Ghazal

"aankhon ke khvaab dil ki javaani bhi le gayaa vo apne saath meri kahaani bhi le gayaa kham-cham tamaam apnaa bas ik us ke dam se thaa vo kyaa gayaa ki aag bhi paani bhi le gayaa TuuTaa taalluqaat kaa aaina is tarah aks-e-nashaat-e-lamaha-e-faani bhi le gayaa kuche mein hijraton ke huun sab se alag-thalag bichhDaa vo yuun ki rabt-e-makaani bhi le gayaa the sab usi ke lams se jal-thal bane hue dariyaa muDaa to apni ravaani bhi le gayaa ab kyaa khulegi munjamid alfaaz ki girah vo himmat-e-kashud-e-maaani bhi le gayaa sar-joshi-e-qalam ko 'fazaa' chup si lag gai vo jaate jaate shola-bayaani bhi le gayaa"

"zamin chikh rahi hai ki aasmaan giraa ye kaisaa bojh hamaare badan pe aan giraa bahut sambhaal ke rakh be-sabaat lamhon ko zaraa jo sanki havaa ret kaa makaan giraa is aaine hi mein logon ne khud ko pahchaanaa bhalaa huaa ki main chehron ke darmiyaan giraa rafiq-e-samt-e-safar hogi jo havaa hogi ye soch kar na safine kaa baadbaan giraa main apne ahd ki ye taazgi kahaan le jaaun ik ek lafz qalam se lahuluhaan giraa qarib o duur koi shola-e-navaa bhi nahin ye kin andheron mein haathon se shama-daan giraa 'fazaa' ko toD to pheinkaa havaaon ne lekin ye phuul apni hi shaakhon ke darmiyaan giraa"

"saraab-e-jism ko sahraa-e-jaan mein rakh denaa zaraa si dhuup bhi is saaebaan mein rakh denaa tujhe havas ho jo mujh ko hadaf banaane ki mujhe bhi tiir ki surat kamaan mein rakh denaa shikast khaae hue hauslon kaa lashkar huun uThaa ke mujh ko saf-e-dushmanaan mein rakh denaa jadid naslon ki khaatir ye varsa kaafi hai mire yaqin ko hisaar-e-gumaan mein rakh denaa ye mauj taa-ki safine ko garm-rau rakkhe kuchh aag khema-e-aab-e-ravaan mein rakh denaa bahut tavil hai kaale samundaron kaa safar mujhe havaa ki jagah baadbaan mein rakh denaa main apne zimme kisi kaa hisaab kyuun rakkhun jo nafaa hai use jaib-e-ziyaan mein rakh denaa"

"chand saansein hain miraa rakht-e-safar hi kitnaa chaahiye zindagi karne ko hunar hi kitnaa chalo achchhaa hi huaa muft luTaa di ye jins ham ko miltaa sila-e-husn-e-nazar hi kitnaa kyaa pighaltaa jo rag-o-pai mein thaa yakh-basta lahu vaqt ke jaam mein thaa shola-e-tar hi kitnaa kis khataa par ye uThaanaa paDi raaton ki salib ham ne dekhaa thaa abhi khvaab-e-sahar hi kitnaa ham bhi kuchh der ko chamke the ki bas raakh hue sach to ye hai ki ram-o-raqs-e-sharar hi kitnaa tarz-e-ehsaas mein nudrat thi udhar hi kitni fikr-o-jazabe mein tavaazun hai idhar hi kitnaa de diye khusrav-o-shirin ne use moD kai varna yuun faasla-e-tisha-o-sar hi kitnaa teraa irfaan tu kyaa khud ko na pahchaan sakaa thaa miraa daara-e-ilm-o-khabar hi kitnaa yak qadam besh nahin shab ki masaafat lekin ek TuuTe hue taare kaa safar hi kitnaa ai 'fazaa' daaman-e-alfaaz hai ab bhi khaali thaa yahaan shaakh-e-maaani pe samar hi kitnaa"

"udaas dekh ke vajh-e-malaal puchhegaa vo mehrbaan nahin aisaa ki haal puchhegaa javaab de na sakoge palaT ke maazi ko ik ek lamha vo chubhte savaal puchhegaa dilon ke zakhm dahan mein zabaan nahin rakhte to kis se zaaiqa-e-indimaal puchhegaa kabhi to laa ke milaa mujh se mere qaatil ko jo sar hai dosh pe tere vabaal puchhegaa ye kyaa khabar thi ki siine ke daagh lau deinge koi jo mehnat-e-fan kaa maaal puchhegaa tu harf-e-ishq-o-basirat hai lab na si apne zamaana tujh se bhi teraa khayaal puchhegaa mujhe taraash ke rakh lo ki aane vaalaa vaqt khazaf dikhaa ke guhar ki misaal puchhegaa banaa ke phuul ki khushbu phiraaegi sadiyon havaa se kaun rah-e-e'tidaal puchhegaa ye ek pal jo hai majhul shakhs ki surat mizaaj-e-aagahi-e-maah-o-saal puchhegaa yahaan taayyun-e-aqdaar bhi zaruri hai khud apne mushk ki qimat ghazaal puchhegaa miraa qalam abdiyat ki raushni hai 'fazaa' is aaftaab ko ab kyaa zavaal puchhegaa"

"chehra saalim na nazar hi qaaem be-sutun sab ki haveli qaaem haath se maujon ne rakh di patvaar kaise dhaare pe hai kashti qaaem ziist hai kachche ghaDe ke maanind bahte paani pe hai miTTi qaaem saae divaar ke TeDhe tirchhe aur divaar ki sidhi qaaem sab hain TuuTi hui qadron ke khanDar kaun hai vaz' pe apni qaaem khud ko kis sath pe zinda rakkhun lafz daaim hain na maa'ni qaaem hai baDi baat jo rah jaae 'fazaa' sath-e-sanjida-nigaahi qaaem"

"jabin pe gard hai chehra kharaash mein Duubaa huaa kharaab jo apni talaash mein Duubaa qalam uThaayaa to sar par kulaah-e-kaj na rahi ye shahryaar bhi fikr-e-maaash mein Duubaa jhale hai pankhaa ye zakhmon pe kaun aaTh pahar milaa hai mujh ko nafas irtiaash mein Duubaa ise na kyuun tiri dildaari-e-nazar kahiye vo neshtar jo dil-e-paash-paash mein Duubaa 'fazaa' hai khaaliq-e-subh-e-hayaat phir bhi gharib kahaan kahaan na ufuq ki talaash mein Duubaa"

"harf-o-alfaaz-o-ma’aani ke hijaabon mein na thi baat chehron par jo likkhi thi kitaabon mein na thi 'umr guzri apne hi ghar kaa bayaabaan chhaante dilkashi itni to chamkile saraabon mein na thi main thaa apne 'ahd ki sachchaaiyon kaa vo savaal jis ko rad karne ki gunjaaish javaabon mein na thi ab huaa maa'lum tere shahr se hijrat ke baa'd kyaa kharaabi thi jo ham khaana-kharaabon mein na thi ungliyon ki ye jaraahat ye qalam ki khastagi kab hamaari zindagi aise ‘azaabon mein na thi kar rahaa huun kaarobaar-e-she'r mein apne ko kharch varna aisi mad koi ghar ke hisaabon mein na thi ye bhi she’ri tajrabon kaa ik tasalsul hai 'fazaa' ab ghazal jaisi hai vo kitnon ke khvaabon mein na thi"

"lahu hamaari jabin kaa kisi ke chehre par ye rup-ras bhi sahi zindagi ke chehre par abhi ye zakhm-e-masarrat hai naa-shagufta saa chhiDak do mere kuchh aansu hansi ke chehre par navaa ki gard huun mujh ko sameT kar le jaa bikhar na jaaun kahin khaamushi ke chehre par is inqilaab pe kis ki nazar gai hogi ghamon ki dhuup khili hai khushi ke chehre par hazimaton ke kis amboh mein hain gum ham log koi vaqaar nahin aadmi ke chehre par kharaash-e-dard kaa aaina huun mujhe dekho ye baankpan bhi kahaan hai kisi ke chehre par bahut haris hain dida-varaan-e-chehra 'fazaa' naqaab Daal ke chal aagahi ke chehre par"

"tujh bin pyaaraa pyaaraa mausam hai kitnaa bechain shaakhein larzaan khushbu hairaan aur havaa bechain kho gai hirni jaisi aankhon vaali us ki gaae jangal jangal ghumne vaalaa banjaaraa bechain giili giili lakDi jaisi sulge man ki pyaas apni maujon mein rah kar bhi hai dariyaa bechain us ko bhi lo piine paD gae kaDve kaDve ghunT ras-bhare nainaa miThi chitvan aur sapnaa bechain baagh mein jhulaa Daal ke jhule sakhi saheli sang jab pardesi ki yaad aae ho manvaa bechain galiyon galiyon ghume machhli apnaa bhaav bataae jaal mein uljhaa uljhaa maanjhi be-chaaraa bechain narm kanval saa ang dukhon ki jhiil mein Duubaa jaae niir ki piiDaa jaagi to vo aur huaa bechain gir gayaa jholi se jo khat thaa ik gori ke naam khat pardes se laane vaalaa harkaara bechain kin kheton mein kho gae us ke chaandi jaise paanv gaanv ki pagDanDi tak jaa kar hai rasta bechain kitni aankhein aisi hain jo samjhein us ke bol aanchal aanchal mahkaa mahkaa sandesaa bechain gaagar kaa paani chhalke to pallu bhigaa jaae aise mein man ki agni ne aur kiyaa bechain be-tartib badan se soe chhat par gahri niind puuri raat aakaash ke uupar chaand rahaa bechain donon Thahre man ke rasile apne apne bhaag vo albeli chanchal titli main bhaunraa bechain ghar se panghaT kitni duuri chaunke aur ruk jaae apni bagiyaa se nikli to hai chiDiyaa bechain dekhein kis kis ghaaT phiraae us ko meri pyaas sar par kHaali gaagar rakkhe hai raadhaa bechain 'inshaa' ji ki yaad mein likkhe ham ne bhi kuchh sher 'faizi' us ke sog mein aakhir kaun na thaa bechain"

"savaal sakht thaa dariyaa ke paar utar jaanaa vo mauj mauj magar khud miraa bikhar jaanaa ye kyaa khabar tumhein kis ruup mein huun zinda main mile na jism to saae ko qatl kar jaanaa paDaa huun yakh-zada sahraa-e-aagahi mein hunuz mire vajud mein thoDi si dhuup bhar jaanaa kabhi to saath ye aasib-e-vaqt chhoDegaa khud apne saae ko bhi dekhnaa to Dar jaanaa jo chaahte ho sahar ko nai zabaan mile to pichhli shab ke charaaghon ko qatl kar jaanaa hamaare ahd kaa har zehn to nahin jaamid kisi daricha-e-ehsaas se guzar jaanaa 'fazaa' tujhi ko ye saffaaki-e-hunar bhi mili ik ek lafz ko yuun be-libaas kar jaanaa"

"jurat-e-izhaar se rokegi kyaa maslahat meraa qalam chhinegi kyaa main musaafir din ki jalti dhuup kaa raat meraa dard pahchaanegi kyaa be-karaan huun main samundar ki tarah mauj-e-shabnam qad miraa naapegi kyaa chal paDaa huun sar pe le kar aasmaan paanv ke niche zamin Thahregi kyaa shahr-e-gul ki rahne vaali aagahi mire zakhmon ki zabaan samjhegi kyaa chehraa chehraa aalm-e-be-chehragi dekh kar bhi zindagi dekhegi kyaa main to logo sah luun har patthar kaa jabr vaqt ki shishagari sochegi kyaa hasraton ki aanch mein is ko tapaa yuun badan ki tirgi pighlegi kyaa nutq se lab tak hai sadiyon kaa safar khaamushi ye dukh bhalaa jhelegi kyaa kyaa tavaqqo kor-zehnon se 'fazaa' koelon se raushni phuTegi kyaa"

"har ik qayaas haqiqat se dur-tar niklaa kitaab kaa na koi dars mo'tabar niklaa nafas tamaam huaa daastaan khatm hui jo thaa tavil vahi harf mukhtasar niklaa jo gard saath na uDti safar na yuun kaTtaa ghubaar-e-raahguzar mauj-e-baal-o-par niklaa mujhe bhi kuchh nae teshe sambhaalne hi paDe puraane khol ko jab vo bhi toD kar niklaa fazaa kushaada nahin qatl-gaah ki ye kahaan mire lahu kaa parinda uDaan par niklaa vo aadmi ki jo mahmil thaa aaftaabon kaa ba-qadr-e-yak-do kaf-e-khaak-e-rahguzar niklaa ye raat jis ke liye main ne jaag kar kaaTi milaa vo shakhs to khvaabon kaa ham-safar niklaa uDhaa di chaadar-e-ismat ise khayaalon ne har ek lafz zabaan se barahna-sar niklaa 'fazaa' tum uljhe rahe fikr o falsafe mein yahaan ba-naam-e-ishq vahaan qura-e-hunar niklaa"

"iqraa ki saughaat ki surat aa honTon par aayaat ki surat aa suukh chale hain aangan ke paude be-mausam barsaat ki surat aa shaakh-e-yaqin ki be-samari aur main baar-aavar shubhaat ki surat aa main parvarda tira-bakhti kaa mere ghar to raat ki surat aa main apni tahdid mein huun mashghul aa tausi-e-zaat ki surat aa fikr ke tira-khaane raushan kar lau dete jazbaat ki surat aa raas aae mujh ko ujiyaale kab mubham imkaanaat ki surat aa"

"main hi ik shakhs thaa yaaraan-e-kuhan mein aisaa kaun aavaara phiraa kucha-e-fan mein aisaa ham bhi jab tak jiye sarsabz hi sarsabz rahe vaqt ne zahr utaaraa thaa badan mein aisaa zindagi khud ko na is ruup mein pahchaan saki aadmi lipTaa hai khvaabon ke kafan mein aisaa har khizaan mein jo bahaaron ki gavaahi degaa ham bhi chhoD aae hain ik shola chaman mein aisaa log mujh ko mire aahang se pahchaan gae kaun badnaam rahaa shahr-e-sukhan mein aisaa apne mansuron ko is daur ne puchhaa bhi nahin paD gayaa rakhna saf-e-daar-o-rasan mein aisaa hai tazaadon bhari duniyaa bhi ham-aahang bahut faasla to nahin kuchh sang o saman mein aisaa vaqt ki dhuup ko maathe kaa pasina samjhaa main sharaabor rahaa dil ki jalan mein aisaa tum bhi dekho mujhe shaayad to na pahchaan sako ai miri raato mein Duubaa huun gahan mein aisaa"

"aah ko baad-e-sabaa dard ko khushbu likhnaa hai bajaa zakhm-e-badan ko gul-e-khud-ru likhnaa dard bhigi hui raaton mein chamak uTThaa hai ham ko likhnaa hai to barsaat kaa jugnu likhnaa khvaab Takraa ke haqaaeq se hue sad-paara ab inhein aankh se Dhalke hue aansu likhnaa tu ne sulataani-e-jamhur badal diin qadrein aaj farhaad ko mushkil nahin khusrav likhnaa ab munaasib nahin ham-asr ghazal ko yaaro kisi bajti hui paazeb kaa ghunghru likhnaa hunar-afshaani-e-khaama ko duaa do ki 'fazaa' lafz ko sahl huaa naafa-e-aahu likhnaa"

"mujhe manzur kaaghaz par nahin patthar pe likh denaa haTaa kar mujh ko tum manzar se pas-manzar pe likh denaa khabar mujh ko nahin main jism huun yaa koi saayaa huun zaraa is ki vazaahat dhuup ki chaadar pe likh denaa usi ki diid se mahrum jis ko dekhnaa chaahun miri aankhon ko us ke khvaab-gun paikar pe likh denaa isi miTTi kaa ghamza hain maaarif sab haqaaeq sab jo tum chaaho to is jumle ko lauh-e-zar pe likh denaa bahut naazuk hain mere sarv qaamat teghzan logo hazimat khurdgi meri saf-e-lashkar pe likh denaa kabhi main bhi uDaanein bharne vaalaa thaa bahut unchi miri pahchaan isi TuuTe hue shahpar pe likh denaa saraabon ke safar se tu nahin lauTaa 'fazaa' ab tak jo khat likhnaa to itni baat us ke ghar pe likh denaa"

"ghazal ke parde mein be-parda khvaahishein likhnaa na aayaa ham ko barahna guzaarishein likhnaa tire jahaan mein huun be-saaya abr ki surat mire nasib mein be-abr baarishein likhnaa hisaab-e-dard to yuun sab miri nigaah mein hai jo mujh pe ho na sakin vo navaazishein likhnaa kharaashein chehre ki siine ke zakhm suukh chale kahaan hain naakhun-e-yaaraan ki kaavishein likhnaa ham ek chaak hain jo kuza-gar ke haath mein hai hamaaraa kaam zamaane ki gardishein likhnaa ba-raah-e-raast koi farz adaa nahin hotaa vahi sifaarishein sunnaa sifaarishein likhnaa huaa na ye bhi saliqe se zindagi karte har ek saans ko naakaam koshishein likhnaa kahaan vo log jo the har taraf se nastaaliq puraani baat hui chust bandishein likhnaa hunar-varo zaraa kuchh din ye turfagi bhi sahi hamaare lafzon ko maa'ni ki laghzishein likhnaa kabhi jo khat use likhnaa 'fazaa' to rakhnaa yaad miri taraf se bhi kuchh nek khvaahishein likhnaa"

"na daamanon mein yahaan khaak-e-rahguzar baandho misaal nikhat-e-gul mahmil-e-safar baandho is aaine mein koi aks yuun na ubhregaa nazar se silsila-e-daanish-e-nazar baandho jo saahibaan-e-basirat the be-libaas hue fazilaton ki ye dastaar kis ke sar baandho safir-e-jaan huun hisaar-e-badan mein kyaa Thahrun chaman-parasto na khushbu ke baal-o-par baandho na TuuT jaae ki naazuk hai rishta-e-anfaas tanaab-e-khema-e-hasti sambhaal kar baandho kahaan har ek shanaavar guhar ba-kaf niklaa samundaron se tavaqqo na is qadar baandho har ek haath mein hai sang sad-hazaar-aashob phir aise vaqt mein shaakhon se kyuun samar baandho namak chhiDakte raho ye bhi hai masihaai ye kyaa zaruri ki marham hi zakhm par baandho phire hai kab se pareshaan ye zakhm-khurda hiran junun ko dasht se le jaa ke apne ghar baandho gayaa vo daur ki jab barf barf the alfaaz girah mein ab ye dahakte hue sharar baandho adab nahin hai rayaazi kaa masala yaaro har ek shakhs pe kyuun tohmat-e-hunar baandho ye sinf aabru-e-fann-e-shaairi hai 'fazaa' ghazal kaho to mazaamin mo'atabar baandho"

"chehra rakhte hain ham phir bhi khush hain bahut toD kar aaine 'aks ki maa’naviyyat samajhte bhi kyaa kam-hunar aaine jaa ke kis duur ke des mein jaa base jo adaa-fahm the ham ne patthar kharide tire shahr mein bech kar aaine khaal-o-khat ke varaq lamha-e-rafta kab kaa churaa le gayaa kyaa chhupaate hain ab meri be-chehragi ki khabar aaine us ki aavaargi ko du'aaein do ai saahibaan-e-junun jis ke naqsh-e-qadam ne bichhaae sar-e-rahguzar aaine thiin jo maa'ni ki maanus si suratein vo kahaan kho gaiin dhund mein lipTe lipTe hain alfaaz ke mo'tabar aaine kaise aashob-e-daanish pe rakhtaa nazar main kam-aagaah thaa de gayaa mujh ko aankhon ke badle koi be-basar aaine apni aavaaz ko naqsh mein Dhaalne kaa hunar siikh lo tum se milne ko bhaTke hain kyaa kyaa 'fazaa' dar-ba-dar aaine"

"sab ko khvaabon ke na aivaan mein rakh main haqiqat huun mujhe dhyaan mein rakh raahzan phirte hain basti basti ghar kaa sarmaaya bayaabaan mein rakh shab-paraston ki hai duniyaa pyaare apne suraj ko garebaan mein rakh kyaa karegaa tu ye muTThi-bhar dhuup aag siine ke khiyaabaan mein rakh be-sadaa qarya-e-ehsaas huaa ungliyaan ab na yahaan kaan mein rakh kisi dastak kaa ujaalaa na sahi shama yaadon ki to daalaan mein rakh farhat-angez hai baahar ki havaa khiDkiyaan zehn ke aivaan mein rakh hai dar-o-bast-e-maaani in se malaka lafzon ki pahchaan mein rakh shahr-taa-shahr hai zakhmon kaa paDaav apnaa khema abhi maidaan mein rakh ai 'fazaa' lai kaa ye shoala na bujhe itnaa aahang to auzaan mein rakh"

"khulus de ke sazaa-vaar nafraton kaa huaa na puchh hashr jo pichhli rafaaqaton kaa huaa hanse to paD gaiin chehre pe kuchh kharaashein aur shikaar khanda-e-lab kin jaraahaton kaa huaa kahoge kyaa jo tumhaaraa vo haal puchhegaa ki paara-paara garebaan shikaayaton kaa huaa vo khun-e-dil hi sahi kuchh qalam se Tapkaa to chalo nuzul to ham par bhi rahmaton kaa huaa hisaar-e-harf-o-hunar toD kar nikal jaaun kahaan pahunch ke khayaal apni vusaton kaa huaa chalaa thaa main ki nai aagahi pe kuchh likhkhun tamaam silsila barham ibaaraton kaa huaa tu ek lafz hai maani pe khud dalaalat kar rahaa bikhar ke jo khugar vazaahaton kaa huaa baDaa hunar hai saliqe se baat kahnaa bhi 'fazaa' ke baad hi itmaam hujjaton kaa huaa"

"bahut jumud thaa be-hauslon mein kyaa kartaa na lagti aag to main jangalon mein kyaa kartaa ik imtihaan-e-vafaa hai ye umr bhar kaa azaab khaDaa na rahtaa agar zalzalon mein kyaa kartaa ho chob giili to aakhir jalaae kaun us ko main tujh ko yaad bujhe valvalon mein kyaa kartaa miri tamaam haraarat zamin kaa virsa hai ye aaftaab tire baadalon mein kyaa kartaa ab is qadar bhi taraf-daar main nahin us kaa himaayat us ki ghalat-faislon mein kyaa kartaa ye log vo hain jo be-jurm sangsaar hue harif rah ke tire manchalon mein kyaa kartaa main us ke chehre ki rangat nahin jo uD na sakun sameT kar vo mujhe aanchalon mein kyaa kartaa adab se raabta daanish kaa jaantaa hi nahin ulajh ke vo bhi mire masalon mein kyaa kartaa na raas aai kabhi mujh ko bazm-e-kam-nazaraan 'fazaa' bhi baiTh ke in paagalon mein kyaa kartaa"

"bisaat-e-daanish-o-harf-o-hunar kahaan kholein ye sochte hain lab-e-mo'tabar kahaan kholein ajab hisaar hain sab apne gird khinche hue vajud ki vahi divaar dar kahaan kholin paDaav Daalein kahaan raaste mein shaam hui bhanvar hain saamne rakht-e-safar kahaan kholein yahaan shuur ke naakhun to ham bhi rakhte hain magar ye uqda-e-fikr-o-nazar kahaan kholein na is ke saath hamaaraa bhi mol hone lage hain kashmakash mein ki musht-e-guhar kahaan kholein havaa hai tez na is ke varaq uDaa le jaae sahifa-e-nafas-e-mukhtasar kahaan kholein bachaaein aabru jismon ki bhiiD mein kaise hai kholni girah-e-jaan magar kahaan kholein koi 'fazaa' to mile ham ko qaabil-e-parvaaz ab in hadon mein bhalaa baal-o-par kahaan kholein"