nigaah-e-hasrat hai kis ki karti hai intizaari aankh kar ke iqraar ho gayaa munkir saamne aa ke kis ne maari aankh murgh-e-dil par nigaah hai un ki aisi dekhi nahin shikaari aankh hai sitam nok-jhonk chitvan mein laD rahi hai chhuri kaTaari aankh dil jigar donon ho gae majruh ban gai hai chhuri kaTaari aankh koi dam mein ubhaarte hain use us ne dekhaa ki ham ne maari aankh 'aaghaa' saahab tumhaare dilbar ki kyaa rasili hai kyaa hai pyaari aankh"

"hamaare saamne kuchh zikr ghairon kaa agar hogaa bashar hain ham bhi saahab dekhiye naahaq kaa shar hogaa na muD kar tu ne dekhaa aur na main taDpaa na khanjar na dil hovegaa teraa saa na meraa saa jigar hogaa main kuchh majnun nahin huun jo ki sahraa ko chalaa jaaun tumhaare dar se sar phoDungaa saudaa bhi agar hogaa chaman mein laai hogi to sabaa-mashshaatgi kar ke jo gul se aage lipTaa hai kisi bulbul kaa par hogaa tari kaa bhi vahi maalik hai jo maalik hai khushki kaa madad-gaar apnaa har mushkil mein shaah-e-bahr-o-bar hogaa tasavvur zulf kaa gar chhoD duun mizhgaan kaa khaTkaa hai jo sar ke dard se fursat mili dard-e-jigar hogaa tabibo tum abas aae main kushta huun firangan kaa miri tadbir karne ko muqarrar doctor hogaa kisi ko koste kyuun ho duaa apne liye maango tumhaaraa faaeda kyaa hai jo dushman kaa zarar hogaa mazaa aaegaa divaanon ki baaton mein pari-zaado jo 'aaghaa' kaa kisi din dasht-e-majnun mein guzar hogaa"

"dil mein tire ai nigaar kyaa hai hotaa nahin ham-kanaar kyaa hai aayaa jo dam vo hai ghanimat is ziist kaa e'tibaar kyaa hai hain seb se bhi vo chhaatiyaan sakht aage un ke anaar kyaa hai duniyaa ke ye sab Dhakosle hain turbat kaisi mazaar kyaa hai taaus se chheD-chhaaD kaisi haan ai dil-e-daagh-daar kyaa hai jo jo vo ranj dein uThaao jab dil hi diyaa to aar kyaa hai main chaahtaa huun use na chaahun dil par miraa ikhtiyaar kyaa hai mizhgaan kaa hai mere dil mein khaTkaa ai khushbu-e-nok-e-khaar kyaa hai miTTi miri khaak mein milaai mujh se un ko ghubaar kyaa hai dauDun to mujhe sabaa na paae paidal kaisaa savaar kyaa hai bose ki talab ki vasl kaa zikr farmaaiye naagavaar kyaa hai hai kyaa 'aaghaa' taDap rahaa hai kyuun kahte ho baar baar kyaa hai"

"namaaz kaisi kahaan kaa roza abhi main shaghl-e-sharaab mein huun khudaa ki yaad aae kis tarah se buton ke qahr-o-itaab mein huun sharaab kaa shaghl ho rahaa hai baghal mein paataa huun main kisi ko main jaagtaa huun ki so rahaa huun khayaal mein huun ki khvaab mein huun na chheD is vaqt mujh ko zaahid nahin ye mauqaa hai guftugu kaa savaar jaataa hai vo sharaabi main haazir us ki rikaab mein huun kabhi sharaabi kabhi namaazi kabhi huun main rind-gaah zaahid khudaa kaa Dar hai buton kaa khaTkaa ajab tarah ke azaab mein huun qayaamat aane kaa khauf kaisaa taraddud-o-fikr kyuun hai 'aaghaa' hisaab kyaa koi mujh se legaa bataa to main kis hisaab mein huun"

"chaahat ghamze jataa rahi hai vahshat sahraa dikhaa rahi hai ghunchon kaa jigar hilaa rahi hai bulbul kyaa gul khilaa rahi hai yusuf kaa pataa lagaa rahi hai khushbu kanaan mein aa rahi hai shirin kyaa rang laa rahi hai 'aashiq kaa lahu bahaa rahi hai kis shokh ko dijiye dil-e-zaar kis mein saahab vafaa rahi hai aavaaza-e-faiz hai jahaan mein jis ki shohrat sadaa rahi hai Daain hai pari-vashon ki furqat dil khaa ke kaleja khaa rahi hai jaan nazr hui pari-rukhon ki miTTi ko havaa uDaa rahi hai chaahat ki kashish ne lo Dubo di yusuf ko kunein jhukaa rahi hai dil mein jo base hue hain gul-ru surkhi aankhon mein chhaa rahi hai gahtaa huun jabin ko paa-e-but se taqdir likhaa miTaa rahi hai hanste hue dekh kar gulon ko shabnam aansu bahaa rahi hai andher kaa aaj saamnaa hai surma vo pari lagaa rahi hai kyuun jaan nahin nikalti 'aaghaa' kaise sadme uThaa rahi hai"

"kyaa banaae saane-e-qudrat ne pyaare haath paanv nuur ke saanche mein Dhaale hain tumhaare haath paanv zoaf-e-piri chhaa gayaa zor-e-javaani chal basaa ab chalein batlaaiye kis ke sahaare haath paanv machhliyaan baazu pe ubhrin saaq-e-paa shamein banin khuub saahab ne nikaale ab to baare haath paanv fauq hiire se nahin hai meri jaan yaaqut ko kyuun range hain aap ne mehndi se saare haath paanv maani-o-bahzaad ne mulk-e-adam ki raah li vo kamar mutlaq na paai laakh maare haath paanv ham na kahte the ki har dam shokhiyaan achchhi nahin aakhirash mehndi ne baandhe lo tumhaare haath paanv haathaa-paai mein bhi ham chuke na apne kaam se vasl ki shab yaar ne kyaa kyaa na maare haath paanv hai zaifi mein bhi ham ko naujavaani kaa khayaal dil nahin haaraa hai ab tak go ki haare haath paanv ghair ki dhamki se ham Dar jaaein ye mumkin nahin aise buude bhi nahin hain kuchh hamaare haath paanv maadan-e-yaaqut ko dariyaa banaayaa aap ne mehndi mal kar dhoe jab dariyaa kinaare haath paanv is buDhaape mein bhi 'aaghaa' so javaan mein ek hai go zaifi aa gai par hain karaare haath paanv"

"paanv phir hoveinge aur dasht-e-mughilaan hogaa haath phir hoveinge aur apnaa garebaan hogaa dil-e-vahshi tu na kar ishq pareshaan hogaa misl aaina ke phir shashdar-o-hairaan hogaa gar yahi ishq kaa aaghaaz hai to sun lenaa laash hovegi miri kucha-e-jaanaan hogaa Duub kar marne kaa shauq us se hi puchh ai qaatil jis ne dekhaa ye tiraa chaah-e-zanakhdaan hogaa kahti thi daam mein sayyaad ke ro kar bulbul ab kabhi ham ko mayassar na gulistaan hogaa jitne duniyaa mein sitam chaahe tu kar le mujh par hashr mein haath miraa teraa garebaan hogaa jaan de baiThegaa ik roz tu us par 'aaghaa' vo nahin haal kaa tere kabhi pursaan hogaa"

"but-e-ghuncha-dahan pe nisaar huun main nahin jhuuT kuchh is mein khudaa ki qasam miraa taair-e-dil isi qaid mein hai mujhe zulf ke daam-e-balaa ki qasam nahin bhaataa mujhe koi rashk-e-pari koi laakh hasin ho balaa se miri miraa dil tiraa aashiq-e-shefta hai mujhe tere hi naaz-o-adaa ki qasam mire dil ko zaraa nahin taab-o-taab ki uThaaun tumhaaraa ye qahr-o-ghazab mire qatl mein der na chaahiye ab tumhein apne hi jaur-o-jafaa ki qasam na to huur hi ko ye milaa hai namak na pari hi ke rukh mein hai aisi chamak tire saamne phike hain shams-o-qamar mujhe tire hi rukh ki ziyaa ki qasam mujhe itr-e-hinaa ki nahin hai havaa mujhe phulon se hotaa hai daagh-e-sivaa kabhi nikhat-e-zulf sunghaa de sabaa tujhe naafa-e-mushk-e-khataa ki qasam mire baad sahegaa na koi bhi gham na uThegaa kisi se ye ranj-o-alam karo tark tum aaj se zulm-o-sitam tumhein apni hi mehr-o-vafaa ki qasam kabhi dard se rotaa ho 'aaghaa' agar to hansi se ye kahtaa hai vo gul-e-tar miraa maan kahaa are naala na kar tujhe bulbul-e-naghma-saraa ki qasam"

"sikka-e-daagh-e-junun milte jo daulat maangtaa tang karti muflisi gar main faraaghat maangtaa ranj se fursat na milti main jo raahat maangtaa bojh hotaa sar pe gar qaarun ki daulat maangtaa gar mujhe hoti khabar meraa masihaa aaegaa ai ajal ik dam ki main bhi tujh se mohlat maangtaa khizr ki si zindagi hoti jo mujh naakaam ki main duaa-e-vasl-e-jaanaan taa-qayaamat maangtaa ashk ke dariyaa ne rakh li aabru ai chashm-e-tar marte dam do gaz zamin kyaa bahr-e-turbat maangtaa kis ki aamad aamad apne kalba-e-ahzaan mein hai peshvaai ko hai dil pahlu se rukhsat maangtaa dar-guzartaa jaan tak kartaa zamin us se aziiz mujh se darbaan-e-dar-e-jaanaan jo rishvat maangtaa nazaa tak didaar ki hasrat rahi mushtaaq ko ai masihaa mar gayaa bimaar sharbat maangtaa dar-ba-dar phirne ne meri qadr khoi ai falak un ke dil mein hai jagah milti jo khalvat maangtaa minnatein kar ke chhuDaataa bulbulon ko daam se main zar-e-gul detaa agar sayyaad qimat maangtaa aadamiyyat se hain duur in zaahidon ke qaul-o-feal haqq-e-maurusi thaa meraa kyuun main jannat maangtaa jaan di naahaq ko makkaara ke dam mein aan kar kohkan shirin se mehnat ki jo ujrat maangtaa qasd kartaa gar bulandi kaa to pasti dekhtaa kund ho jaati tabiat gar main jaudat maangtaa zulf ke janjaal mein phansne ki khud kartaa duaa main siDi thaa jo khudaa se apni shaamat maangtaa qaael apni guftugu se khaas kaa hotaa kalim 'saadi'-e-shiraaz bhi mujh se fasaahat maangtaa yaar hotaa baagh hotaa aise gar hote nasib mai-kashi ki mohtasib se main ijaazat maangtaa dasht-e-vahshat-khez mein uryaan hai 'aaghaa' aap hi qaasid-e-jaanaan ko kyaa detaa jo khilat maangtaa"

"mazaa hai imtihaan kaa aazmaa le jis kaa ji chaahe namak zakhm-e-jigar par aur Daale jis kaa ji chaahe jigar maujud hai to vo banaa le jis kaa ji chaahe galaa haazir hai khanjar aazmaa le jis kaa ji chaahe agar hai husn kaa daavaa mah o khurshid donon mein kaf-e-paa se tumhaare munh milaa le jis kaa ji chaahe ye musht-e-ustukhvaan apne kisi ke kaam mein aaein humaa ho yaa sag-e-dildaar khaa le jis kaa ji chaahe agar hai zindagi baaqi to ham hasrat nikaaleinge dil-e-pur-aarzu par khaak Daale jis kaa ji chaahe faqiron ko nahin kuchh zinat-e-duniyaa se matlab hai main khush kambal mein huun oDhe doshaale jis kaa ji chaahe jo raushan dil mein un ki raushni chhupti nahin hargiz mah-e-taabaan pe saahab khaak Daale jis kaa ji chaahe shikaayat mujh ko donon se hai naaseh ho ki vaaiz ho na samjhaa huun na samjhun sar phiraa le jis kaa ji chaahe main huun barg-e-khizaan-uftaada main mardud dahqaan huun giraa huun un ki nazron se uThaa le jis kaa ji chaahe nahin hotaa kabhi aab-e-ravaan par shak najaasat kaa mire ashkon ke dariyaa mein nahaa le jis kaa ji chaahe chaman mein gul ke murjhaane se 'aaghaa' ho gayaa saabit bisaan-e-ghuncha dam bhar muskuraa le jis kaa ji chaahe"

"khud mazedaar tabiat hai to saamaan kaisaa zakhm-e-dil aap hain shorish pe namak-daan kaisaa haath vahshat mein na ponchhe to garebaan kaisaa khaar-e-sahraa se na uljhe to vo daamaan kaisaa kucha-e-yaar ko daavaa hai ki jannat main huun khuld kahte hain kise rauza-e-rizvaan kaisaa usi maabud kaa hai dair-o-haram mein jalva bahs kis baat ki hai gabr o musalmaan kaisaa vaada-e-baada-e-athar kaa bharosa kab tak chal ke bhaTTi pe piyein jura-e-irfaan kaisaa ham hue 'qais' hue 'vaamiq' o 'farhaad' hue zulf-e-pur-kham ne kiyaa sab ko pareshaan kaisaa duur ke Dhol hain yusuf ki kahaani saahab kis ko maalum hai hogaa mah-e-kanaan kaisaa tere qurbaan main itnaa to bataa de qaatil meri gardan pe chalaa khanjar-e-burraan kaisaa dil ke aaine mein tasvir-e-sanam rakhtaa hai nahin maalum ki 'aaghaa' hai musalmaan kaisaa"