Ghazal

"aaj yuun hasti-e-imkaan-o-gumaan se nikle Duub kar jaise makaan sail-e-ravaan se nikle ratjage bolne lagte hain miri aankhon mein ru-ba-ru harf na jab koi zabaan se nikle shaakh-e-hasti se na uD jaae kahin taair-e-jaan jab talak tiir kisi shokh kamaan se nikle sab gulaab apne hi lagte hain chaman mein lekin koi to apnaa saf-e-laala-rukhaan se nikle khaana-e-dil mein utaaraa to hai suraj 'faakhir' kaun rokegaa agar dhuup makaan se nikle"

"masaafat-e-shab-e-hijraan tavil likhte rahe mile jo dard unhein sang-e-mil likhte rahe hikaayatein hi nahin likkhin aag ki ham ne haqiqatein bhi ba-rang-e-khalil likhte rahe jo qalb-o-jaan mein hai khushbu kisi ki zulfon ki usi ko apni mataa-e-jalil likhte rahe rahi ye aas ki sairaab hogi kisht-e-hayaat so jauhaDon ko bhi dariyaa-e-nil likhte rahe nikal saki na vahaan ek buund bhi 'faakhir' tamaam-umr jin aankhon ko jhiil likhte rahe"

"siine mein dil jo dard kaa maaraa nahin milaa phir aaine mein aks hamaaraa nahin milaa mele mein aa gae the ki shaayad koi mile is bhiiD mein bhi koi hamaaraa nahin milaa har-chand ik hujum thaa aankhon kaa har taraf lekin kisi nazar kaa sahaaraa nahin milaa kashti to Dubne ke liye be-qaraar thi kashti ko Dubne kaa ishaara nahin milaa"

"kyaa kahin kyaa ye jahaan-e-guzaraan lagtaa hai gul kaa hansnaa bhi tabiat pe garaan lagtaa hai is jahaan se bhi to ik roz nikalnaa hogaa ye jahaan bhi to kiraae kaa makaan lagtaa hai ashk-e-gham aankh mein aa jaate hain rokein kaise aag jalti hai to aankhon mein dhuaan lagtaa hai jaane kyaa meri samaaat ko huaa hai 'faakhir' naghma-e-aish bhi suniye to fughaan lagtaa hai"

"siyaah-raat pashemaan hai ham-rakaabi se vo raushni hai tire gham ki maahtaabi se sabaa ke haath hai ab izzat-e-nigaah miri chaman mahakne lagaa gul ki be-hijaabi se faraar un se hai mushkil vo dastaras mein nahin ye zard zard se mausam vo din gulaabi se lahu lahu nazar aati hai shaakh-e-gul mujh ko khile vo phuul tiri taaza inqilaabi se ajab nahin hai ki paa jaaein qaafile manzil hamaare naqsh-e-qadam ki sitaara-taabi se koi kitaab jo kholein to kyaa paDhein 'faakhir' khulin nigaah mein chehre agar kitaabi se"

"kam-nigaahi bhi hai khaamoshi bhi ruposhi bhi kitni maa'sum hai ehsaan-faraamoshi bhi ham-safar tu jo nahin hai to ye dhaDkaa hai hamein thak na jaae kahin raste mein vafaa-koshi bhi ab tu hi rakhnaa mire pairahan-e-gham kaa khayaal hosh ki tarah se rusvaa na ho be-hoshi bhi ghar mein rahiye to sivaa hoti hai vahshat 'faakhir' chikhne lagti hai tanhaai mein khaamoshi bhi"

"jis shakhs ko dekho vahi sargarm-e-safar hai duniyaa kahin viraan na ho jaae ye Dar hai laaegi kabhi rang havaaon ki mohabbat ham jis mein basar karte hain vo ret kaa ghar hai sahraa mein kisi saae ki ummid na TuuTi hasrat ki nigaahon mein bagulaa bhi shajar hai nikli hai gumaanon se yahi shakl yaqin ki jis samt uDe gard vahi raahguzar hai mahtaab to niklaa hi nahin Duub ke 'faakhir' lekin mire dariyaa mein vahi madd-o-jazar hai"

"sochtaa huun yahaan kis se hai shanaasaai miri vahi viraan saa makaan hai vahi tanhaai miri jis ki zulfon mein lagaayaa hai mohabbat kaa gulaab kaaghzi phulon se kartaa hai paziraai miri is dariche mein nahin dekhne vaalaa koi vo tamaashaa huun ki hai khalq tamaashaai miri band-e-gham TuuT ke ashaar mein bah niklaa hai qarye qarye mein hui jaati hai rusvaai miri dil ke faanus mein jal uThti hain shamein 'faakhir' dard aataa hai jo karne ki paziraai miri"

"kyaa kahiye raah-e-shauq ko kis tarah sar kiyaa ham ne safar fazaaon mein be-baal-o-par kiyaa zulf us ki ho rahi thi pareshaan havaaon mein ham ye samajh rahe the duaa ne asar kiyaa puchho na kis tarah se guzaari hai zindagi maddham se ik diye ne havaa mein safar kiyaa 'faakhir' guzar rahe hain ham is daur se yahaan jis ne mohabbaton ko bhi marhun-e-zar kiyaa"

"mausam to badaltaa hai badal jaae to kyaa ho phulon se jo khushbu bhi nikal jaae to kyaa ho jaataa huun kaDi dhuup mein parchhaain ke hamraah sahraa mein ye parchhaain bhi jal jaae to kyaa ho ye mashvira-e-zabt bhi taslim hai lekin aansu miri aankhon se nikal jaae to kyaa ho mahtaab sahaaraa hai shab-e-zist kaa 'faakhir' ye zard saa mahtaab bhi Dhal jaae to kyaa ho"

"jaltaa rahaa charaagh yaqin-o-gumaan kaa lekin huaa na duur andheraa makaan kaa gandum ki baaliyon se bahut raushni hui is raushni se qarz na utraa kisaan kaa aanchal kisi kaa tez havaa ne uDaa diyaa kashti se raabta na rahaa baadbaan kaa zakhm-e-navaazishaat mahaktaa rahaa sadaa dekhaa koi gulaab na is aan-baan kaa 'faakhir' jami hui hai abhi tak vahin nigaah malba paDaa huaa hai jahaan us makaan kaa"

"kyaa din the gulaabon se shanaasaai thi apni aatish kaa javaan honaa bhi rusvaai thi apni mahtaab ki saanson mein tavaazun na rahaa thaa is chaand ne ik raat jo chamkaai thi apni ye ishq to lagtaa hai ki aaseb hai koi ham ne to tabiat zaraa bahlaai thi apni ab DhunD ke laae koi aur aaina jis mein surat hamein ik roz nazar aai thi apni jaate to kahaan jaa ke sukun DhunDte 'faakhir' mahfil koi apni thi na tanhaai thi apni"

"aankhon mein us ki Duub ke ubhraa nahin huun main jis ne bhulaa diyaa use bhulaa nahin huun main ab lamha lamha apne bikharne kaa khauf hai ghunche ki tarah band huun khultaa nahin huun main pichhe palaT ke dekhaa to parchhaain bhi na thi sochaa thaa raah-e-shauq mein tanhaa nahin huun main ye sochtaa huun kaise rahungaa tumhaare saath aksar to apne saath bhi rahtaa nahin huun main 'faakhir' isi gali mein milegaa dil-e-kharaab lekin ab is gali se guzartaa nahin huun main"

"chaandni jis ki dar-e-jaan pe ham aksar dekhein kabhi us chaand ko bhi haath se chhu kar dekhein kaise bhar lein dar-o-divaar pe aavezaan hain jis taraf dekhein tiri yaad kaa manzar dekhein kabhi baarish ki bhi raaton mein na chamki bijli yahi armaan rahaa ghar ko munavvar dekhein aankh khul jaae to sahraa ki zamin par hon qadam niind aa jaae to khvaabon mein samundar dekhein TuuT jaane kaa bhi imkaan bahut hai is mein yuun kamaanon ki tarah aap na khinch kar dekhein shaam hote hi nikal aate hain taare 'faakhir' ik sitaare kaa magar raasta shab-bhar dekhein"

"ik umr se jis ko liye phirtaa huun nazar mein vo ruup hai suraj mein na vo rang sahar mein chalti hain havaaein to baras jaati hain aankhein chhaae hain tiri yaad ke baadal mire ghar mein hairaan hue jaate hain mujhe dekhne vaale aaina muallaq hai mire dida-e-tar mein ik chaand ko chhune ki tamannaa mein huun paagal baadal saa uDaa jaataa huun khvaabon ke safar mein moti miri aankhon ne luTaa Daale hain 'faakhir' khush-rang koi phuul khilaa jab bhi jigar mein"

"ab chaand nahin koi sitaara nahin koi shab itni andheri hai ki niklaa nahin koi har-chand nazar aati hai divaar-e-tamannaa chaahein ki Thahar jaaein to saaya nahin koi chehron ko ye gham hai koi aaina nahin hai aaina tarastaa hai ki chehra nahin koi jis se bhi milo dekh ke rah jaataa hai munh ko aisaa bhi nahin hai ki shanaasaa nahin koi armaan tumhein fasl-e-gulistaan kaa hai 'faakhir' shaakhon pe yahaan phuul to khiltaa nahin koi"

"miri hayaat ke sahraa mein chhaanv jaisaa thaa ajiib shakhs thaa ThanDi havaaon jaisaa thaa khulaa hi rahtaa thaa har-dam gulaab ki surat mizaaj us kaa chaman ki fazaaon jaisaa thaa usi zamaane mein rahtaa huun har zamaane mein vo jab badan pe gulon ki qabaaon jaisaa thaa ye us ki yaad tapaan kyuun hai dhuup si 'faakhir' vo bevafaa to barasti ghaTaaon jaisaa thaa"

"ai shauq-e-dil bhi ek muammaa ajiib hai sahraa ko aandhiyon ki tamannaa ajiib hai maujon ke iztiraab ne dhaDkaa diyaa thaa dil utre jo ham utar gayaa dariyaa ajiib hai dushvaar ho gai hai ab apni shanaakht bhi aaina kah rahaa hai ki chehra ajiib hai shaakhein jo mere sahn mein hain un mein phal na aae ham saae kaa darakht bhi kitnaa ajiib hai uThti hai ik fasil to girti hai ik fasil 'faakhir' ye chaahaton kaa gharaundaa ajiib hai"

"aankhon kaa bhi ham se kabhi parda nahin rakkhaa milne kaa bhi lekin koi rasta nahin rakkhaa vo zakhm diye baad-e-sabaa ne ki shajar ne patta bhi sar-e-shaakh-e-tamannaa nahin rakkhaa ham ne to bahut saaf kiyaa aaina dil kaa us ne magar aaine mein chehra nahin rakkhaa divaar uThaai agar alfaaz ki us ne bhule se bhi maani kaa daricha nahin rakkhaa duniyaa ke liye baagh lagaa Daale hain 'faakhir' apne liye ik shaakh kaa saaya nahin rakkhaa"

"ik ham hain gilaa karne ki himmat nahin karte ik tum ho ki khvaabon ko haqiqat nahin karte jaao to magar aks koi chhoD na jaanaa ab aaine akson ki hifaazat nahin karte ab chaand kaa armaan bhi sar-e-shaam nahin hai aankhon ke jharoke bhi shikaayat nahin karte ham dhuup se narmi ki umidein hi rakhe jaaein har-chand ki saae bhi muravvat nahin karte rahrav hain har ik peD se mil lete hain 'faakhir' saaya nahin miltaa to shikaayat nahin karte"