Ghazal

"kaun vaan jubba-o-dastaar mein aa saktaa hai ghar kaa ghar hi jahaan baazaar mein aa saktaa hai kis liye khud ko samajhtaa hai vo patthar ki lakir us kaa inkaar bhi iqraar mein aa saktaa hai mujh ko maalum hai dariyaaon kaa kaf hai tujh mein tu mire mauja-e-pindaar mein aa saktaa hai ai havaa ki tarah aThkheliyaan karne vaale bal kabhi vaqt ki raftaar mein aa saktaa hai sar pe suraj hai to phir chhaanv se mahzuz na ho dhuup kaa rang bhi divaar mein aa saktaa hai ye jo main apne taiin shaaeri kartaa huun 'azim' kyaa takhayyul miraa izhaar mein aa saktaa hai"

"isi liye to haar kaa huaa nahin malaal tak vo mere saath saath thaa uruuj se zavaal tak nahin hai sahl is qadar ki ji sake har ek shakhs balaa-e-hijr ki ruton se mausam-e-visaal tak hamaari kisht-e-aarzu ye dhuup kyaa jalaaegi tumhaaraa intizaar ham kareinge barshgaal tak amiiq zakhm is qadar ba-dast-e-roz-o-shab mile ki mundamil na kar saki davaa-e-maah-o-saal tak qubaa-e-zard-o-surkh kaa ye imtizaaj al-amaan jamaal ko vo le gayaa pare had-e-kamaal tak"

"fitna uThaa to razm-gah-e-khaak se uThaa suraj kisi ke pairhan-e-chaak se uThaa ye dil uThaa rahaa hai baDe hausle ke saath vo baar jo zamin se na aflaak se uThaa sab mojazon ke baab mein ye mojaza bhi ho jo log mar gae hain unhein khaak se uThaa suraj ki zau charaagh-e-shikasta ki lau se ho qulzum ki mauj dida-e-namnaak se uThaa puchhaa jo us ne ahd-e-jaraahat kaa maajraa dariyaa lahu kaa har rag-e-poshaak se uThaa"

"ishq mein ho ke mubtilaa dil ne kamaal kar diyaa yuun hi si ek shakl ko zohra jamaal kar diyaa ham ko tumhaari bazm se uThne kaa kuchh qalaq nahin jaisaa khayaal ho sakaa vaisaa khayaal kar diyaa sail-e-ravaan-e-umr ke aage Thahar sakaa na kuchh vaqt ne mehr-e-husn ko ru-ba-zavaal kar diyaa ek sam-e-azaab saa phail gayaa vajud mein roz-o-shab-e-firaaq ne jiinaa muhaal kar diyaa meri zabaan-e-khushk par ret kaa zaaiqa saa hai mausam-e-bar-shigaal ne kaisaa ye haal kar diyaa dhund mein kho ke rah gaiin suratein mehr-o-maah si vaqt ki gard ne unhein khvaab-o-khayaal kar diyaa"

"dastak havaa ki sun ke kabhi Dar nahin gayaa lekin main chaand-raat mein baahar nahin gayaa aankhon mein uD rahaa hai abhi tak ghubaar-e-hijr ab tak vidaa-e-yaar kaa manzar nahin gayaa ai shaam-e-hijr-e-yaar miri tu gavaahi de main tere saath saath rahaa ghar nahin gayaa tu ne bhi saare zakhm kisi taur sah liye main bhi bichhaD ke ji hi liyaa mar nahin gayaa saada fasil-e-shahr mujhe dekhti rahi lekin main teraa naam bhi likh kar nahin gayaa bakhshaa shab-e-firaaq ko dil ne abad kaa tuul shab bhar lahuluhaan rahaa mar nahin gayaa"

"sukun-e-dil gayaa nazron se sab qataare gae chaman mein khilte hue jab se phuul maare gae havaa-e-maut zaraa der kyaa idhar aai ki mere haath se uD kar mire ghubaare gae ye kaisi karbalaa barpaa hui peshawar mein lahu mein Duube hue mere bachche maare gae unhein hi martaba miltaa hai jaa ke jannat mein husul-e-ilm ki khaatir jo jaan vaare gae chaman ujaaDne vaalo tumhein khudaa samjhe tumhein na aai hayaa phuul to hamaare gae rahegaa yaad hamein aane vaali naslon tak vo naqsh-e-paa jo yahaan khuun se ubhaare gae salaam meraa 'azim' un shahid bachchon ko jo apni jiit ki khaatir bhi jaan haare gae"

"ab sochiye to daam-e-tamannaa mein aa gae divaar o dar ko chhoD ke sahraa mein aa gae tasvir the jo avvalin sarshaariyon mein log vo zakhm ban ke chashm-e-tamannaa mein aa gae un se bhi puchhiye kabhi apni zamin kaa karb jo saahilon ko chhoD ke dariyaa mein aa gae vahshat ne yuun to khuub diyaa har qadam pe saath lekin tire fareb-e-dil-aaraa mein aa gae is anjuman mein anjum o zohra bhi the magar ham shab-guzida sehr-e-surayyaa mein aa gae"

"aisi bhi kahaan be-sar-o-saamaani hui hai jo sab ko mujhe dekh ke hairaani hui hai dil mein to tiri yaad thi ik buund lahu ki aankhon mein jo aai to yahi paani hui hai qulzum kaa hai ezaaz ki tahdaari ki har mauj is zulf-e-girah-gir ki divaani hui hai kyaa DhunDne nikli hai kisi qais ko paagal is darja jo ye baad-e-bayaabaani hui hai aaseb-zada hain dar-o-divar-e-shab-o-roz kis darja mah o saal ki viraani hui hai boe hain bahut chashm-e-tamannaa mein yahaan khvaab tab jaa ke zamin dil ki ye baaraani hui hai"

"main to soyaa bhi na thaa kyuun ye dar-e-khvaab giraa meri aaghosh mein bujhtaa huaa mahtaab giraa phir samundar ki taraf lauT chali mauj-ba-mauj phir koi tishna-dahan aa ke sar-e-aab giraa aks mismaar na kar dida-e-hairaan ke sarishk mere khvaabon ke dar-o-baam na sailaab giraa DhunD siipi ki tarah dil ko na saahil ke qarib ye sadaf duur bahut duur tah-e-aab giraa aahan o sang ko zahraab-e-fanaa chaaT gayaa pahle divaar shikasta hui phir baab giraa"

"kise khabar ki hai kyaa kyaa ye jaan thaame hue zamin thaame hue aasmaan thaame hue fazaaein kuchh bhi nahin hain faqat nazar kaa fareb khaDaa huaa hai koi aasmaan thaame hue safina mauja-e-sail-e-balaa se garm-e-satiz havaa kaa baar-e-giraan baadbaan thaame hue giraa hai koi jari ai fasil-e-shahr-e-tabaah muzaahimat kaa darida-nishaan thaame hue saDak ke paar chalaa jaa rahaa hai bachtaa huaa kisi kaa haath koi mehrbaan thaame hue ajab tilism saa manzar hai bhigti hui shaam koi pari hai dhanak ki kamaan thaame hue"

"zamin ki khaak to aflaak se ziyaada hai ye baat par tire idraak se ziyaada hai ye aaftaab use dhuup mein jalaa degaa jo chhaanv peD ki poshaak se ziyaada hai khayaal aataa hai aksar utaar pheinkun badan ki ye libaas miri khaak se ziyaada hai chhalak uThaa huun agar saari kaaenaat se main to kyaa ye khaak tire chaak se ziyaada hai libaas dekh ke itnaa hamein gharib na jaan hamaaraa gham tiri imlaak se ziyaada hai"

"qarya-e-intizaar mein umr ganvaa ke aae hain khaak-ba-sar is dasht mein khaak uDaa ke aae hain yaad hai tegh-e-be-rukhi yaad hai naavak-e-sitam bazm se teri ahl-e-dil ranj uThaa ke aae hain jurm thi sair-e-gulistaan jurm thaa jalva-haa-e-gul jabr ke baavajud ham gasht lagaa ke aae hain pahle bhi sar bahut kaTe pahle bhi khuun bahut bahaa ab ke magar azaab ke daur balaa ke aae hain raat kaa koi pahar hai tez havaa kaa qahr hai khauf-zada dilon mein sab harf duaa ke aae hain"

"khvaahish-o-khvaab ke aage bhi kahin jaanaa hai ishq ke baab se aage bhi kahin jaanaa hai kyuun nahin chhoDti aakhir mujhe duniyaa-daari maal-o-asbaab se aage bhi kahin jaanaa hai dene vaale tu mujhe niind na de khvaab to de mujh ko mahtaab se aage bhi kahin jaanaa hai jaane kyuun rok rahi hai mujhe ashkon ki qataar chashm-e-pur-aab se aage bhi kahin jaanaa hai kyuun lipaTtaa hai mire saath ye dariyaa aakhir mujh ko girdaab se aage bhi kahin jaanaa hai"

"aisaa ilaaj-e-habs-e-dil-e-zaar chaahiye ik dar fasil-e-jaan mein havaa-daar chaahiye ik jhiil naghma-rez ho ahl-e-safar ke saath sarsabz duur tak saf-e-ashjaar chaahiye sahraa kaf-e-tamavvuj-e-dariyaa mein ho asiir shoala havaa se bar-sar-e-paikaar chaahiye ye ruuh ek taair-e-vahshi nazhaad hai har dam safar ke vaaste tayyaar chaahiye apne farogh-e-husn ki tashhir ke liye shahzaadi-e-khayaal ko darbaar chaahiye is shahr-e-khisht-o-sang ko shishe ki chaah hai koi javaan aaina-bardaar chaahiye baazaar-e-aarzu mein kaTi jaa rahi hai umr ham ko kharid le vo kharidaar chaahiye"