Ghazal

"hai faqat yahi fasaana miri 'umr-e-mukhtasar kaa miri kyaa bisaat-e-hasti huun charaagh raat bhar kaa baDi hausle se kheli huun ye zindagi ki baazi mujhe kyaa miTaa sakegaa koi gham idhar-udhar kaa mire sina-e-jahaan ko mire gham ne phunk Daalaa miraa ghar jalaayaa jis ne vo charaagh bhi thaa ghar kaa mujhe raas hi na aae mire nim-shab ke sajde mujhe dekh lo nishaan huun main du’aa-e-be-asar kaa jo bahaar-e-gulsitaan mein yunhi ban sanvar ke niklin ye bataao mujh ko 'mariyam' ki hai qasd ab kidhar kaa"

"tujh se ai mere sitamgar maa'zarat maa'zarat-dar-maa'zarat-dar-maa'zarat jo miri jaanib uchhaale the kabhi aaj karte hain vo patthar maa'zarat inkisaari se khaDe rahte hain ham tu guzar jaataa hai kah kar maa'zarat zulf-e-jaanaan ke jo dekhun pech-o-kham mujh ko aa jaate hain chakkar maa'zarat ik guzaarish thi tire barbaad ki kar li tasvir-e-junun par maa'zarat raat ke naalon kaa 'mariyam' kyaa kahein ham se kar lete hain aksar maa'zarat"

"boltaa hai tire ash'aar kaa jaadu dil mein aa rahi hai tire alfaaz ki khushbu dil mein aisaa lagtaa hai tiri yaad chali aai hai raushni phailti jaati hai jo harsu dil mein phir tire honT hanse hain miri barbaadi par kyon chamakne lage ummid ke jugnu dil mein tirgi phail gai khaana-e-gham mein shaayad hijr ki raat ne khole hain ye gesu dil mein hasratein tolne aae hain vo 'mariyam' kyunki le ke baiThe hain kai dard taraazu dil mein"

"zamaana-saaz khudaaon se Dar gae ham tum qasam khudaa ki mohabbat mein mar gae ham tum jahaan mein aae the kuchh 'aashiqaan-e-gham ke liye sadaa-e-'ishq lagaa kar guzar gae ham tum kabhi the jashn-e-bahaaraan kabhi the raunaq-e-gul so misl-e-barg-e-khizaan ab bikhar gae ham tum vabaal-e-gardish-e-dauraan hamein bataae to kahaan se aae the aur ab kidhar gae ham tum 'khadija' 'ishq-o-mohabbat ki daastaan ban kar koi to kaam zamaane mein kar gae ham tum"

"hasrat-e-dil thi kahaan ki vo kahaan tak pahunche phir bahaaron ke tamannaai khizaan tak pahunche dasht se ham ko nikaalaa baDi be-rahmi se kyon na phir qissa-e-gham sab ki zabaan tak pahunche tum kisi se bhi milo ham ne kabhi kuchh na kahaa tum falaane se mile aur fulaan tak pahunche aaj bhi saahib-e-idraak bahut milte hain aise bhi log hain jo dard-e-nihaan tak pahunche kuuch kar jaate hain gulshan se kahin aisaa na ho haath har phuul kaa meri rag-e-jaan tak pahunche shaa'iri shauq nahin balki zarurat hai miri taaki 'mariyam' ki sadaa saare jahaan tak pahunche"

"aap ko apni hi bedaad-gari yaad nahin is kaa matlab hai miri ham-safari yaad nahin ham se mat puchho sar-e-dasht safar kaisaa rahaa itnaa bhaTke hain ki ab dar-ba-dari yaad nahin kaaT degi yunhi barson kaa safar lamhon mein 'umr-e-dauraan tujhe aahista-ravi yaad nahin ham ko bhi yaad nahin aakhiri khat kaa mazmun naama-bar ko bhi koi naama-bari yaad nahin ham ne bhi 'ishq kiyaa thaa kabhi koi 'mariyam' is se haT ke to koi dard-e-sari yaad nahin"

"hijr ke ranj-o-alam apni jagah aap ke qaul-o-qasam apni jagah aap ne khud hi kinaaraa kar liyaa ham rahe saabit-qadam apni jagah bante bante raasta bantaa gayaa zindagi ke pech-o-kham apni jagah dhaDkanon ki phir sadaa aane lagi yaa'ni dil hai kam se kam apni jagah dhire dhire us mein Dhal jaaeinge ham khud banaa letaa hai gham apni jagah ho gai badnaam 'mariyam' khair se aap to hain mohtaram apni jagah"

"duniyaa ko dikhaane se jo majbur rahe hain ham ziist ke siine kaa vo naasur rahe hain kahne ko to aazaad nazar aate hain sab ko ham zaat mein apni sadaa mahsur rahe hain ab ham ko koi dars-e-tabassum nahin denaa ik 'umr se ranjur the ranjur rahe hain DhunDaa mire andar na kisi ne mujhe yaaro ham muddaton khud se yunhi mafrur rahe hain us fitna-e-maghrur se sad-shukriya 'mariyam' ham duur bahut duur bahut duur rahe hain"

"ham to karte hue raqs-e-bismil gae jab kabhi shauq mein su-e-manzil gae jaane kyaa ho gayaa hai tabi'at ko ab gaahe murjhaa gae gaahe ham khil gae paDh ke phunkaa tiraa naam siine pe jab zakhm-e-dil aap hi aap khud sil gae le ke aae the didaar ki sarkhushi jab gae teri mahfil se ghaail gae ye bhi qismat ki ham pe navaazish hai kam un ko ham aur vo 'mariyam' hamein mil gae"

"khaamushi ko lab-e-izhaar nahin kar sakte apne lahje ko to talvaar nahin kar sakte aap har phuul ko paaband-e-qafas kar leinge us ki khushbu ko giraftaar nahin kar sakte ham ne vo kaam kiye hain ye hami jaante hain vo jo is daur ke fankaar nahin kar sakte un ki shohrat ke liye ashk bahaane honge gham ki tashhir to akhbaar nahin kar sakte ham ne rahzan se hi manzil kaa pataa puchhaa hai kaam ye qaafila-saalaar nahin kar sakte dekhiye aap ne chaahaa hai 'khadija' ko bahut aap is baat se inkaar nahin kar sakte"

"guzarti hai shab-bhar ghazal kahte kahte main roti huun aksar ghazal kahte kahte mujhe tujh se pahle koi jaantaa thaa bani huun sukhanvar ghazal kahte kahte sunaati huun dukhDe zamaane ko apne na badlaa muqaddar ghazal kahte kahte sukhan-aashnaa shahr mein mil na paayaa main bhaTki huun dar-dar ghazal kahte kahte junun mein kahaan hosh rahtaa hai 'mariyam' nikal aai baahar ghazal kahte kahte"

"jab tiri bazm se baa-dida-e-nam uThte hain ab nahin aaeinge ye khaa ke qasam uThte hain ham vo bezaar-e-zamaana hain kahin jaate nahin baiTh jaaein kisi mahfil mein to kam uThte hain kitne mazlum hain ham chaahne vaalon mein miyaan ham pe yaaron ke yahaan dast-e-sitam uThte hain aap jaane kaa takalluf na karein bahr-e-khudaa aaiye baiThiye is bazm se ham uThte hain ham se mai-khvaar ko kyaa tauba ki talqin yahaan haath mein jaam liye pir-e-haram uThte hain saadgi didani hoti hai vo jab kahte hain aaj is duniyaa se 'mariyam' ki qasam uThte hain"