Ghazal

"mohabbat kashmakash mein rah gai sirr-e-nihaan ban kar mire dil kaa yaqin ho kar tire dil kaa gumaan ban kar kare shukr-e-mohabbat meraa har ruyaan zabaan ban kar agar tum biich mein aa jaao shart-e-imtihaan ban kar ye kis ki raah par sar de rahe hain mohsin-e-ulfat ajal khidmat ko aai hai hayaat-e-jaavedaan ban kar jhaTaktaa jaaegaa un ko zamaana apne daaman se jo kuchh bhi rah gae pichhe ghubaar-e-kaarvaan ban kar zamaane ki havaa kaa rukh badal jaanaa muqaddar hai yahi tinke qafas honge bisaat-e-aashiyaan ban kar na ho jab Thokarein khaane pe bhi ehsaas-e-bedaari na TuTein dil pe kyon naakaamiyaan barq-e-tapaan ban kar nahin jab naqsh-e-avval ki tarah rang-e-baqaa tujh mein zarurat kyaa hai rahne ki nishaana le nishaan ban kar fazaa pur-kaif ban kar chhaa gai ghunchon ki raanaai chaman mein kaun aataa hai bahaar be-khizaan ban kar zamin ki tarah jab haasil hai qudrat burdbaari ki rahun ai 'jurm' kyon gardish mein naahaq aasmaan ban kar"

"saaqi ye tere bas mein hai de jaam yaa na de jhuTaa magar kisi ko kabhi aasraa na de soz-e-firaaq kashmakash-e-muddaaa na de dushman ko bhi kisi ki mohabbat khudaa na de shaayad ki so gayaa hai junun phir jagaa na de zanjir-e-paa ko khvaab-e-rihaai hilaa na de karnaa paDe zamir ke bar-aks bandagi majburiyon kisi ko zarurat banaa na de kyaa kyaa dikhaa rahaa hai mohabbat ke sabz baagh miTTi mein dil ko josh-e-javaani milaa na de gum ho ke main ne siikh liyaa khuub ye usuul jis ko khabar mile vo tumhaaraa pataa na de ai 'jurm' dard-o-ishq kaa milnaa nahin hai khel jab tak kisi bashar ko ye neamat khudaa na de"

"naam rakkhaa hai fusun-gar ne sukhan-saaz miraa ghonTe deti hai galaa ab miri aavaaz miraa rah gayaa raaz kisi tarah agar raaz miraa be-niyaazi bhi uThaaegi tiri naaz miraa aaj hai maut bhi vo ishq jo kal tak thaa hayaat mukhtalif kitnaa hai anjaam se aaghaaz miraa be-piye mast huaa pi ke main bahkaa na kabhi vo thi saaqi ki karaamat pa hai eajaaz miraa naavak-e-naaz se uDte hain nishaane dil ke aur parde mein abhi hai qadar-andaaz miraa dhaDkanein ab bhi hain vaisi hi shikasta dil ki be-sadaa ho na sakaa TuuT ke bhi saaz miraa uzr be-baal-o-pari thaa jo qafas toD chukaa dekh ke rah gai munh hasrat-e-parvaaz miraa roz ik taaza balaa aati hai dil ke haathon 'jurm' aamaada hai dam lene pe dam-saaz miraa"

"fareb-e-ulfat ki daastaan mein asar ki ummid hi kahaan hai abhi to mujh ko isi mein shak hai yaqin yaqin hai gumaan gumaan hai mujhi tak un ki jafaa na samjho ye imtihaan hai vo imtihaan hai vahin qayaamat kaa saamnaa hai vafaa ki manzil jahaan jahaan hai nisaab-e-ulfat se be-khabar hai sanad nahin bul-havas kaa daa'vaa jo lafz meri zabaan se nikle vahi mohabbat ki daastaan hai kahaan pahunchne ki aarzu hai tumhaare naqsh-e-qadam pe chal kar tum apne dil se pataa lagaao miri tamannaa ki had kahaan hai fareb ban kar nashaat-e-dil kaa rahegaa kab tak ye aish-e-rafta badal chukaa karvaTein zamaana miri nazar mein vahi samaan hai idhar umangon ki lahar dil mein udhar javaani ki khud-numaai paDe hain ik kashmakash mein donon mazaaq-e-fitrat kaa imtihaan hai tumhaari ghaflat-shi'aariyon ne vo gul khilaae ki rang badlaa qafas ki buniyaad rakhne vaale khizaan ke qabze mein aashiyaan hai palaT gayaa 'jurm' rukh havaa kaa hain aise aasaar ab huvaidaa bahaar aae na baa'd jis ke chaman mein vo mahshar-e-khizaan hai"

"vahi josh-e-haq-shanaasi vahi azm-burd-baari na badal sakaa zamaana miri khu-e-vaza-daari vahi mai-kada hai lekin nahin ab vo kaif-baari gae ham mazaaq le ke miraa lutf-e-baada-khvaari ho zabaan jis ke munh mein vo na aae anjuman mein kahin rakh na de sitam-gar yahi shart-e-raaz-daari kabhi hanste hanste ronaa kabhi rote rote hansnaa koi kyaa samajh sakegaa bhalaa maslahat hamaari main zamaane bhar ke taane na khamosh ho ke suntaa jo junun-e-ishq hotaa miraa feal-e-ikhtiyaari mai-e-aashiqi se tauba hai junun-e-paarsaai kahin le na Duube vaaiz tujhe zoam-e-hoshiyaari na pahunch sakaa jahaan tak kabhi paa-e-kibr-o-daanish vahin 'jurm' le gai hai mujhe meri khaaksaari"

"husn-e-tadbir kaa moajiza dekhiye kaam himmat se le kar zaraa dekhiye aap aur ham se izhaar-e-lutf-o-karam aaina dekhiye aainaa dekhiye aashiyaane ki buniyaad rakkhegaa phir pahle baagh-e-jahaan ki havaa dekhiye aag se khelne ko patangaa baDhaa haisiyat dekhiye hauslaa dekhiye jab kahaa hai to jalva dikhaaeinge vo saans jab tak chale raasta dekhiye kuchh idhar bhi hain ummid-vaar-e-karam mehrbaan is taraf bhi zaraa dekhiye jurm-e-zikr-e-vafaa par vo kahne lagaa jaa ke anjaam-e-ahl-e-vafaa dekhiye"

"nahin maalum vo apni vafaa ko kyaa samajhte hain tire inkaar karne ko bhi jo vaadaa samajhte hain zamaane ko tumhaaraa aur tumhein apnaa samajhte hain agar aisaa samajhte hain to kyaa bejaa samajhte hain na puchho ham mohabbat ki khalish ko kyaa samajhte hain ye vo neamat hai jis ko haasil-e-duniyaa samajhte hain pahunch jaane mein un tak hai to bas ye zindagi haail ham apni saans ko bhi raah kaa kaanTaa samajhte hain zamin se sar uThaate hi nigaahein chaar ho jaaein haqiqat mein usi sajde ko ham sajda samajhte hain sunaanaa thaa dil-e-betaab kaa qissa sunaa Daalaa vo sun kar dekhiye kyaa sochte hain kyaa samajhte hain unhin ke vaaste hain imtihaan-e-ishq ki qaidein jo apni hasti-e-mauhum kaa manshaa samajhte hain vafaadaaron se puchho narkh apni jins-e-ulfat kaa agar sar de ke bhi mil jaae to sastaa samajhte hain unhin ke sar rahaa kartaa hai mohraa naa-khudaai kaa jo qatre ki haqiqat ko bhi ik dariyaa samajhte hain gila be-sud hai ai 'jurm' be-mehri-e-aalam kaa buraa kuchh log kahte hain to kuchh achchhaa samajhte hain"

"vafaa se pashemaan jafaa ho rahi hai mohabbat ki qimat adaa ho rahi hai davaa ho rahi hai duaa ho rahi hai magar dil ki uljhan sivaa ho rahi hai Duboi hai jis ne abhi dil ki kashti vahi aas phir naakhudaa ho rahi hai gulon mein bhi hai rang begaanagi kaa ajab is chaman ki havaa ho rahi hai nigaahon se parde haTe jaa rahe hain khudi ki khudaai fanaa ho rahi hai talab par bhi husn-e-talab ki hai koshish nazar kuchh mizaaj-aashnaa ho rahi hai mire dard ki ibtidaa karne vaale tire zulm ki intihaa ho rahi hai tiri raah mein miTne vaalon ki qismat fanaa ko bhi haasil baqaa ho rahi hai sitam ko sitam 'jurm' hargiz na kahte agar ye samajhte khataa ho rahi hai"

"dikhaave ke liye elaan-e-faiz-e-aam hotaa hai magar ik khaas hi halqa mein daur-e-jaam hotaa hai moarrikh yuun jagah detaa nahin taarikh-e-aalam mein baDi qurbaaniyon ke baad paidaa naam hotaa hai usi ko sochnaa paDti hain tadbirein rihaai ki jo taair jurm-e-aazaadi mein zer-e-daam hotaa hai habaab-e-bahr ki surat ubharne ki zarurat kyaa numud-e-be-mahal kaa jab buraa anjaam hotaa hai koi sarshaar ho jaae koi ik buund ko tarse inhin baaton se saaqi mai-kada badnaam hotaa hai kahin sabze ko raundaa jaa rahaa hai lahlahaane par kahin phulon kaa rang-o-bu pe qatl-e-aam hotaa hai zabaan kyuun kholte ho jurm ye duniyaa hai ulfat ki ishaaron hi ishaaron mein yahaan sab kaam hotaa hai"

"ishq-e-naakaam kaa dastur tumhein kyaa maalum tum ho us se had bahut duur tumhein kyaa maalum gham ki duniyaa se ho tum duur tumhein kyaa maalum aah kyon karte hain majbur tumhein kyaa maalum zakhm-e-dil khugar-e-aazaar kaa baDhte baDhte kis tarah bantaa hai naasur tumhein kyaa maalum khatm hone ko hai hangaama-e-tufaan-e-hayaat dard kyon hotaa hai kaafur tumhein kyaa maalum ishq-e-sar-josh ne kyaa dil pe sitam toDe hain nashsha-e-husn se ho chuur tumhein kyaa maalum tum alag ho gae parde se giraa kar bijli kis pe kyaa guzri sar-e-tur tumhein kyaa maalum apne sheron mein adaa karke tumhaari shokhi ho gayaa 'jurm' bhi mashhur tumhein kyaa maalum"

"paheli kaun bujhegaa javaab-e-naaz-e-jaanaan ki ham us huun ko samajhte hain nahin ki us ne yaa haan ki azal se ye amaanat hai junun-e-fitna-saamaan ki khirad ke haath lag sakti nahin dhajji garebaan ki agar maujon se Dar ke ham bhi saahil hi pe rah jaate to duniyaa par haqiqat hashr tak khulti na tufaan ki giraftaar-e-balaa ke haq mein vo zanjir bantaa hai jo naala niind uDaa detaa hai zindaan ke nigahbaan ki kahe kuchh to bharam jaae jo chup baiThe to huuk uTThe zarurat maut ban jaati hai ghairat-daar insaan ki kuchh aise phuul ham ne bhi chune the apne daaman mein jo apne saath raunaq le gae gulzaar-e-imkaan ki vo divaana mire nazdik hoshyaaron se achchhaa hai haqiqat jis ne kuchh samjhi nahin taar-e-rag-e-jaan ki ye majburi tamaashaa chashm-e-aalam mein banaa varna khushi se dhajjiyaan koi uDaataa hai garebaan ki chaman kyaa hai namuna mere ik rangin tasavvur kaa nashaat-e-kaar ne surat badal di hai bayaabaan ki nikhaareinge yahi kuchh phuul aur kaanTe ki rangat ko phaTe daaman pe jo taarikh likkheinge gulistaan ki muqaddar mein jo thi ai 'jurm' qaid-e-zist ki sakhti anaasir ke ravaabit ban gae divaar-o-zindaan ki"

"ba-har-surat Thahar jaanaa paDegaa agar raste mein mai-khaana paDegaa mohabbat mein sukun-e-dil ki khaatir kisi din zahr bhi khaanaa paDegaa abhi manzil kahaan ai zauq-e-manzil abhi to manzilon jaanaa paDegaa na puchho mujh se vajh-e-be-qaraari bhari mahfil mein sharmaanaa paDegaa kahaan jaaun main tere dar se uTh kar palaT kar phir yahin aanaa paDegaa yahi pur-lutf ulfat ho to pukhta saraapaa dard ban jaanaa paDegaa hain kyaa dair-o-haram un ki talab mein khudaa jaane kahaan jaanaa paDegaa tamannaa-e-vafaadaari salaamat unhein bhi haath phailaanaa paDegaa javaani aabru-e-zindagi hai ye daulat kho ke pachhtaanaa paDegaa samajh lo 'jurm' dastur-e-mohabbat zamaane bhar ko samjhaanaa paDegaa"

"ye qaul aql kaa hai miraa faisla nahin muhtaaj ho subut kaa ho vo khudaa nahin kyuun raaz-daar-e-dil pe bharosa kiyaa nahin aaina dekhtaa hai magar boltaa nahin raunde gae hain phuul bhi kaanTon ke saath saath gulshan mein inqalaab se koi bachaa nahin bahte nahin hain vaqt ki raftaar dekh kar ham khud bure bane hain zamaana buraa nahin gumraah kar ke chhoDegaa ye shauq-e-rah-ravi ham us taraf chale hain jidhar raasta nahin hai jurm sach jo puchho to ye hai pate ki baat un kaa pata milaa hai to apnaa pata nahin"