Ghazal

"kaun hain jo ghamnaak nahin hain ham hi garebaan-chaak nahin hain shor na kar ai sail-e-havaadis ham bhi khas-o-khaashaak nahin hain shaan-e-khudaa naazaan hain vo bhi jin ke daaman paak nahin hain khuun mein tar hain daaman-o-khanjar phir bhi vo saffaak nahin hai ai 'jarraar' sukun ke saamaan aaj tah-e-aflaak nahin hain"

"kahin hai daagh-e-naakaami kahin hai khuun armaan kaa hamaaraa dil muraqqaa ban gayaa hai yaas-o-hirmaan kaa jahaan vaalon pe main ehsaan karke bhuul jaataa huun mire akhlaaq ko chamkaa rahaa hai naqsh nisyaan kaa alaaeq mein ulajh kar fursat-e-nazzaara kho baiThaa nihaayat diid ke qaabil thaa manzar bazm-e-imkaan kaa baDhi hai tishnagi sairaab kar do paanv ke chhaalo zaraa saa munh nikal aayaa hai har khaar-e-bayaabaan kaa nahin hain 'haali'-o-'iqbaal' se shaa'ir to kyaa gham hai abhi ik dam ghanimat hai to 'jarraar'-e-sukhan-daan kaa"

"sabab-e-dard-e-jigar yaad aayaa yaani vo tir-e-nazar yaad aayaa jhilmilaane lage palkon pe nujum phir koi rashk-e-qamar yaad aayaa apni manzil ke nishaan paate hi mujh ko aaghaaz-e-safar yaad aayaa dekh kar aaina kis soch mein ho kyaa koi ahl-e-nazar yaad aayaa bhulne vaale taDap uTThegaa main kisi vaqt agar yaad aayaa un ki paazeb udhar guunj uThi shor-e-zanjir idhar yaad aayaa kyon ye bikhraa liye gesu tum ne kyaa koi khaak-basar yaad aayaa ek haalat mein basar ho na saki shaam ko vaqt-e-sahar yaad aayaa hil gayaa qalb-e-do-aalam 'jarraar' kaun kartaa huaa fariyaad aayaa"

"duniyaa-e-dani hai matlab ki sab rishte naate toD diye ab khud pe bharosa karnaa hai jitne the sahaare chhoD diye ab dil se dil kaa milnaa kyaa bas haath milaanaa kaafi hai derina taur tariqon ne chalte chalte dam toD diye duniyaa-e-mohabbat ke andar nafrat kaa andheraa jin se baDhe us daur-e-taraqqi ke aise jitne hain uThaa kar toD diye jo aandhiyon se Takraa bhi sakein zulmat kaa fusun bhi toD sakein taaqon mein sajaa kar pahle hi to kuchh aise rakh chhoD diye kyaa milnaa-julnaa aapas mein ye sab kahne ki baatein hain ham dekh chuke is daur ne to dil toD diye sar joD diye jab zulm ke tufaan umDe hain jab yaas ke baadal chhaae hain duniyaa ko diyaa hai azm-e-javaan taarikh ko ham ne moD diye ai daur-e-siyaasat ahd-e-zabun 'jarraar' se ye ummid na rakh us dar pe jhukaa di peshaani haath us ke aage joD diye"

"vaapas jo nahin aaegaa mein vo safari huun ai dost gale lag ki charaagh-e-sahari huun ai husn ye andaaz-o-adaa tujh mein kahaan the main tere liye aaina-e-ishva-gari huun baDhti hui tahrik-e-siyaasat mujhe samjho elaan-e-baghaavat pae bedaad-gari huun duniyaa ke liye jo hai ujaalon kaa payambar zulmat-kada-e-shab mein vo najm-e-sahari huun rangini-o-khush-pairahni hai mire dam se gulshan mein kali tum mein nasim-e-sahari huun hairat se na kyuun dekhe mujhe saaraa zamaana parvarda-e-aaghosh-e-kamaal-e-bashari huun tum bhi ho adaaon ki kashaakash mein giraftaar kyaa fikr jo main qaidi-e-aashufta-sari huun"

"mire saath saath aao nayaa mai-kada banaao kabhi main tumhein pilaaun kabhi tum mujhe pilaao ye gharib kaa makaan hai yahaan farsh-e-gul kahaan hai jo ho baiThnaa to aao sar-e-khaak baiTh jaao abhi taab-e-imtihaan hai abhi hausla javaan hai abhi aur zulm toDo abhi aur zulm Dhaao kabhi gir rahe hain aansu kabhi uTh rahi hain aahein tumhein kis ne kah diyaa thaa mire she'r gungunaao miri zindagi yahi hai ki har ik ko faiz pahunche main charaagh-e-rah-guzar huun mujhe shauq se jalaao"

"ashk bahne lage tumhaare to abhi zinda hain gham ke maare to main sahaaron ko DhunDhtaa hi nahin dushman-e-'azm hain sahaare to raaston mein ye mahvashon kaa hujum hosh uDne lage hamaare to aao maujon se baat-chit karein ham se naaraaz hain kinaare to ai gham-e-be-kasi ke afsaano Duub jaaeinge chaand taare to har qadam par hayaat hai maujud zindagi ko koi pukaare to haae 'jarraar' kis pe naaz karein khud-gharaz dost hain hamaare to"

"sirf baiThe hue aahein na bharo ishrat-e-dil ke liye kuchh to karo valvalon ko na kahin niind aa jaae sitam-e-ahl-e-sitam se na Daro hai ye qismat ki shikaayat be-sud tum mein jauhar bhi hai kuchh be-hunro daagh hi daagh nazar aaeinge chaand mein bhi tumhein ai kam-nazro manzil-e-sabr bahut aage hai sarhad-e-zulm se bedaad-garo apne ghar-baar se rahnaa hoshyaar meraa ghar phunk ke shorida-saro khun-e-dil apnaa bahaa kar 'jarraar' rang-e-tasvir mohabbat mein bharo"

"bach ke vo nikalte hain jin se ru-shanaasi hai zindagi hamaari to ab ajal-numaa si hai jazb ho gai dil ki be-kali fazaaon mein is taraf hai sannaaTaa us taraf udaasi hai dilkashi ghazab ki hai husn-e-saada-kaari mein kis ke dast-e-rangin ne phuul ki qabaa si hai khushki-e-lab-e-saahil kah rahi hai pyaason se kyaa bisaat-e-dariyaa khud us ki ruuh pyaasi hai is qadar paDaa paani khet jal gayaa saaraa abr ki tabiat bhi barq-e-shoala-zaa si hai ruh-e-khud-shanaasi hai aadmi ki khuddaari khud-shanaasi-e-insaan asl-e-haq-shanaasi hai"

"di gavaahi lahu ki dhaaron ne paanv chume hain khaarzaaron ne saath chhoDaa na ghamgusaaron ne maar Daalaa mujhe sahaaron ne kis ne luuTe maze bahaaron ke ham ko luuTaa hai khud bahaaron ne ghar sajaae chaman ujaaD diyaa gul khilaae fareb-kaaron ne ab kahein bhi to kyaa kisi se kahein kaaT di raat gham ke maaron ne dil se parde uThaae hain kyaa kyaa aaj baiThe hue mazaaron ne aakhirash nazr kar diyaa 'jarraar' apni jaanon ko haq-guzaaron ne"

"kis roz ham ne aah-o-fughaan mein basar na ki thi raat kaun si jo taDap kar sahar na ki is daur-e-khud-gharaz mein ye khuddaari-e-nigaah dam par bhi ban gai su-e-saaqi nazar na ki bazm-e-jahaan se jaate hue kyon kisi ne bhi muD kar nigaah-e-jaanib-e-divaar-o-dar na ki ye ehtiyaat-e-paas-e-mohabbat to dekhiye karni thi un se gham ki shikaayat magar na ki kotaahi-e-nazar thi ki naa-qadri-e-sukhan 'jarraar' ham ne pesh mata-e-hunar na ki"

"chhup-chhup ke phir nigaah-e-karam kar rahaa hai kaun aankhon mein ashk baad-e-sitam bhar rahaa hai kaun marnaa rah-e-vafaa mein hai khud mustaqil hayaat marne ki aarzu thi magar mar rahaa hai kaun manzil pe aa ke khud mujhe honaa paDaa tabaah mahv-e-nazar farebi-e-rahbar rahaa hai kaun achchhaa huaa jo shahr-e-tamannaa ujaD gayaa khud is dayaar-e-shauq mein aa kar rahaa hai kaun 'jarraar' har qadam pe mile hain sukhan-farosh is daur-e-khud-gharaz mein sukhanvar rahaa hai kaun"

"kyaa bataaun mujhe kyaa lagtaa hai har-nafas tir-e-jafaa lagtaa hai huun vo khuddaar kisi se kyaa kahun saans lenaa bhi buraa lagtaa hai phalte dekhi hai kahin shaakh-e-sitam mere kahne kaa buraa lagtaa hai haadse bhi hain baDe kaam ki chiiz dost dushman kaa pataa lagtaa hai meraa sar to kahin jhuktaa hi nahin teraa naqsh-e-kaf-e-paa lagtaa hai kyaa kahun haalat-e-dil ai 'jarraar' dard kuchh aur sivaa lagtaa hai"

"ham shukr-e-jafaa shukr-e-sitam karte raheinge ye jaan ye dil nazr-e-sanam karte raheinge jin ko tiri aankhon ki haqiqat nahin maa'lum vo hasrat-e-paimaana-e-jam karte raheinge vo parvarish-e-lauh-o-qalam mein rahein masruf ham tarbiyat-e-lauh-o-qalam karte raheinge hogaa na koi qaafila aavaara-e-manzil ye kaam mire naqsh-e-qadam karte raheinge khuddaari-e-jamhur ko niind aai hui hai ham shikva-e-arbaab-e-qalam karte raheinge har shaakh-e-gulistaan pe banaaungaa nasheman har shaakh kahaan tak vo qalam karte raheinge 'jarraar' taDapne mein 'ajab lutf milaa hai hans hans ke vo kyaa pursish-e-gham karte raheinge"

"dil se ab yuun khalish-e-marg nikaali jaae zindagi maut ki aaghosh mein paali jaae Deraa Daalaa hai andheron ne chaman mein har-su kyon na ab aag nasheman mein lagaa li jaae baat divaane ki ik roz jahaan samjhegaa hai abhi vaqt hansi khuub uDaa li jaae ham ne har daur mein tabligh-e-mohabbat ki hai shauq se koi si taarikh uThaa li jaae ek aaegaa nazar baatin-o-zaahir 'jarraar' meri sirat miri surat se milaa li jaae"

"ye shahr-e-dil jo havaadis ki aaj manzil hai ujaD chukaa hai magar dekhne ke qaabil hai gham-e-jahaan miri fitrat badal nahin saktaa vahi hai 'azm vahi hausla vahi dil hai ghurur-e-husn ne angDaai le ke dekhaa hai ilaahi khair ki aaina bil-muqaabil hai halaak-e-shauq huaa jaa rahaa hai khud 'aalam khataa mu'aaf yahaan kaun kis kaa qaatil hai hazaar mein tan-e-tanhaa sahi magar 'jarraar' bajaa-e-khud miri tanhaai ek mahfil hai"

"paa ke ishaare josh-e-numu ke qaafile nikle hain khushbu ke chaar taraf gulzaar ke andar hangaame hain rang-o-bu ke insaani qadron ko ganvaa kar khush hain bahut shohrat ke bhuke razm bhi ham se bazm bhi ham se maalik hain ham saif-o-subu ke taaron bhari shab ke daaman par chhinTe hain ye kis ke lahu ke urdu mein urdu ki buraai karte hain dushman urdu ke panja-e-vahshat ko hain sikhaane ai 'jarraar' andaaz rafu ke"

"kis ki aankhon ne kiye ashk ravaan mere baad ho gayaa raaz mohabbat kaa bayaan mere baad mere baais huaa duniyaa mein taaaruf teraa phir tire husn ke charche ye kahaan mere baad jin ki nazron mein khaTaktaa thaa main kaanTe ki tarah un ki nazron mein hai taarik jahaan mere baad phir kisi ne na sunaa tazkira-e-qatl-o-jafaa kaT gai khanjar-e-qaatil ki zabaan mere baad mujh ko 'jarraar' fanaa ishq-e-sitamgar ne kiyaa ab kahaan jaaegaa ye dushman-e-jaan mere baad"