Ghazal

"lagegaa ajnabi ab kyon na shahr bhar mujh ko bachaa gayaa hai nazar tu bhi dekh kar mujh ko main ghuum phir ke usi samt aa nikaltaa huun jakaD rahi hai tire ghar ki rahguzar mujh ko jhulas rahaa hai badan zer-e-saaya-e-divaar bulaa rahaa hai koi dasht-e-be-shajar mujh ko main sang-dil huun tujhe bhultaa hi jaataa huun main hans rahaa huun to mil ke udaas kar mujh ko main dekhtaa hi rahungaa tujhe kinaare se tu DhunDhtaa hi rahegaa bhanvar bhanvar mujh ko bani hain tund havaaon ki zard divaarein uDaa rahaa hai magar shoala-e-safar mujh ko banaa diyaa hai niDar ziddi khvaahishon ne 'nasim' khud e'timaad na thaa apne aap par mujh ko"

"ban gayaa hai jism guzre qaafilon ki gard saa kitnaa viraan kar gayaa mujh ko miraa hamdard saa kyaa abhi tak us kaa rasta rokti hai koi soch mere haathon mein hai us kaa haath lekin sard saa is tarah ghul-mil gayaa aa kar nae maahaul mein vo bhi ab lagtaa hai mere ghar kaa hi ik fard saa jazb thaa jaise koi suraj hi us ke jism mein duur se vo sang lagtaa thaa ba-zaahir sard saa aaj tak aankhon mein hai manzar bichhaDne kaa 'nasim' pairahan melaa saa us kaa aur chehraa zard saa"

"mishal-e-ummid thaamo rahnumaa jaisaa bhi hai ab to chalnaa hi paDegaa raastaa jaisaa bhi hai kis liye sar ko jhukaaein ajnabi ke saamne us se ham vaaqif to hain apnaa khudaa jaisaa bhi hai kis ko fursat thi hujum-e-shauq mein jo sochtaa dil ne us ko chun liyaa vo bevafaa jaisaa bhi hai saari duniyaa mein vo mere vaaste bas ek hai phuul saa chehra hai vo yaa chaand saa jaisaa bhi hai fasl-e-gul mein bhi dikhaataa hai khizaan-dida-darakht TuuT kar dene pe aae to ghaTaa jaisaa bhi hai"

"mire nuqush tire zehn se miTaa degaa miraa safar hi mire faasle baDhaa degaa andheri raat hai is tund-khu se mat kahnaa vo raushni ke liye apnaa ghar jalaa degaa main us kaa sab se huun pyaaraa magar bichhaDte hi vo sab ko yaad karegaa mujhe bhulaa degaa banaa huaa huun main mujrim baghair jurm kiye ab aur kyaa miraa munsif mujhe sazaa degaa ugaayaa jis ne hai banjar zamin mein tujh ko 'nasim' hai kyaa baiid ki vo phuul bhi khilaa degaa"

"sazaa hi di hai duaaon mein bhi asar de kar zabaan le gayaa meri mujhe nazar de kar khud apne dil se miTaa di hai khvaahish-e-parvaaz uDaa diyaa hai magar us ko apne par de kar nikal paDe hain sabhi ab panaah-gaahon se guzar gai hai siyah shab gham-e-sahar de kar use main apni safaai mein kyaa bhalaa kahtaa vo puchhtaa thaa jo mohlat bhi mukhtasar de kar pukaartaa huun ki tanhaa main rah gayaa huun 'nasim' kahaan gayaa hai vo mujh ko miri khabar de kar"

"phuul gaalon ko to aankhon ko kanval kahtaa rahaa jang thi baahar gali mein main ghazal kahtaa rahaa mar rahe the rafta rafta mere sab mahsur dost aur main masjid mein rabb-e-lam-yazal kahtaa rahaa shaaeri ki aur nazar-andaaz ki bachchon ki bhuuk chaand ko roTi kaa main nemul-badal kahtaa rahaa aa paDaa dil par mire aakhir miraa kohna vajud roz dastak de ke is ghar se nikal kahtaa rahaa aa gai aakhir mire sar par mire dushman ki fauj main bhi tayyaari karungaa aaj-kal kahtaa rahaa tai na kar paayaa kabhi apnaa tashakhkhus hi 'nasim' aab-e-zamzam ko hamesha gangaa-jal kahtaa rahaa"

"vo milaa mujh ko na jaane khol kaisaa oDh kar raushni gum ho gai apnaa hi saayaa oDh kar niind se bojhal hain patte unghte se peD hain shahr soyaa hai khamoshi kaa labaada oDh kar DhunDhtaa phirtaa thaa main har shakhs ke asli nuqush log milte the mujhe chehre pe chehraa oDh kar munjamid saa ho gayaa huun khunki-e-ehsaas se dhuup bhi nikli hai lekin tan pe kapDaa oDh kar rang saare dho gayaa hai raat kaa baadal 'nasim' aur ghar nange hue paani barastaa oDh kar"

"hai justuju agar is ko idhar bhi aaegaa nikal paDaa hai to phir mere ghar bhi aaegaa tamaam 'umr kaTegi yunhi saraabon mein vo saamne bhi na hogaa nazar bhi aaegaa jo gham huaa hai nae shahr ke makaanon mein vo dekhne ko kabhi ye khanDar bhi aaegaa rachi hai mere badan mein tamaam din ki thakan abhi to raat kaa lambaa safar bhi aaegaa zaraa si der mein har shai chamak uThegi 'nasim' sahar hui hai to nur-e-sahar bhi aaegaa"

"apnaa saaraa bojh zamin par pheink diyaa tujh ko khat likkhaa aur likh kar pheink diyaa khud ko saakin dekhaa Thahre paani mein jaane kyaa kuchh soch ke patthar pheink diyaa divaarein kyuun khaali khaali lagti hain kis ne sab kuchh ghar se baahar pheink diyaa main to apnaa jism sukhaane niklaa thaa baarish ne phir mujh pe samundar pheink diyaa vo kaisaa thaa us ko kahaan par dekhaa thaa apni aankhon ne har manzar pheink diyaa"

"jilaa-vatan huun miraa ghar pukaartaa hai mujhe udaas naam khulaa dar pukaartaa hai mujhe kisi ki chaap musalsal sunaai deti hai safar mein koi baraabar pukaartaa hai mujhe sadaf huun lahrein dar-e-jism khaTkhaTaati hain kanaar-e-aab vo gauhar pukaartaa hai mujhe har ek moD mire paanv se lipaTtaa hai har ek miil kaa patthar pukaartaa hai mujhe phansaa huaa hai mire haath ki lakiron mein miraa humaa-e-mqaddar pukaartaa hai mujhe na jaane kyaa thaa ki main duriyon mein kho aayaa vo apne paas bulaa kar pukaartaa hai mujhe chali hai shaam-e-shafaq-rang baadbaan le kar dabiz shab kaa samundar pukaartaa hai mujhe paron kaa bojh jhaTak kar main uD gayaa huun 'nasim' zamin par miraa paikar pukaartaa hai mujhe"

"yuun hai tiri talaash pe ab tak yaqin mujhe jaise tu mil hi jaaegaa phir se kahin mujhe main ne to jo bhi dil mein thaa chehre pe likh liyaa tu hai ki ek baar bhi paDhtaa nahin mujhe Dhalte hi shaam TuuT paDaa sar pe aasmaan phir meraa bojh le gayaa zer-e-zamin mujhe taabir jaagti hui aankhon ko kyaa mile ik khvaab bhi to shab ne dikhaayaa nahin mujhe kanda hai meraa naam jahaan aaj bhi 'nasim' pahchaante nahin usi ghar ke makin mujhe"

"suraj nae baras kaa mujhe jaise Das gayaa tujh se mile hue mujhe ye bhi baras gayaa bahti rahi nadi mire ghar ke qarib se paani ko dekhne ke liye main taras gayaa milne ki khvaahishein sabhi dam toDti gaiin dil mein kuchh aise khauf bichhaDne kaa bas gayaa divaar o dar jhulaste rahe tez dhuup mein baadal tamaam shahr se baahar baras gayaa talvon mein narm ghaas bhi chubhne lagi 'nasim' sahraa kuchh is tarah mire pairon mein bas gayaa"

"kisi ke haq mein sahi faisla huaa to hai miraa nahin vo kisi shakhs kaa huaa to hai yahi bahut hai ki us ne mujhe bhi miss to kiyaa ye lams mujh mein abhi tak rachaa huaa to hai use main khul ke kabhi yaad kar to saktaa huun mujhe khushi hai vo mujh se judaa huaa to hai sukut-e-shab hi sahi meraa ham-safar lekin mire sivaa bhi koi jaagtaa huaa to hai ghuTan ki baDhti chali jaa rahi hai andar ki tamaam khush hain ki mausam khulaa huaa to hai ye aur baat ki main zinda rah gayaa huun 'nasim' har ik sitam miri jaan par ravaa huaa to hai"

"gire hain lafz varaq pe lahu lahu ho kar mahaaz-e-zist se lauTaa huun surakh-ru ho kar usi ki diid ko ab raat din taDapte hain ki jis se baat na ki ham ne du-badu ho kar bujhaa charaagh hai dil kaa vagarna kaise mujhe nazar na aaegaa vo mere chaar su ho kar ham apne aap hi mujrim hain apne munsif bhi khud e'tiraaf karein apne ru-ba-ru ho kar us ek khvaahish-e-dil kaa pataa chalaa na use jo darmiyaan mein rahi sirf guftugu ho kar main sab mein rahte hue kis tarah bhulaaun tujhe har ek shakhs hi miltaa hai mujh ko tu ho kar ab us ke saamne jaate hue bhi Dartaa huun bhulaa diyaa thaa jise mahv-e-justuju ho kar hui na jazb zamin mein to raat ki baarish fazaa mein phail gai khaak rang-o-bu ho kar miTaa jo aankh ke shishon se us kaa aks 'nasim' ragon mein phail gayaa khuun ki aarzu ho kar"

"is qadar bhi to na jazbaat pe qaabu rakkho thak gae ho to mire kaandhe pe baazu rakkho bhulne paae na is dasht ki vahshat dil se shahr ke biich raho baagh mein aahu rakkho khushk ho jaaegi rote hue sahraa ki tarah kuchh bachaa kar bhi to is aankh mein aansu rakkho raushni hogi to aa jaaegaa rah-rav dil kaa us ki yaadon ke diye taaq mein har-su rakkho yaad aaegi tumhaari hi safar mein us ko us ke rumaal mein ik achchhi si khushbu rakkho ab vo mahbub nahin apnaa magar dost to hai us se ye ek taalluq hi bahar-su rakkho"

"raat ko baahar akele ghumnaa achchhaa nahin chhoD aao us ko ghar tak raastaa achchhaa nahin ghair ho koi to us se khul ke baatein kijiye doston kaa doston se hi gila achchhaa nahin ittifaaqan mil gayaa to puchh lo mausam kaa haal kyuun nahin miltaa vo us se puchhnaa achchhaa nahin chuum kar jis ko khudaa ke haath saunpaa thaa 'nasim' us ke baare mein hamesha sochnaa achchhaa nahin"

"khud ko hujum-e-dahr mein khonaa paDaa mujhe jaise the log vaisaa hi honaa paDaa mujhe dushman ko marte dekh ke logon ke saamne dil hans rahaa thaa aankh se ronaa paDaa mujhe kuchh is qadar the phuul zamin par khile hue taaron ko aasmaan mein bonaa paDaa mujhe aisi shikast thi ki kaTi ungliyon ke saath kaanTon kaa ek haar pironaa paDaa mujhe kaari nahin thaa vaar magar ek umr tak aab-e-namak se zakhm ko dhonaa paDaa mujhe aasaan nahin hai likhnaa gham-e-dil ki vaardaat apnaa qalam lahu mein Dubonaa paDaa mujhe itni tavil o sard shab-e-hijr thi 'nasim' kitni hi baar jaagnaa sonaa paDaa mujhe"

"teri aankhon ki chamak bas aur ik pal hai abhi dekh le is chaand ko kuchh duur baadal hai abhi aankh to khud ko nae chehron mein kho kar rah gai dil magar us shakhs ke jaane se bojhal hai abhi ab talak chehre pe hain tufaan guzarne ke nishaan tah mein patthar jaa chukaa paani pe halchal hai abhi tu to un kaa bhi gila kartaa hai jo tere na the tu ne dekhaa hi nahin kuchh bhi tu paagal hai abhi kar gayaa suraj mujhe tanhaa kahaan laa kar 'nasim' kyaa karun main raaste mein shab kaa jangal hai abhi"

"chaand phir taaron ki ujli rezgaari de gayaa raat ko ye bhiik kaisi khud bhikaari de gayaa Taankti phirti hain kirnein baadalon ki shaal par vo havaa ke haath mein goTaa kanaari de gayaa kar gayaa hai dil ko har ik vaahime se be-niyaaz ruuh ko lekin ajab si be-qaraari de gayaa shor karte hain parinde peD kaTtaa dekh kar shahr ke dast-e-havas ko kaun aari de gayaa us ne ghaayal bhi kiyaa to kaise patthar se 'nasim' phuul kaa tohfa mujhe meraa shikaari de gayaa"

"haath haathon mein na de baat hi kartaa jaae hai bahut lambaa safar yuun to na Dartaa jaae ji mein Thaani hai ki jiinaa hai bahar-haal mujhe jis ko marnaa hai vo chup-chaap hi martaa jaae khud ko mazbut banaa rakkhe pahaaDon ki tarah ret kaa aadmi andar se bikhartaa jaae surkh phulon kaa nahin zard udaasi kaa sahi rang kuchh to miri tasvir mein bhartaa jaae mujh se nafrat hai agar us ko to izhaar kare kab main kahtaa huun mujhe pyaar hi kartaa jaae ghar ki divaar ko itnaa bhi tu unchaa na banaa teraa ham-saaya tire saae se Dartaa jaae"

"jaane vaalon ke liye tu aur kyaa le jaaegaa dekh le duniyaa jahaan tak raasta le jaaegaa khvaahish-e-guftaar rah jaaegi phir zer-e-zabaan izn to de degaa lekin hausla le jaaegaa guunj ban kar lauT jaaegi miri fariyaad bhi shab kaa sannaaTaa kahaan meri sadaa le jaaegaa dil se miT jaaegaa ik din dekhne milne kaa shauq jitne manzar hain vo aankhon mein sajaa le jaaegaa lutf phir aaegaa kyaa sayyaahi-e-dil mein 'nasim' is khanDar se jo milegaa vo uThaa le jaaegaa"

"shaam se tanhaa khaDaa huun yaas kaa paikar huun main ajnabi huun aur fasil-e-shahr se baahar huun main tu to aayaa hai yahaan par qahqahon ke vaaste dekhne vaale baDaa ghamgin saa manzar huun main main bachaa lungaa tujhe duniyaa ke sard-o-garm se Dhaanp le mujh se badan apnaa tiri chaadar huun main ab to milte hain havaa se bhi dar-o-divaar-e-jism baasiyo mujh se nikal jaao shikasta-ghar huun main main tumhein uDte hue dekhungaa mere saathiyo main tumhaaraa saath kaise duun shikasta-par huun main mere hone kaa pata le lo dar-o-divaar se kah rahaa hai ghar kaa sannaaTaa abhi andar huun main kaun degaa ab yahaan se teri dastak kaa javaab kis liye mujh ko sadaa detaa hai khaali ghar huun main"

"haath lahraataa rahaa vo baiTh kar khiDki ke saath main akelaa duur tak bhaagaa gayaa gaaDi ke saath ho gayaa hai ye makaan khaali sadaaon se magar zehn ab tak gunjtaa hai rail ki siiTi ke saath muddatein jis ko lagi thiin mere paas aate hue ho gayaa mujh se judaa vo kis qadar tezi ke saath koi baadal mere tapte jism par barsaa nahin jal rahaa huun jaane kab se jism ki garmi ke saath niind katraa ke guzar jaati hai aankhon se 'nasim' jaagtaa rahtaa huun ab main shab ki viraani ke saath"

"saraae chhoD ke vo phir kabhi nahin aayaa chalaa gayaa jo musaafir kabhi nahin aayaa har ek shai mire ghar mein usi ke zauq ki hai jo mere ghar mein ba-zaahir kabhi nahin aayaa ye kaun mujh ko adhuraa banaa ke chhoD gayaa palaT ke meraa musavvir kabhi nahin aayaa makaan huun jis mein koi bhi makin nahin rahtaa shajar huun jis pe ki taair kabhi nahin aayaa"