Ghazal

"TukDe TukDe miraa daamaan-e-shakebaai hai kis qadar sabr-shikan aap ki angDaai hai dil ne jazbaat-e-mohabbat se ziyaa paai hai meri tanhaai bhi ik anjuman-aaraai hai ab jafaa se bhi gurezaan hain vo allaah allaah dekhiye kyaa miraa anjaam-e-shakebaai hai bijliyaan mere qafas par na kahin TuuT paDein kyuun sabaa khaak nasheman ki yahaan laai hai bas vahi bahr-e-mohabbat kaa shanaavar niklaa jis ne tufaan se ulajhne ki qasam khaai hai shauq se aap zamaane ko navaazein lekin kyaa koi meri tarah aap kaa shaidaai hai kaun hamdard zamaane mein hai 'iqbaal' magar un ki ik yaad faqat monis-e-tanhaai hai"

"nazar jin ki ulajh jaati hai un ki zulf-e-pechaan se vahi baDh kar lipaT jaate hain aksar mauj-e-tufaan se agar sharmaa rahaa hai mehr-e-taabaan husn-e-jaanaan se shafaq bhi to khajil hai surkhi-e-khun-e-shahidaan se mire josh-e-junun ko chheDtaa hai kis liye hamdam uTheingi aandhiyaan laakhon ishaare hain bayaabaan se Dubo kar dekh kashti-e-tamannaa bahr-e-hasti mein ubhar aaegaa khud saahil kisi nau-khez tufaan se mujhe marnaa mubaarak bas tamannaa hai to itni hai bujhaa dein vo charaagh-e-zindagi khud apne daamaan se sambhal kar rahravaan-e-raah-e-ulfat sakht manzil hai sadaaein aa rahi hain aaj tak gor-e-gharibaan se hujum-e-yaas hi 'iqbaal' tamhid-e-masarrat hai khushi kaa baab khultaa to hai lekin gham ke unvaan se"

"nigaahon se meri nigaahein bachaae chale aa rahe hain vo tufaan uThaae lahu dil kaa ashkon mein kyuun aa na jaae kahaan tak koi raaz-e-ulfat chhupaae usi ki hai duniyaa usi kaa zamaana jo sab kuchh haTaa kar kabhi kuchh na paae abhi kuchh hai baaqi nishaan-e-nasheman kaho barq se aur abhi zulm Dhaae chale aaeinge khud vo betaab ho kar junun-e-mohabbat miraa baDh to jaae niraale hain rasm-o-rivaaj-e-mohabbat vahi paar hotaa hai jo Duub jaae rahaa ek aalam na 'iqbaal' apnaa kabhi ro diye to kabhi muskuraae"

"miri nazar se jo nazrein bachaae baiThe hain khabar bhi hai unhein kyaa gul khilaae baiThe hain hazaar baar jale jis se baal-o-par apne usi charaagh se ham lau lagaae baiThe hain jo shaakh shokhi-e-barq-e-tapaan se hai maanus usi pe aaj nasheman banaae baiThe hain phir us ke vaada-e-fardaa kaa ho yaqin kaise hazaar baar jise aazmaae baiThe hain shab-e-firaaq ki ham tirgi se ghabraa kar charaagh-e-zakhm-e-gham-e-dil jalaae baiThe hain use hijaab kahun yaa kahun pashemaani mire mazaar pe vo sar jhukaae baiThe hain ham ek qatra-e-qalb-e-hazin mein ai 'iqbaal' gham-e-hayaat ke tufaan chhupaae baiThe hain"

"dil-e-muztar ko ham kuchh is tarah samjhaae jaate hain ki vo bas aa rahe hain aa hi pahunche aae jaate hain nigaah-e-shauq ke parvarda nazzaaron ki mahfil mein ye dil bahle na bahle haan magar bahlaae jaate hain ba-zaahir to bahut naazuk hain dil ahl-e-mohabbat ke yahi shishe kabhi patthar se bhi Takraae jaate hain hansaa karte the sun kar daastaan-e-qais bachpan mein javaan ho kar isi qissa ko ham dohraae jaate hain vo duzdida nigaahein hon ki khanjar-aazmaa abru mohabbat ki har ik manzil pe rahzan paae jaate hain bhari mahfil mein sab se hain mukhaatab be-hijaabaana magar bas ek ham hain jin se vo sharmaae jaate hain khayaal-e-ujrat-e-mauhum par 'iqbaal' duniyaa mein ye ham se zindagi ke bojh kyuun uThvaae jaate hain"

"vo aa rahe hain vo jaa rahe hain mire tasavvur pe chhaa rahe hain kabhi hain dil mein kabhi jigar mein kabhi nazar mein samaa rahe hain junun-navaazi hai meri fitrat isi se haasil hai mujh ko raahat jo mujh se hosh-o-khirad ne chhinaa junun ke sadqe vo paa rahe hain jigar ko rokun yaa dil ko thaamun ilaahi kis kis ko main sambhaalun mire tasavvur ki anjuman mein vo aaj ban-Than ke aa rahe hain lagaai dil mein kuchh aisi tu ne ye aatish-e-sozish-e-mohabbat bhaDak rahi hai ye utnaa paiham ham us ko jitnaa bujhaa rahe hain ye raah-e-ulfat ki Thokarein hain inhein na manzil samajh ke Thahro qadam baDhaao vo qaafila hai tumhaare saathi bulaa rahe hain hain rahravaan-e-rah-e-mohabbat niraali rasmein niraali fitrat jahaan luTaa kaarvaan-e-ulfat vahin pe manzil banaa rahe hain na ham ko sher-o-sukhan se matlab na ishrat-e-anjuman se matlab kisi ko 'iqbaal' daastaan-e-gham-e-mohabbat sunaa rahe hain"

"ishq itnaa kamaal rakhtaa hai husn ko gham-shanaas kartaa hai chashm-e-saaqi mein jaam-e-jam ki qasam rang-e-duniyaa-o-din chhalaktaa hai sham-e-mahfil ho yaa ki parvaana vo bhi jalti hai ye bhi jaltaa hai Duub jaae na gham kaa mai-khaana jaam-e-qalb-e-hazin chhalaktaa hai bas ai fitna-e-khiraam-e-naaz Thahar ab qayaamat kaa dil machaltaa hai maslahat ye hai tum badal jaao rang-e-mahfil agar badaltaa hai gham-e-jaanaan se bach gae 'iqbaal' gham-e-dauraan se kaun bachtaa hai"

"paataa huun iztiraab rukh-e-pur-hijaab mein shaayad chhupaa hai dil miraa un ki naqaab mein vo chaandni mein rukh se haTaa dein agar naqaab lag jaaein chaar-chaand rukh-e-maahtaab mein ai naa-khudaa-e-kashti-e-dil dekh-bhaal ke tufaan chhupe na hon kahin qalbe-habaab mein sabr-aazmaa nigaahon kaa sadqa idhar bhi dekh phir kuchh kami si paataa huun ab iztiraab mein ik tum hi aae dard ki duniyaa basaa gae varna rahaa thaa kyaa dil-e-khaana-kharaab mein 'iqbaal' in ki mast-nigaahon kaa faiz hai meraa jahaan-e-shauq hai Duubaa shabaab mein"