Ghazal

"hai to pagDanDi nazar mein mo'tabar alfaaz ki le ke jaaegi kahaan tak rahguzar alfaaz ki is se aage sirf to hai aur ma'aani kaa tilism ab koi hikmat na hogi kaargar alfaaz ki kis gali mein chhoD kar rukhsat hui parchhaaiyaan main huun aur bebas sadaaein dar-ba-dar alfaaz ki khaamushi ke in hare peDon pe jaane kyaa bani aariyaan chalti suni hain raat bhar alfaaz ki aur ik jazbe ne kaaghaz par abhi toDaa hai dam rah gaiin sab koshishein phir be-asar alfaaz ki tum ne jo pichhli ruton mein bo diye the harf kuchh fasl ug aai hai dekho baa-samar alfaaz ki jism se baahar nikal aai numaaish ke liye khud-numaai ki havas thi kis qadar alfaaz ki"

"ghar ko bhi ghar kar na paae aur na viraani mili bas yahi mushkil thi apni sirf aasaani mili muntazir kitne khudaa the har taraf ab kyaa kahein jab ke sajdon ke liye bas ek peshaani mili is gali se aaj muddat baad jaanaa phir huaa aaj bhi hairat se takti ham ko hairaani mili ajnabi is bhiiD mein tanhaai bhi aai nazar dil ko kuchh taskin hui ik shakl pahchaani mili aansuon se raat jo nam ho gayaa thaa be-tarah aap ke is khvaab ko kyaa phir se taabaani mili"

"kab tak ghuT kar jiite rahte sachchaai ke maare khvaab palkon ki dahliz se baahar nikle phir banjaare khvaab fitrat se hi aavaara hain kab Thahre jo Thahreinge kaise palkon par aTke hain kuchh khush-rang tumhaare khvaab ab maulaa hi jaane in mein apnaa kaun paraayaa kaun hans-hans kar har shab milte hain yuun to itne saare khvaab jivan ki is aapaa-dhaapi mein jo pichhe chhuT gae jaane ab kis haal mein honge vo qismat ke maare khvaab taa'biron ki faslein kaisi ugti hain kal dekheinge ham ne bhi boe hain shab bhar rang-birange pyaare khvaab kab 'akhilesh' tavaqqo' ki thi barfili is ghaaTi se aankhon se barseinge us ki ban kar yuun angaare khvaab"

"raushni tez hui koi sitaaraa TuuTaa dhaar mein ab ke nadi kaa hi kinaaraa TuuTaa thartharaate hue lab chup to lagaa baiThe par chup ne hi joDaa bhi izhaar hamaaraa TuuTaa dar-ba-dar phirtaa koi khvaab miraa aavaara raat aankhon mein chalaa aayaa thaa haaraa TuuTaa jaane kis moD pe bichhDi vo sadaa maazi ki ek tinke kaa sahaaraa thaa sahaaraa TuuTaa dhuup chaDhte hi pilaataa thaa jo sahraa paani dhuup Dhalte hi tilismi vo nazaaraa TuuTaa fikr o maaani ke chune sher usi malbe se ham ne tanhaai kaa dekhaa jo idaara TuuTaa"

"jin se Darte the maraasim un hadon tak aa gae aap se phir rafta rafta khud se ham uktaa gae ret par kuchh duur tak dekhe the ham ne saaf saaf phir ghubaar uThaa koi vo naqsh bhi dhundhlaa gae khud-kushi suraj ne kar li ye bataane ke liye kaale rangon ke parinde aasmaan par chhaa gae chand jugnu hain yahaan par aur musalsal tirgi saahabo ham shama le kar kis khanDar mein aa gae vo vali hai aur na baada-khvaar hai daanishvaron aap bhi ham-zaad se meraa hi dhokaa khaa gae"

"joD kar rakkhi hui sab paai paai le uDi duniyaa ehsaasaat ki gaaDhi kamaai le uDi mutmain the raaz-e-dil ham mein kahin mahfuz hai us ko bhi tanhaai ki par aavaa-jaai le aDi ek sadaa aai qafas ke paar bhi koi jaal hai aashiyaan ki or jab ham ko rihaai le uDi sach ki 'uryaani pahanti kyon qabaa tahrir ki chhin li mujh se qalam phir raushnaai le uDi abr kaa TukDaa mere hamraah kitni duur tak chiil si koi havaa ki mauj aai le uDi laDkhaDaate paanv the par the to manzil ki taraf raasta hi rahbaron ki rahnumaai le uDi ham se aavaara-mizaajon ki koi manzil kahaan aap ko bhi aap ki hi paarsaai le uDi DhunDte ho ab kahaan 'akhlesh' vo saae ghane bargadon ki shakhsiyat to bonsaai le uDi"

"ek vahi maamul nibhaanaa hogaa phir khud ko kho kar khud ko paanaa hogaa phir raahguzar tanhaai ki hai dhyaan rahe raste mein hi ek zamaana hogaa phir raah bhaTak jaao ab ke ye mumkin hai par is jangal mein se jaanaa hogaa phir jin ki aasaani hi jin ki mushkil hai un lafzon ko hi dohraanaa hogaa phir vo phaldaar darakht giraayaa aandhi ne un kaa ab kis or nishaana hogaa phir aaj to us se meri raatein raushan hain kal ko jab ye zakhm puraanaa hogaa phir kab sochaa thaa chuppi bolegi aise aavaazon se yuun viraana hogaa phir sahraa mein jo khaak uDi hai be-mausam dekho to vo hi divaana hogaa phir"

"uDaa ke phir vahi gard-o-ghubaar pahle saa bulaa rahaa hai safar baar-baar pahle saa vo ek dhund thi aakhir ko chhaT hi jaanaa thi dikhaai dene lagaa aar-paar pahle saa nadi ne raah samundar ki phir vahi pakDi sadaaein detaa rahaa regzaar pahle saa kahin Dhalaan muqaddar na ho bulandi kaa chaDhaai phir na ho apnaa utaar pahle saa savaal kyuun na charaagh-e-sahar se kar dekhein junun ab bhi hai kyaa barqaraar pahle saa to kyaa palaT ke vahi din phir aane vaale hain kai dinon se hai dil be-qaraar pahle saa"

"kabhi to Duub chale ham kabhi ubharte hue khud apni zaat ke dariyaa ko paar karte hue yahin se raah koi aasmaan ko jaati thi khayaal aayaa hamein siDhiyaan utarte hue agar vo khvaab hai jo aankh mein salaamat hai to phir ye kyaa hai jise dekhtaa huun marte hue simaT ke khud mein miraa khair kyaa banaa hotaa havaa ke dosh pe thaa duur tak bikharte hue nae safar ki kahin ibtidaa na ho manzil ye paanv puchh rahe hain thakan se Darte hue abhi to duur talak aasmaan suunaa thaa kahaan se aa gae panchhi uDaan bharte hue"

"fareb khaanaa nahin baar baar chikhtaa hai nadi ki tah se koi regzaar chikhtaa hai badan ke ghaar se be-ikhtiyaar chikhtaa hai shikaar hone se pahle shikaar chikhtaa hai tamaam din to nahin TuTtaa tilism-e-sadaa tamaam raat bhi bas intizaar chikhtaa hai udhar na jaanaa udhar raaste mein manzil hai safar kaa lutf sar-e-rahguzaar chikhtaa hai mahaaz-e-jang mein pahle harif tai to hon lagaam thaame hue shahsavaar chikhtaa hai tamaam umr kaa haasil hai sirf tanhaai bulandiyon se koi kohsaar chikhtaa hai isi liye to main khud se hi bhaagaa phirtaa huun koi hai mujh mein nasihat-guzaar chikhtaa hai"

"jism ke ghaar ke dahaane par vo hi kirdaar thaa nishaane par kyaa muqaabil thi ab ke bhi divaar koi bolaa nahin bulaane par ik maaani ne aur dam toDaa ain alfaaz ke muhaane par saaebaan ke tale kahaan rahti dhuup jaa baiThi shaamiyaane par vo bhi imaan tak chalaa aayaa aa gae ham bhi muskuraane par shor tanhaaiyaan bhi karti hain ye khulaa koi yaad aane par rat-jagaa dhundh khvaab sargoshi itne mehmaan gharib-khaane par zakhm kaa vo hi roz kaa ronaa zabt ki zid bhi aazmaane par laao naakaamiyon kaa jaam idhar khaak Daalo bhi ab zamaana par khud ko khud mein sameT kar uThiye aa gai dhuup bhi sirhaane par mutmain aql kyon nahin aakhir lag gayaa dil bhi jab Thikaane par"

"vaqt kar de na paaemaal mujhe ab kisi shakl mein to Dhaal mujhe 'aql vaalon mein hai guzar meraa meri divaangi sanbhaal mujhe main zamin bhultaa nahin hargiz tu baDe shauq se uchhaal mujhe tajrabe the judaa judaa apne tum ko daana dikhaa thaa jaal mujhe aur kab tak rahun mo'attal saa kar de maazi mire bahaal mujhe"

"vahm hi hogaa magar roz kahaan hotaa hai dhundh chhaai hai to ik chehra 'ayaan hotaa hai shaam khush-rang parindon ke chahak jaane se ghar huaa jaataa hai din mein jo makaan hotaa hai vo koi jazba ho alfaaz kaa mohtaaj nahin kuchh na kahnaa bhi khud apni hi zabaan hotaa hai be-sabab kuchh bhi nahin hotaa hai yaa yuun kahiye aag lagti hai kahin par to dhuaan hotaa hai baaz-gasht aur sadaaon ki ubhar aati hai jitnaa khaali koi 'akhlesh' kuaan hotaa hai"

"kahne ko kamre mein saare yakjaa baiThe hain apne apne mobile par tanhaa baiThe hain apne hi khvaabon ko karke pinjra baiThe hain karne kyaa aae the lekin kar kyaa baiThe hain jaane kis ke haath lagaa chehra jo apnaa thaa be-matlab kab se le kar aaina baiThe hain ek sabaq raTte to hain par yaad nahin hotaa tifl-e-maktab kab se khole basta baiThe hain phir viraan shajar par vo hi raunaq lauTi hai phir vo panchhi vaapas Daalon par aa baiThe hain naahaq aap nikal aae dil ki pagDanDi par khaaron mein ab apnaa daaman uljhaa baiThe hain tanhaai vaahid rasta thaa tum tak aane kaa duniyaa vaale is par bhi duniyaa laa baiThe hain ek samundar bhed chhupaae jazb kare sab ko aas lagaae kab se kitne dariyaa baiThe hain roz vahi aahaT vo hi sargoshi bhitar se apne mein ham apne se hi uktaa baiThe hain shaam se pahle lauT ke ghar aane ki ujlat mein sidhaa saa rasta raston mein uljhaa baiThe hain"

"nadi kaa kyaa hai jidhar chaahe us Dagar jaae magar ye pyaas mujhe chhoD de to mar jaae kabhi to dil yahi uksaae khaamushi ke khilaaf labon kaa khulnaa hi is ko kabhi akhar jaae kabhi to chal paDe manzil hi raaste ki tarah kabhi ye raah bhi chal chal ke phir Thahar jaae koi to baat hai pichhle pahar mein raaton ke ye band kamra ajab raushni se bhar jaae ye teraa dhyaan ki sahmaa parinda ho koi zaraa si saans ki aahaT bhi ho to Dar jaae bahut sambhaal ke darpan anaa hai ye 'akhilesh' zaraa si chuuk se aisaa na ho bikhar jaae"

"vo shakl vo shanaakht vo paikar ki aarzu patthar ki ho ke rah gai patthar ki aarzu chhat ho falak to khaak uDaane ko paanv mein sahraa mein khinchti hai hamein ghar ki aarzu zakhmi kiye hain paanv kabhi laai raah par kab kaun jaan paayaa hai Thokar ki aarzu apni giraft mein liye uDtaa phire kahin parvaaz ko hai kab se usi par ki aarzu rahti hai mujh mein kab se kunvaari hai aaj tak ik aarzu ke apne svayambar ki aarzu 'akhilesh' kab bujhi hai havas ki shadid pyaas dariyaa tamaam pi le samundar ki aarzu"

"kaaghaz pa harf harf nikhar jaanaa chaahiye be-chehragi ko rang mein bhar jaanaa chaahiye mumkin hai aasmaan kaa rasta inhin se ho niile samundaron mein utar jaanaa chaahiye har-dam badan ki qaid kaa ronaa fuzul hai mausam sadaaein de to bikhar jaanaa chaahiye sahraa mein kaun bhiik kise degaa chhaanv ki khud apni oT mein hi Thahar jaanaa chaahiye tanhaa safar mein raat ke is pichhle vaqt mein aavaaz koi de to kidhar jaanaa chaahiye jis se bichhaD ke ho gae sahraa-navard ham ab tak to us ke zakhm bhi bhar jaanaa chaahiye paani ko rokti ho jo 'akhlesh'-ji anaa khud pyaas ko nadi mein utar jaanaa chaahiye"

"gutthi na sulajh paai go suljhaai bahut hai jo khuub luTaai thi vo shai paai bahut hai phislan ye kinaaron pa ye Thahraav nadi kaa sab saaf ishaare hain ki gahraai bahut hai Dartaa huun kahin khud se na ho jaae mulaaqaat is dil ki guzargaah mein tanhaai bahut hai parbat si haqiqat bhi dalilon mein paDe kam be-par ki uDaanaa ho to bas raai bahut hai kyaa dekh ke lauTe hain mohabbat ki gali se kyaa baat hai aavaaz kyuun bharraai bahut hai"

"mulaahiza ho miri bhi uDaan pinjre mein ataa hue hain mujhe do-jahaan pinjre mein hai sair-gaah bhi aur is mein aab-o-daana bhi rakhaa gayaa hai miraa kitnaa dhyaan pinjre mein is ek shart par us ne rihaa kiyaa mujh ko rakhegaa rehn vo meri uDaan pinjre mein yahin halaak huaa hai parinda khvaahish kaa tabhi to hain ye lahu ke nishaan pinjre mein mujhe sataaegaa tanhaaiyon kaa mausam kyaa hai mere saath miraa khaandaan pinjre mein falak pe jab bhi parindon ki saf nazar aai hui hain kitni hi yaadein javaan pinjre mein khayaal aayaa hamein bhi khudaa ki rahmat kaa sunaai jab bhi paDi hai azaan pinjre mein tarah tarah ke sabaq is liye raTaae gae main bhuul jaaun khulaa aasmaan pinjre mein"

"na dhuup dhuup rahe aur na saayaa saayaa to junun-e-shauq agar phir vahin pe laayaa to qadam baDhaa to luun aabaadiyon ki samt magar mujhe vo DhunDhtaa tanhaaiyon mein aayaa to suluk khud se harifaana kaun chaahegaa agarche tu ne mujhe zindagi nibhaayaa to main jis ki oT mein mausam ki maar sahtaa huun kahin khanDar bhi vo baarish ne ab ke Dhaayaa to magar gai na mahak mujh se mere maazi ki nadi ki dhaar mein sau baar main nahaayaa to sharif log the aadi the band kamron ke laraz uThe kisi ne qahqaha lagaayaa to hai rasm-o-raah ki surat abhi ghanimat hai nadi ne dekh mujhe haath phir hilaayaa to"

"hansnaa ronaa paanaa khonaa marnaa jiinaa paani par paDhiye to kyaa kyaa likkhaa hai dariyaa ki peshaani par mahngaai hai daam mileinge sochaa thaa ham ne lekin sharminda ho kar lauTe hain khvaabon ki arzaani par ab tak ujDe-pan mein shaayad kuchh nazzaaron laaeq hai varna jamghaT kyuun umDaa rahtaa hai is viraani par raat jo aankhon mein chamke jugnu main un kaa shaahid huun aap bhale charchaa kariye ab suraj ki taabaani par subh-saveraa daftar biivi bachche mahfil nindein raat yaar kisi ko mushkil bhi hoti hai is aasaani par us ki sapnon vaali pariyaan kyuun main dekh nahin paataa bachcha hairaan hai mujh par main bachche ki hairaani par ek achhutaa manzar mujh ko chhu kar guzraa thaa ab to pachhtaanaa hai khud mein Duube rahne ki naadaani par ham fankaaron ki fitrat se vaaqif ho tum to 'akhilesh' maqsad samho ruk mat jaanaa bas lafzon ke maani par"

"bichhaDne deti nahin DhunDh hi nikaalti hai ajiib hai na mujhe be-khudi sambhaalti hai main kab kaa haar chukaa zindagi tiri baazi havaa mein kis liye sikka nayaa uchhaalti hai huaa hai shak miri tanhaai ko mujhe le kar ulaT palaT ke har ek chiiz ko khangaalti hai jhulas na dein kahin sachchaaiyaan use ik din vo khvaab aankh jise chhaanv chhaanv paalti hai dubak gai hai kiran jo abhi dhundhlake mein vahi to subh ko suraj nayaa ujaalti hai"

"raushni ke na the aasaar band kamre mein vo to lau de uThaa kirdaar band kamre mein hai guzar apnaa hi mushkil to phir taajjub hai kis tarah aa gayaa baazaar band kamre mein sher jitne kahe khaarij kiye sivaa us se sirf purzon kaa hai ambaar band kamre mein chaand taaron se alag ek aur duniyaa hai baanchtaa thaa koi akhbaar band kamre mein tajraba khuub hai is par amal bhi karnaa hai rahnaa hai khud se hi hushyaar band kamre mein joD kar rakhtaa thaa duniyaa se jo vo hi ehsaas ab paDaa rahtaa hai bimaar band kamre mein sach agar jhuuT ko taslim kar bhi luun to anaa ruuTh kar karti hai takraar band kamre mein"