Ghazal

"naa-mukammal hain abhi takmila-e-zaat karein in ko dekhein to khud apne se mulaaqaat karein aap aaein to zaraa aap se kuchh baat karein honT si lein magar aankhon se savaalaat karein gardishon se ye kaho rukh na karein ghar ki taraf ab vo ham se sar-e-mai-khaana mulaaqaat karein aap ke baare mein sochaa to bahut thaa lekin ab ham is soch mein hain aap se kyaa baat karein rukh pe kyaa rang hai kaisi hai in aankhon ki fazaa dil jo Thahre to kuchh andaaza-e-haalaat karein ghar ki tanhaai se kyon itne pareshaan ho 'ziyaa' aao ik but ke havaale se basar raat karein"

"dil to kyaa jaan se guzarnaa aayaa ji uThe log jo marnaa aayaa sarf jab tak na huaa dil kaa lahu harf mein rang na bharnaa aayaa ho gae saare samundar paayaab jab hamein paar utarnaa aayaa fasl-e-gul aai to har ghunche ko zakhm ki tarah nikharnaa aayaa jo nafas thaa vo rahaa garm-e-safar kab musaafir ko Thaharnaa aayaa ik gul-e-tar ki mohabbat mein hamein kitne kaanTon se guzarnaa aayaa vo adab 'ishq ne bakhshaa ki hamein muddaton baat na karnaa aayaa dil pe apne jo paDi zarb 'ziyaa' TuuT kar ham ko bikharnaa aayaa"

"harf mein khun-e-jigar kis kaa hai ham se puchho ye hunar kis kaa hai ajnabi hai na shanaasaa koi ek saaya saa magar kis kaa hai hijr ki shab ko lahu ham ne diyaa ab kaho rang-e-sahar kis kaa hai khalvat-e-jaan mein hai ik halchal si us taraf qasd-e-safar kis kaa hai tu agar saamne maujud nahin husn taa-hadd-e-nazar kis kaa hai sang hi sang hain aangan mein 'ziyaa' pas-e-divaar shajar kis kaa hai"

"koi basti koi qarya nahin hai jahaan main ne tujhe paayaa nahin hai jidhar dekho sukut-e-bekaraan hai sar-e-maqtal to sannaaTaa nahin hai diye bujh jaaein to bujhti nahin hai havaa ko kyuun ye andaaza nahin hai ajab basti hai jis mein aa base hain sabhi jhuTe koi sachchaa nahin hai 'ziyaa' main ne jise samjhaa hai barson use dekhaa magar dekhaa nahin hai"

"aankhon mein hain jo khvaab koi jaantaa nahin is dil kaa iztiraab koi jaantaa nahin hai apni apni pyaas kaa har ek ko khayaal dariyaa bhi hai saraab koi jaantaa nahin ye jaante hain log ki anjaam kyaa huaa kyon aayaa inqalaab koi jaantaa nahin zarre ki raushni ko samajhte hain sab haqir hai vo bhi aaftaab koi jaantaa nahin ik hashr saa bapaa hai anaasir ke darmiyaan kis mein hai kitni taab koi jaantaa nahin daavaa to apne ilm kaa sab ko hai ai 'ziyaa' kyaa chiiz hai kitaab koi jaantaa nahin"

"ho gai aam mohabbat ki kahaani kitni khaak logon ne tire shahr ki chhaani kitni tum nahin the to khaTakte the in aankhon mein charaagh tu jo aae to hui raat suhaani kitni ik mohabbat ke havaale se suni hain ham ne daastaanein tiri aankhon ki zabaani kitni baarhaa silsila-e-ahd-e-bahaaraan ke huzur ghuncha-o-gul pe hui faatiha-khvaani kitni aae vo aur gae dil mein charaaghaan kar ke ek lamhe mein hui baat puraani kitni"

"tire ghamon se ibaarat hai ab khushi meri guzar rahi hai saliqe se zindagi meri kabhi jo zarra-e-khaaki kaa koi zikr chhiDaa nigaah uTh ke sitaaron pe jam gai meri ye aur baat ki jiine kaa lutf aa na sakaa tire baghair bhi guzri hai zindagi meri vo kaif hai ki ab aapaa bhi koi hosh nahin ye kis maqaam pe laai hai be-khudi meri palak palak pe sitaare saje hue hain 'ziyaa' ye un kaa husn-e-nazar hai ki raushni meri"

"hijaab koi nahin hai naqaab koi nahin miri khuli hui aankhon mein khvaab koi nahin hai bas sukun hi sukun iztiraab koi nahin is inqalaab ke baad inqalaab koi nahin hayaat-e-ishq mein ye vaqfa-e-sukun kaisaa savaal koi nahin hai javaab koi nahin jahaan-e-ilm kaa yaaro ajiib hai dastur ki madrase to bahut hain nisaab koi nahin shab-e-siyah mein bhalaa kaun aane vaalaa hai koi nahin dil-e-khaana-kharaab koi nahin talab ki raah mein har shakhs hai baraabar kaa yahaan sabhi hain samundar saraab koi nahin shab-e-firaaq kuchh is tarah mutmain huun 'ziyaa' ki jaise dida-o-dil par azaab koi nahin"

"jo ek pal ko bujhe bazm-e-rang-o-bu ke charaagh to ham ne daar pe raushan kiye lahu ke charaagh havaa-e-tira-nasab kyaa bujhaa sakegi unhein ki aandhiyon mein bhi jalte hain aarzu ke charaagh adaa-e-mausam-e-gul kaa kamaal kyaa kahiye kali kali se farozaan hue numu ke charaagh bujhi jo subh to sinon mein dil jalaae gae hui jo shaam to raushan hue subu ke charaagh ye naqsh-e-paa hain mire yaa savaad-e-manzil tak qadam qadam pe numaayaan hain justuju ke charaagh kabhi kabhi to 'ziyaa' vo bhi vaqt aataa hai bujhaane paDte hain khud apni aarzu ke charaagh"

"zakhm se vaasta na thaa pahle phuul aisaa khilaa na thaa pahle apne chehre kaa haal kyaa khultaa haath mein aaina na thaa pahle ishq uftaad-e-naa-gahaani hai haadisa ye huaa na thaa pahle ham ne bhi ik zamaana dekhaa hai itnaa qaht-e-vafaa na thaa pahle ishq ham ne bhi to kiyaa hai 'ziyaa' vaqt itnaa buraa na thaa pahle"

"dekh kar baam-o-dar kaa sannaaTaa bol uThtaa hai ghar kaa sannaaTaa ai mohabbat ik aakhiri aavaaz phir to hai umr bhar kaa sannaaTaa koi surat na koi aaina didani hai nazar kaa sannaaTaa likh rahi hai sahar ke maathe par raat apne safar kaa sannaaTaa kyaa yahi hai uDaan kaa mausam aam hai baal-o-par kaa sannaaTaa kis ko aavaaz de musaafir-e-gham be-jahat hai safar kaa sannaaTaa aasmaan par hai aakhiri taaraa dam-ba-khud hai sahar kaa sannaaTaa ho na ho koi aane vaalaa hai kah rahaa hai ye ghar kaa sannaaTaa chaap qadmon ki bhi nahin hai 'ziyaa' ham hain aur rahguzar kaa sannaaTaa"

"tiri aankhon kaa manzar saamne hai main pyaasaa huun samundar saamne hai anaa baDhne nahin deti hai aage mire raste kaa patthar saamne hai khayaalon se hai koson duur lekin nigaahon mein vo aksar saamne hai main khud se roz hotaa huun baghal-gir miraa apnaa hi paikar saamne hai na jalva hai na aaina hai koi ye hairat hai vo kyunkar saamne hai masaafat hai ik aaina-nazar kaa kahin jaaun miraa ghar saamne hai khilaa hai ai 'ziyaa' nazron mein ik phuul koi surat badal kar saamne hai"

"log jaam-o-subu mein khoe rahe ham tiri aarzu mein khoe rahe zindagi ki thi justuju ham ko umr bhar justuju mein khoe rahe mahfil-e-rang-o-bu to mil na saki khvaahish-e-rang-o-bu mein khoe rahe ashk jo bach rahe the aankhon mein hurmat-e-aabru mein khoe rahe har taraf thaa hisaar kaanTon kaa phuul fikr-e-numu mein khoe rahe kyaa tasavvur thaa chashm-e-saaqi kaa raat bhar ham subu mein khoe rahe shauq-e-aavaargi na puchh 'ziyaa' lazzat-e-ku-ba-ku mein khoe rahe"

"mohabbat jaag uTThi rag rag mein armaanon ko niind aai haqiqat ne naqaab ulTi to afsaanon ko niind aai chhalakti hi rahi mai daur chaltaa hi rahaa lekin ruki gardish un aankhon ki to paimaanon ko niind aai bichhe the phuul bhi har moD par fasl-e-bahaaraan mein magar i to kaanTon par hi divaanon ko niind aai sar-e-mahfil rahaa ik ratjage kaa saa samaan shab bhar palak jhapki na shamon ki na parvaanon ko niind aai tajalli thi na taabaani tasavvur thaa na partav thaa tire jaate hi saare aaina-khaanon ko niind aai mohabbat thi farozaan dard kaa ehsaas thaa jab tak hui insaaniyat rukhsat to insaanon ko niind aai shab hijraan kaa sannaaTaa hai taari band hain aankhein ye maut i ki tere sokhta-jaanon ko niind aai musalsal ishq mein aalam rahaa shab-zinda-daari kaa sar-e-maqtal pahunch kar tere divaanon ko niind aai ghani hai kis qadar chhaanv 'ziyaa' kufr-e-mohabbat ki magar is chhaanv mein kitne hi imaanon ko niind aai"

"zakhm darkaar hain siine ke liye kuchh na kuchh chaahiye jiine ke liye mai-kadaa teraa salaamat saaqi aa gae the yunhi piine ke liye ghuT ke rah jaati hai aavaaz ki lau har nafas bojh hai siine ke liye zindagi kyaa hai ye kis ko maalum log bas jiite hain jiine ke liye koi andesha-e-tufaan bhi nahin gham ye kyaa kam hai safine ke liye main 'ziyaa' huun koi suqraat nahin zahr kyon dete ho piine ke liye"

"phuul gham ke khile rahe barson dard ke silsile rahe barson zindagi thi bahut aziiz magar zindagi se gile rahe barson un gulon ke nasab kaa kyaa kahnaa dhuup mein jo khile rahe barson ishq thi baat ek lamhe ki honT apne sile rahe barson doston ki to baat apni jagah ham ko khud hi gile rahe barson ek taabir bhi mili na 'ziyaa' khvaab ke silsile rahe barson"