Ghazal

"milo to aise ki rah jaae shaan khvaabon ki koi ghaDi to bane tarjumaan khvaabon ki jo khvaab dekhne vaale the sun rahe the use vo shakhs bol rahaa thaa zabaan khvaabon ki main kis se jaa ke kahun tere khvaab dikhlaae sanbhaal rakkhi hai kis ne kamaan khvaabon ki kabhi kabhi to ye lagtaa hai jaise duniyaa bhi bahut qadim hai ik daastaan khvaabon ki"

"qalam pe us ke nahin hai ab e'tibaar mujhe miTaa chukaa hai vo likh likh ke baar-baar mujhe agar main zakhm huun to mujh ko darmiyaan mein rakh agar main tiir huun to kar le aar-paar mujhe use pukaar rahaa thaa main apni aankhon se palaT ke dekh to letaa vo ek baar mujhe nashe ko jis kaa nasha ho vo aankh aisi hai nasha jis aankh se kahtaa hai mat utaar mujhe ye phuul taaza raheinge tiri rifaaqat ke tiraa khayaal rakhegaa sadaa-bahaar mujhe rafu ki koshishein mujh ko udheD deti hain sanbhal ke yaar na kar denaa taar taar mujhe davaa zaruri nahin kaam bhi kare 'azhar' khushi to kar ke gai aur sogvaar mujhe"

"chale aae javaan-o-pir sunne khanakti paanv ki zanjir sunne muqarrar vaqt par sab aa gae hain kisi kaa qissa-e-taakhir sunne bataao 'umr bhar kyaa ro sakoge baDe aae gham-e-shabbir sunne nishaana-baaz ko sab dekhte hain vo andhaa aa gayaa hai tiir sunne tum apne khvaab sab mahfuz rakhnaa kisi din aaeinge taa'bir sunne"

"'umr kis ki ye lag gai hai mujhe zindagi shak se dekhti hai mujhe ho gayaa huun main subh saa raushan shab se itni du'aa mili hai mujhe ab khudaaraa tu khol de aankhein apni tasvir dekhni hai mujhe aur 'aadat ye kuchh buri to nahin teri 'aadat si ho gai hai mujhe khushbuon mein rachi-basi laDki roz ik phuul bhejti hai mujhe"

"mataa'-e-zist kaa mehvar na qaid ho jaae hatheliyon mein muqaddar na qaid ho jaae main ab ki baar bahut khul ke ro nahin paayaa ye saaniha mire andar na qaid ho jaae qafas se nikle parinde ki le to luun tasvir magar rihaai kaa manzar na qaid ho jaae abhi to khushk zaminon pe log qaabiz hain phir is ke baa'd samundar na qaid ho jaae vahi dhuaan jo ugalte hain ghar ke sab afraad usi dhuein mein miraa ghar na qaid ho jaae barash uThaae hue soch mein huun gum 'azhar' tire khayaal kaa paikar na qaid ho jaae"

"jo ho na paai usi baat ki kahaani hai ye meri us ki mulaaqaat ki kahaani hai mire badan ko jo dimak lagi to kaise lagi sab intizaar ke lamhaat ki kahaani hai gharon ki baat alag hai vahaan pe khushbu hai ye rukhe sukhe makaanaat ki kahaani hai hazaar raaton pe ye phailti gai aakhir tumhein lagaa thaa bas ik raat ki kahaani hai kahin pe jashn bapaa hai kisi ki aamad kaa kisi ke aakhiri lamhaat ki kahaani hai 'ajib baat hai main khud bhi paDh nahin saktaa na jaane kaisi miri zaat ki kahaani hai"

"murakkab kuchh nahin hai sirf ik paani se bantaa hai tiraa chehra miri aankhon mein aasaani se bantaa hai koi manzar ho bas hotaa hai yuun hi 'aam saa manzar tamaasha to ai mere dost hairaani se bantaa hai hamein sab yaad hai lekin hamein sab bhuul jaanaa hai yahaan bantaa hai jo kuchh lamha-e-faani se bantaa hai bikharti hain jo vo zulfein to shab ki baat chalti hai rukh-e-subh-e-darakhshaan us ki peshaani se bantaa hai zaraa ik sochnaa aur tujh ko apne dil mein paa lenaa koi bhi kaam ho kab itni aasaani se bantaa hai"

"nahin khayaal kiyaa kuchh khudaa banaate hue main haar jaaungaa ik iltijaa banaate hue kisi ne dekhaa nahin kitni ki hai tayyaari main kitnaa royaa huun ik qahqaha banaate hue main jaantaa thaa mire baa'd log aaeinge so main guzartaa rahaa raasta banaate hue tumhaaraa shahr kisi se sukhan nahin kartaa main kaT gayaa huun yahaan raabta banaate hue ye canvas pe mire haath kyon nahin chalte tumhaare jaisaa koi dusraa banaate hue na jaane kis ne banaayaa hai kis ko kyaa maa'lum main pahlaa 'aks huaa aaina banaate hue pata chalaa ki miraa fan bhi naa-mukammal thaa bahak gayaa thaa main 'azhar' nishaan banaate hue"

"main haar jaaun use aur mujhe malaal na ho mohabbaton mein koi itnaa khasta-haal na ho har ek shai ki hai tartib ghair-maa'muli qadam baDhaate hue sochtaa huun jaal na ho ki siin vaav alif laam ab lughat mein nahin vo chaahtaa hai ki us se koi savaal na ho ye baat haq hai agar 'ishq jaavedaani hai to phir ye husn bhi kyon husn-e-laa-zavaal na ho"

"bantaa thaa din tumhaaraa kabhi dekh kar mujhe tum vaqt de rahe ho ghaDi dekh kar mujhe main agle din alag saa na lagne lagun tumhein kuchh faisla na karnaa abhi dekh kar mujhe baadal ko dekh mor kahin naachne lage yuun zulf-e-tarh-daar khuli dekh kar mujhe us ki to khair baat hi kyaa raqs mein vo thaa us ki gali bhi jhuum uThi dekh kar mujhe kohni pe haath maar ke us ne kahaa suno bal khaa rahi hai dekho nadi dekh kar mujhe"

"ziist unvaan tere hone kaa dil ko imaan tere hone kaa mujh ko har samt le ke jaataa hai ek imkaan tere hone kaa aa gayaa vaqt mere baa'd aakhir ab pareshaan tere hone kaa aankh manzar banaati rahti hai yaani saamaan tere hone kaa meraa honaa bhi ek pahlu hai haan miri jaan tere hone kaa"

"paDhiye sabaq yahi hai vafaa ki kitaab kaa kaanTe karaa rahe hain taaaruf gulaab kaa kaisaa ye intishaar diyon ki safon mein hai kuchh to asar huaa hai havaa ke khitaab kaa ye tai kiyaa jo main ne junun tak main jaaungaa ye marhala aham hai mire iztiraab kaa maanaa bahut hasin thaa vo umr kaa paDaav qissa magar na chheDiye ahd-e-shabaab kaa 'azhar' kahin se niind kaa ab kiije intizaam yunhi nikal na jaae ye mausam bhi khvaab kaa"

"niind palkon pe yuun rakhi si hai aankh jaise abhi lagi si hai apne logon kaa ek mela hai apne-pan ki yahaan kami si hai khubsurat hai sirf baahar se ye imaarat bhi aadmi si hai main huun khaamosh aur mire aage teri tasvir bolti si hai chaarasaazo miraa ilaaj karo aaj kuchh dard mein kami si hai"

"main zindagi ke saath yuun hisaab kar ke aa gayaa jo the mu'aamalaat sab kharaab kar ke aa gayaa tamaam ahl-e-shahr ki samaa'atein niDhaal thiin zabaan-daraaz main bhi thaa khitaab kar ke aa gayaa abhi vo aankh marhale mein thi ki ban sake sadaa main us ko paDh ke yuun uThaa kitaab kar ke aa gayaa rivaayaton se kab nikal sakaa main shaa'iri mein bhi nazar ko tiir chehre ko gulaab kar ke aa gayaa"

"khoe khoe se ik khayaal ke saath ji rahaa huun kisi malaal ke saath be-sabab tum paDe taraddud mein baat hi khatm thi savaal ke saath donon apne badan se bhaTke hain ek duuje ke khadd-o-khaal ke saath 'umr bhar saath apne rakkhegaa us ko chhoDaa hai is kamaal ke saath jaantaa huun 'uruj ko 'azhar' rakh diyaa jaaegaa zavaal ke saath"

"bas ek nazm thaa darkaar sab simaT jaaein main kab ye chaah rahaa thaa ki dukh bhi kaT jaaein mu'aaf kar to diyaa hai magar kaho un se vo thoDi der mire saamne se haT jaaein du'aaein bhi to ri'aayat ke saath maangi hain na gar hon mere to us ke hi din palaT jaaein khizaan-rasida sahi khil uThungaa andar se jo zard patte mire jism se lipaT jaaein main chaahtaa huun zarurat na pesh aae mujhe vo muntazir hai ki chizon ke daam ghaT jaaein"

"ghalat-fahmi thi meri jaan mujh ko tu lagti thi bahut aasaan mujh ko tire kheme mein aayaa huun nihattaa bahaadur hai to kar mehmaan mujh ko main teraa naam tak bhulaa huaa huun na ik lamhe mein yuun pahchaan mujh ko baDi shiddat se lab yaad aae us ke khilaao yaar miThaa paan mujh ko chilam huqqa mire daadaa kahaani pukaare hai vahi daalaan mujh ko"

"kuchh kharaabi nahin muqaddar mein koi mukhbir hai apne lashkar mein main to muddat se ghair-haazir huun bas miraa naam hai register mein varna ik roz mein hi saD jaaein log rakkhe hue hain frēzer mein yaad karti hain tujh ko divaarein shakl ubhar aai hai palastar mein bah rahi hai hamaari khaamoshi shor karte hue samundar mein niind ki raah dekhte honge makhmali jism narm bistar mein ek buDhiyaa kaa bojh uThaayaa thaa bas du'aaein thiin us ke gaTThar mein ye ta'aaruf nai sadi kaa hai aaina Dhal rahaa hai patthar mein kis qadar sard ye mahina hai dil bhi TuuTaa miraa december mein"

"jangal se jaate jaate yahi kaam kar diyaa ham ne har ek peD tire naam kar diyaa jab bhi tumhaari aankhein hamein yaad aai hain raushan koi charaagh lab-e-baam kar diyaa lab pe jo lab rakhe to unhein kar diyaa gulaab aankhon ko chhu liyaa to unhein jaam kar diyaa kis ne diye ki lau mein lapeTi shab-e-daraaz kis ne havaa ke zor ko naakaam kar diyaa ye pairahan bhi pahnaa hai paakizgi ke saath ham ne tumhaari yaad ko ehraam kar diyaa baalon mein us ne phuul mire naam kaa rakhaa khushbu se meraa zikr sar-e-'aam kar diyaa in khvaahishon kaa aur kyaa honaa thaa intizaam nazr-e-mizaaj-e-gardish-e-ayyaam kar diyaa 'azhar' hamaare paas koi mo'jiza nahin raavan kaa haath chumaa use raam kar diyaa"

"jab zarurat bhar nami ban jaaegi us ke honTon par hansi ban jaaegi ik diye se ik diyaa jal jaaegaa raushni se raushni ban jaaegi gham ke maare ham mileinge ek din apne milne se khushi ban jaaegi jhiil mein us ko utartaa dekh kar main ne sochaa jal-pari ban jaaegi krishn ban kar jab use sochungaa main meri dhaDkan baansuri ban jaaegi ham kabhi puure jo hone ko hue yak-ba-yak us ki kami ban jaaegi zindagi mein gar vo laDki aa gai baat maano zindagi ban jaaegi us ki aankhein yaad rah jaaein agar yaar 'azhar' shaa'iri ban jaaegi"

"fareb de ke use jitnaa gavaaraa nahin agar vo dil se hamaaraa nahin hamaaraa nahin abhi to ham ne hi us ki taraf nazar ki hai abhi to us ki taraf se koi ishaaraa nahin shab-e-siyaah tiri tirgi pe laa'nat hai shab-e-siyaah tire paas ik sitaaraa nahin use chhuaa hi nahin hai to phuul khushbu kyaa badan badan hai badan koi isti'aaraa nahin jahaan pe khulni thi apni sadaa khuli hi nahin jise pukaarnaa chaahaa use pukaaraa nahin"

"na jaane shaam ne kyaa kah diyaa savere se ujaale haath milaane lage andhere se shajar ke hisse mein bas rah gai hai tanhaai har ik parinda ravaana huaa basere se jo us ki biin ki dhun par huaa hai raqs-andaaz Thani rahi hai usi saanp ki sapere se abhi ye raushni chubhti hui hai aankhon mein abhi ham uTh ke chale aae hain andhere se tumhaaraa shahr-e-nigaaraan to khuub hai 'azhar' bachaa ke laae hain dil aarzu ke ghere se"

"silsila yuun bhi ravaa rakkhaa shanaasaai kaa koi rishta to rahe aankh se binaai kaa tabsira khuub yahaan tiir ki raftaar pe hai tazkira kaun kare zakhm ki gahraai kaa mohtaram kah ke mujhe us ne pashemaan kiyaa koi pahlu na milaa jab miri rusvaai kaa tang aa kar tiri yaadon ko pare jhaTkaa hai marsiya kaun paDhe roz ki tanhaai kaa apne zakhmon se gila hai mujhe itnaa 'azhar' main ne ehsaan uThaa rakkhaa hai purvaai kaa"

"aankh ke naam kar rahaa hai hamein shaamil-e-jaam kar rahaa hai hamein muskuraa kar kharid lo ham ko dard nilaam kar rahaa hai hamein yaar tauba karo bhale aur ham koi badnaam kar rahaa hai hamein dil mein basne ki kis liye Thaani kyon dar-o-baam kar rahaa hai hamein roz chehra bigaDtaa jaataa hai aaina khaam kar rahaa hai hamein harf-e-poshidgi bhi ab 'azhar' tasht-az-baam kar rahaa hai hamein"