Ghazal

"fazaa-e-aadmiyyat ko sanvarne hi nahin dete siyaasat-daan dilon ke zakhm bharne hi nahin dete zamaana vo bhi thaa jab haadse kaa Dar sataataa thaa magar ab haadse logon ko Darne hi nahin dete kuchh ham ne khvaab aise paal rakkhe hain ki jo ham ko haqiqat ki zamin par paanv rakhne hi nahin dete ye maanaa 'ishq se banti hai jannat zindagi lekin masaail zindagi se 'ishq karne hi nahin dete guzargaahon ke aage manzilein aavaaz deti hain magar Thahre hue lamhe guzarne hi nahin dete 'bashar' be-rahm hain ye parbaton jaise usuul apne kisi ke dil ki vaadi mein utarne hi nahin dete"

"ai sar-phiri havaa tujhe is ki khabar bhi hai tu jis taraf chali hai udhar meraa ghar bhi hai dastaar mujh se maangne vaale nazar uThaa dastaar hi nahin mire shaane pe sar bhi hai zaahir mein Thik-Thaak hai har ek aadmi andaaz-e-guftugu mein bikharne kaa Dar bhi hai teri hi khushbuon se mahakti hai rahguzar teri taraf safar bhi tu hi ham-safar bhi hai duniyaa tiri 'ajib hai mere khudaa jahaan jiine ki aarzu bhi hai marne kaa Dar bhi hai allaah se 'bashar' nahin chhuptaa kisi kaa haal kyaa hai hamaare dil mein use ye khabar bhi hai"

"kisi gum-karda-e-manzil ne hi pahre pe rakkhi hai vo ik zinda lahu ki buund jo kaanTe pe rakkhi hai jo qaatil hain vo sab mahfuz hain apne Thikaanon mein magar ik be-sahaaraa laash chauraahe pe rakkhi hai mire zakhmon ko marham ki tamanna tum se kyaa hogi ki tum ne pyaar ki buniyaad hi badle mein rakkhi hai gharon ki aag ham se bujh nahin sakti magar khush hain ki ham ne saari zimmedaari hamsaae pe rakkhi hai"

"main andheraa ek shab kaa tiraa sham' saa zamaana bhalaa kaise hogaa mumkin koi mil ke ghar basaanaa abhi aag se lipaTne kaa hunar hai mujh mein zinda abhi gardish-e-zamaana mire saamne na aanaa jahaan be-zamir andheron ne kiyaa hai khair-maqdam usi raah par charaaghon ko jalaa ke chhoD jaanaa miraa dil hai muztarib saa tiraa dil hai mutmain saa na tiraa yahaan Thikaanaa na miraa yahaan Thikaanaa main safar pe lauT jaane kaa iraada jab karun huun koi ai 'bashar' kahe hai mire shahr se na jaanaa"

"kab tak rahegaa shab kaa safar dekhnaa ye hai hai kitni duur aur sahar dekhnaa ye hai har ik qadam pe vaqt badal jaae hai yahaan kis tarh tai karoge safar dekhnaa ye hai buDhaa darakht tez havaaon ke saamne kab tak rahegaa sina-sipar dekhnaa ye hai honTon pe khil rahe hain sadaaqat ke chand phuul neze pe kab buland ho sar dekhnaa ye hai dange mein to halaak hue be-shumaar log kal kis tarah chhapegi khabar dekhnaa ye hai insaaniyat ke naam pe kab tak laDeinge ham kab tak bahegaa khun-e-'bashar' dekhnaa ye hai"

"hamin jaise binaa patvaar dariyaa paar karte hain vo kyaa maujon se Takraaeinge jo paani se Darte hain unhin ko ai vatan kyon haashiye pe rakkhaa jaataa hai tiri surat mein jo khun-e-jigar se rang bharte hain agar zinda hi rahnaa hai to rahiye apni sharton par ki khuddaari se khaali log sau sau baar marte hain ghanimat hai bachaa rakkhaa hai ham ne rang-o-khushbu ko ki ham vo phuul hain jo roz sho'lon se guzarte hain 'bashar' sach bolne vaalon ko koi kyaa Daraaegaa jo Darte hain khudaa se vo kahaan duniyaa se Darte hain"

"kaun dil kaa dard pahchaane kise aavaaz dein sochte rahte hain divaane kise aavaaz dein ik taraf andhon ki basti ik taraf patthar ke log dekhiye ab aaina-khaane kise aavaaz dein duur tak ummid ki koi kiran baaqi nahin ho chuke apne bhi begaane kise aavaaz dein aate aate meri gardan tak to khanjar aa gayaa ab mire qaatil khudaa jaane kise aavaaz dein reshmi zulfon kaa saaya to muqaddar mein nahin dhuup mein jalte hue shaane kise aavaaz dein koi basti mein bashar jaisaa nazar aataa nahin sakht uljhan mein hain viraane kise aavaaz dein"

"agar kuchh sikhnaa hai zindagi se chalo aaghaaz kar lein aaj hi se bahut majbur kar deti hai duniyaa koi martaa nahin apni khushi se hamein bhi khaak honaa hai sahar tak lipaT jaaeinge ham bhi raushni se nadi ki 'azmatein taslim lekin nadi haari hui hai tishnagi se bahut ehsaan hai urdu zabaan kaa bahut 'izzat mili hai shaa'iri se"

"siine pe kare vaar jo khanjar vahi achchhaa jo khul ke sitam Dhaae sitamgar vahi achchhaa shaanon pe rahe yaa ki rahe nok-e-sinaan par jo ghair ke aage na jhuke sar vahi achchhaa dushman hai to hamdard ki surat na milaa kar aae jo nazar duur se patthar vahi achchhaa dariyaaon ke hamraah bahe dhuup se khele dharti pe baras jaae samundar vahi achchhaa"

"apne maa'sum gunaahon ki sazaa kyaa maangein dosto tum se vafaaon kaa sila kyaa maangein haath duniyaa tire aage na kabhi phailegaa dene vaalaa hai khudaa tujh se bhalaa kyaa maangein jaan de kar bhi na mil paai kahin bu-e-vafaa hai hamein khud se gila tujh se vafaa kyaa maangein koi suraj hi nayaa nikle to din niklegaa bujh rahe hain jo diye un se ziyaa kyaa maangein us pe to saare hi darvaaze hue band 'bashar' haath uThaae to hain soche hain du'aa kyaa maangein"

"laakh kuchh na ham kahte be-zabaan rahe hote aap to ba-har-surat bad-gumaan rahe hote vo to rang le aai apne khuun ki garmi varna saare qisse mein ham kahaan rahe hote raat ke bhanvar mein hain ham charaagh ki surat saath saath hote to kahkashaan rahe hote aaj ik haqiqat hain sar-faroshiyaan apni varna ham tabaahi ki daastaan rahe hote dhuup hai masaail ki aur ik 'bashar' tanhaa kaash sar pe rishton ke saaebaan rahe hote"

"ek markaz pe simaT aai hai saari duniyaa ham tamaashaa hain tamaashaai hai saari duniyaa jashn hogaa kisi aaina-sifat kaa shaayad sang haathon mein uThaa laai hai saari duniyaa vo khudaa to nahin lekin hai khudaa kaa banda jis ki aavaaz se tharraai hai saari duniyaa vo bhi duniyaa ke liye chhoD rahaa hai mujh ko main ne jis ke liye Thukraai hai saari duniyaa kyuun nigaahon mein khaTaktaa hai nizaam-e-qudrat kyuun baghaavat pe utar aai hai saari duniyaa maut ko dost banaanaa hi munaasib hai 'bashar' zindagi ki to tamannaai hai saari duniyaa"

"aaina kaun hai kuchh pataa to chale be-khataa kaun hai kuchh pataa to chale kis taraf se ye patthar idhar aae hain aashnaa kaun hai kuchh pataa to chale bevafaai kaa ilzaam ham par sahi bevafaa kaun hai kuchh pataa to chale sab ke chehre hain jaise luTaa kaarvaan rahnumaa kaun hai kuchh pataa to chale"

"sar uThaa ke mat chaliye aaj ke zamaane mein jaan jaati rahti hai hausla dikhaane mein kis se haq talab kiije bevafaa zamaane mein honTh suukh jaate hain haal-e-dil sunaane mein haath ki lakiron se faisle nahin hote azm kaa bhi hissa hai zindagi banaane mein kho gae kahaan mere eatibaar ke rishte kis ne bo diye kaanTe phuul se gharaane mein manzilon ki baatein to khvaab jaisi baatein hain umr biit jaati hai raasta banaane mein ai 'bashar' miri aankhein jugnuon ki aadi thiin kis ne bijliyaan rakh diin mere aashiyaane mein"

"fazaa-e-aadmiyyat ko sanvarne hi nahin dete siyaasat-daan dilon ke zakhm bharne hi nahin dete zamaana vo bhi thaa jab haadse kaa Dar sataataa thaa magar ab haadse logon ko Darne hi nahin dete kuchh aise khvaab ham ne paal rakkhe hain ki jo ham ko haqiqat ki zamin par paanv dharne hi nahin dete ye maanaa 'ishq se banti hai jannat zindagi lekin masaail zindagi ke 'ishq karne hi nahin dete guzargaahon ke aage manzilein aavaaz deti hain magar Thahre hue lamhe guzarne hi nahin dete 'bashar' be-rahm hain ye parbaton jaise usuul apne kisi ke dil ki vaadi mein utarne hi nahin dete"