Ghazal

"aankhon ko aansuon se mohabbat hai kyaa karun dil par tumhaare gham ki hukumat hai kyaa karun shishon kaa hai makaan ki hairaaniyon kaa ghar surat har ek teri hi surat hai kyaa karun ho kar kabhi idhar se guzarti nahin bahaar mere chaman ko teri zarurat hai kyaa karun ik pal bhi jaise saikDon sadiyaan tire baghair har saans jaise ek qayaamat hai kyaa karun jiine hi de 'asir' na marne hi de mujhe ik tir-e-nim-kash ki 'inaayat hai kyaa karun"

"zindagi jaisi bhi haalat mein jahaan guzri hai tere hamraah na hone se garaan guzri hai aag bhaDkegi gulistaan mein dhuaan phailegaa phir nasheman se tire barq-e-tapaan guzri hai dil ki gahraai kaa andaaza tujhe kyaa hogaa kab tire sar se koi mauj-e-ravaan guzri hai uf ye ayyaam-e-zaifi ke sisakte lamhe haae vo daur ki jab umr-e-javaan guzri hai koi batlaa de 'asir' un ko unhi ki galiyaan puchhte hain ki tiri umr kahaan guzri hai"

"phulon kaa khayaal aae to lagtaa hai ki tum ho taaron pe nazar jaae to lagtaa hai ki tum ho ghanghor ghaTaaon ke jhamelon mein achaanak bijli koi lahraae to lagtaa hai ki tum ho mamtaa ki hasin baanh mein soyaa huaa maasum khvaabon mein jo muskaae to lagtaa hai ki tum ho chalte hue sunsaan si raahon mein akele pattaa bhi khaDak jaae to lagtaa hai ki tum ho vo dhun hai tumhaari ki zamaane mein kahin bhi paael koi chhankaae to lagtaa hai ki tum ho"

"na aaeinge lauT kar vo phir bhi main umr bhar intizaar kar luun idhar to aa ai gham-e-mohabbat tujhe hi ji bhar ke pyaar kar luun na jaane kab tak Dhale shab-e-gham na jaane subh-e-umid kab ho qadam qadam par bichhaa luun taare nafas nafas shoala-baar kar luun kabhi ayaadat hui na us se kabhi kisi se na haal puchhaa mariz-e-gham par vo mehrbaan hai ye kaise main eatibaar kar luun abhi salaamat hai azm-e-mohkam abhi hai baaqi lahu ragon mein ulaT ke rakh duun nizaam-e-gulshan khizaan ba-rang-e-bahaar kar luun zaraa Thahar ai junun-e-ulfat tu le chalaa hai kahaan abhi se mataa-e-dil jab luTaa chukaa huun to jaan bhi un par nisaar kar luun yahin bichhaD ke main ro paDaa thaa yahin hai bhigaa zamin kaa aanchal yahin phir us se milan bhi hogaa yahin pe main intizaar kar luun nahin hai baaqi agar patange to rah ke tanhaa udaas hogi lahad se uTh kar 'asir' main hi tavaaf-e-shama-e-mazaar kar luun"

"ham-navaa mere mujh se judaa ho gae vo khafaa kyaa hue sab khafaa ho gae husn kaa raaz-e-sar-basta khul jaaegaa laala-o-gul agar lab-kushaa ho gae aap apne hi jalve the pesh-e-nazar hasratein baDh gaiin aaina ho gae ye miraa fan ki main ne taraashaa jinhein pattharon ke vo but sab khudaa ho gae jab se mahfil mein tum jaan-e-mahfil hue bevafaa sab ke sab baa-vafaa ho gae kaam aa hi gayaa apnaa divaana-pan lazzat-e-sang se aashnaa ho gae di 'asir' apni aankhon mein jin ko jagah shahr-e-dil ke vo farmaan-ravaa ho gae"

"koi khushi na koi gham hai kyaa kiyaa jaae baDaa ajiib saa aalam hai kyaa kiyaa jaae zaraa sukun ho mayassar to koi baat bane yahaan to gardish-e-paiham hai kyaa kiyaa jaae kahin se chikh bhi uTThi to rah gai dab kar ki ghunghruon ki chhamaa-chham hai kyaa kiyaa jaae kahaan se laaiye maasumiyat farishton si gunaah fitrat-e-aadam hai kyaa kiyaa jaae 'asir' khvaab dikhaayaa gayaa thaa jannat kaa gali gali mein jahannam hai kyaa kiyaa jaae"

"chaahe jugnu ki sitaara ki guhar mein rahnaa tum bahar-rang bahar-shakl nazar mein rahnaa thak ke raste mein kahin baiTh na jaanaa raahi chalte rahnaa ki muqaddar hai safar mein rahnaa tere ik roz ke didaar mein hai kitni kashish roz kaa kaam huaa teri Dagar mein rahnaa khubsurat to bahut hai ye tiraa gaanv magar koi din aa ke hamaare bhi nagar mein rahnaa maut ke baad phir ik gardish-e-paiham ki khabar TuuTe patton kaa havaaon ke bhanvar mein rahnaa azhdahaa bhiiD kaa phir tum ko nigal jaaegaa duur honaa to bas itnaa ki nazar mein rahnaa ek dhaDkaa saa lagaa rahtaa hai baarish mein 'asir' ghar mein rahte hue aasaan nahin ghar mein rahnaa"