Ghazal

"dil masarrat se ham-kanaar nahin mausam-e-gul bhi saazgaar nahin kaise kah duun bahaar aai hai ghuncha-o-gul pe jab nikhaar nahin mere 'isyaan kaa hai shumaar magar rahmaton kaa tiri shumaar nahin main farishta nahin huun insaan huun kah duun kyunkar gunaahgaar nahin khud-paraston ke shahr mein 'arshi' kyaa koi teraa gham-gusaar nahin"

"adhuraa 'ilm rakh kar khud ko jo kaamil samajhte hain safar mein miil ke patthar ko vo manzil samajhte hain jo khud ko ahmaqon ki bazm mein 'aaqil samajhte hain ham aise be-shu’uron ko faqat jaahil samajhte hain mohabbat se kare jo baat main ho jaataa huun us kaa bahut aasaan huun jaane aap kyon mushkil samajhte hain adab khud apni aankhon kaa kiyaa hai is liye ham ne hasin chehra tumhaaraa diid ke qaabil samajhte hain kisi bhi pal hamein ye chain se jiine nahin detaa tire gaalon ke til ko apnaa ham qaatil samajhte hain kisi ki khush-mizaaji us kaa gham zaahir nahin karti samundar kitnaa pyaasaa hai faqat saahil samajhte hain sazaa mazlum ko dete hain zaalim chhuT jaataa hai ham aise munsifon ko 'adl kaa qaatil samajhte hain shujaa'at kaa hamaari silsila to karbalaa tak hai ki ham mushkil-kushaa vaale kahaan mushkil samajhte hain taqaabul mat karo 'arshi' hamaaraa aise logon se jo buzdil hain hamein apni tarah buzdil samajhte hain"

"bazm-e-'aalam ke raaz-daan hain ham yaa'ni aaina-e-jahaan hain ham baagh-e-urdu ke baaghbaan hain ham lafz-o-maa'ni ke tarjumaan hain ham ham se qaaem hain husn ki qadrein 'ishq ki gard-e-kaarvaan hain ham jis se vaaqif na ho saki duniyaa us mohabbat ki daastaan hain ham ham zamin-bos tum falak-andaaz tum kahaan par ho aur kahaan hain ham jo bhi kahnaa hai aaj kah lo tum kyunki is vaqt be-zabaan hain ham pur-fitan daur mein bhi ai 'arshi' raah-e-haq par ravaan-davaan hain ham"

"maayus na ho ai dil-e-naakaam kisi din mil jaaegaa neki kaa tire daam kisi din ummid ye vaabasta hai farmaan-e-khudaa se milnaa hai hamein sabr kaa in'aam kisi din is shahr-e-sitam-gar mein ye e'laan karaa do aa'maal kaa sab paaeinge anjaam kisi din ham sabr-o-tahammul ke hi saae mein pale hain thak jaaegi tu gardish-e-ayyaam kisi din ai barq tiri zad pe ho taa'mir nasheman kar jaaeinge ham bhi ye baDaa kaam kisi din manzil bhi tire qadmon ko chumegi yaqinan tu baandh le gar 'azm kaa ehraam kisi din muddat se tiri surat-e-zebaa nahin dekhi qismat se jo aa jaate lab-e-baam kisi din raahon mein phiraa karte hain ulfat ke luTere luT jaao kahin tum na sar-e-'aam kisi din ai ziist tire tohfa-e-aalaam-o-mehan se mil jaaegaa 'arshi' ko bhi aaraam kisi din"

"guzarte lamhe ye ranj-o-malaal hi ke to hain 'ataa kiye hue ahl-o-'ayaal hi ke to hain tumhaare kuche mein har samt raqs-e-bismil hai ye sab karishme tumhaare jamaal hi ke to hain ye bikhre baal ye chaak-e-garebaan aur aahein ye haal 'ishq mein tere kamaal hi ke to hain 'abas hai aarzu karnaa tumhaare paane ki ye valvale mire khvaab-o-khayaal hi ke to hain khulus pyaar mohabbat vafaaein ai 'arshi' ye chand lafz tumhaari misaal hi ke to hain"

"jis ko samjhe the masihaa vo sitamgar niklaa tiir joDe hue taane hue khanjar niklaa baal bikhre hue nam aankh labon par aahein mere nazdik se vo yuun sar-e-mahshar niklaa shaam-e-furqat jo tiri yaad mein Tapkaa thaa kabhi qatra-qatra mire us ashk kaa gauhar niklaa aap ne ru-e-munavvar se jo sarkaayaa naqaab goyaa zulmat mein koi nuur kaa paikar niklaa vo gadaa ho yaa tavangar yahi dekhaa ham ne jo bhi niklaa tire darbaar se ban kar niklaa ghumtaa phirtaa thaa jo haathon mein kashkol liye aaj vo 'arshi' muqaddar kaa sikandar niklaa"

"jo raaz-e-dil thaa huaa sab pe mushtahar kaise milaa sakeinge bhalaa un se ab nazar kaise na puchhiye ki rah-e-'aashiqi mein kyaa guzri ye puchhiye ki mukammal huaa safar kaise ye mai-kada hai yahaan baada-nosh aate hain janaab-e-shaikh bhalaa aa gae idhar kaise rah-e-vafaa mein abhi se ukhaD gaiin saansein to tai karoge ye khaaron-bhari Dagar kaise safar tavil thaa yaadein tumhaari thiin hamraah hamein pata na chalaa kaT gayaa safar kaise tumhin to meri mataa'-e-hayaat ho 'arshi' milegaa chain bhalaa tum se ruuTh kar kaise"

"ham apne 'azm-e-mohkam se bhalaa kab Talne vaale hain hamesha vaadi-e-kohsaar mein ham palne vaale hain mire shaana-bashaana log jo bhi chalne vaale hain haqiqat mein vahi shohrat se meri jalne vaale hain miri sachchi khari baaton pe patthar maarne vaale yaqinan ye kaf-e-afsos ik din malne vaale hain miri barbaadiyon par hansne vaalo ghaur farmaao tumhaare bhi to ik din chaDhte suraj Dhalne vaale hain ye duniyaa kyaa hai ik bahtaa huaa dariyaa hai ai logo chalo tum aage aage pichhe ham bhi chalne vaale hain mukaafaat-e-'amal se kaun bach saktaa hai ai 'arshi' jo daane boe hain achchhe-bure sab phalne vaale hain"

"ai mire chaaraagar soch kar bolnaa kyaa hai darmaan-e-zakhm-e-jigar bolnaa aag se khelnaa koi mushkil nahin sakht mushkil hai haq baat par bolnaa aaj ke daur kaa khaas dastur hai 'aib ko zindagi kaa hunar bolnaa pyaar ki ahmiyat kaa pata de gayaa shaam-e-vaa’da tiraa ruuTh kar bolnaa sar bhi kaT jaae 'arshi' magar dekhnaa khair ko khair aur shar ko shar bolnaa"

"hamaare shahr mein kuchh log ham se jalte hain yahi sabab hai ki ham sar uThaa ke chalte hain sitamgari to koi dekhe mah-jabinon ki ki chuTkiyon se mire dil ko vo masalte hain ye kaar-gaah-e-junun bhi 'ajib duniyaa hai ki is ke saae mein har inqalaab palte hain tumhaari surat-e-zebaa ko dekhne ke liye vufur-e-shauq mein khud aaine machalte hain sitamgaraan-e-jahaan dein na dhamkiyaan ham ko ham ahl-e-'ishq hain sho'lon pe roz chalte hain"

"basti se duur shahr mein jaanaa paDaa mujhe bachchon kaa masala thaa kamaanaa paDaa mujhe ghairon ke dukh kaa bojh uThaanaa paDaa mujhe insaaniyat kaa farz nibhaanaa paDaa mujhe aaina haasidon ko dikhaanaa paDaa mujhe kirdaar aisaa apnaa banaanaa paDaa mujhe yuun 'ishq kaa vaqaar baDhaanaa paDaa mujhe maqtal mein tere vaaste jaanaa paDaa mujhe nafrat kaa thaa andheraa bahut dur-dur tak chaahat kaa har charaagh jalaanaa paDaa mujhe rakhnaa thaa ek lafz-e-mohabbat kaa bhi bharam taa-'umr us kaa saath nibhaanaa paDaa mujhe meri anaaniyat ne ijaazat na di magar tu ne pukaaraa lauT ke aanaa paDaa mujhe jo apni bevafaai mein mashhur thaa bahut us ko sabaq vafaa kaa paDhaanaa paDaa mujhe kuchh is adaa se bichhDaa vo 'arshi' ki us kaa gham daanista aansuon mein chhupaanaa paDaa mujhe"

"jab se tum ho gae judaa ham se zindagi hai khafaa khafaa ham se chaahtaa kyaa hai bevafaa ham se jab ta'alluq nahin rahaa ham se ek saaya tumhaari qurb kaa thaa chhin gayaa vo bhi aasraa ham se vo balaa-nosh hain zamaane mein khauf khaati hai har balaa ham se jis ne dil ko jalaayaa thaa 'arshi' hai vahi taalib-e-du’aa ham se"