Ghazal

"garche gul ki sej ho tis par bhi uD jaati hai niind sar rakhun qadmon pe jab tere mujhe aati hai niind dekh saktaa hi nahin aankhon se Tuk aankhein milaa muntazir se misl-e-nargis tere sharmaati hai niind jab se ye mizhgaan hue dar par tire jaarub-kash ru-ba-ru tab se miri aankhon ke Tal jaati hai niind dhyaan mein gul-ru ke chain aataa nahin afsaana-gar le sabaa se gaah bu-e-yaar bahlaati hai niind ashk to itne bahe 'chandaa' ki chashm-e-khalq se qurrat-ul-ain-e-ali ke gham mein bah jaati hai niind"

"aalam tiri nigah se hai sarshaar dekhnaa meri taraf bhi Tuk to bhalaa yaar dekhnaa naadaan se ek umr rahaa mujh ko rabt-e-ishq daanaa se ab paDaa hai sarokaar dekhnaa gardish se teri chashm ke muddat se huun kharaab tis par kare hai mujh se ye iqraar dekhnaa naaseh abas kare hai mana mujh ko ishq se aa jaae vo nazar to phir inkaar dekhnaa 'chandaa' ko tum se chashm ye hai yaa ali ki ho khaak-e-najaf ko surma-e-absaar dekhnaa"

"na gul se hai gharaz tere na hai gulzaar se matlab rakhaa chashm-e-nazar shabnam mein apne yaar se matlab ye dil daam-e-nigah mein tark ke bas jaa hi aTkaa hai bar aave kis tarah allaah ab khun-khvaar se matlab ba-juz haq ke nahin hai ghair se hargiz tavaqqo kuchh magar duniyaa ke logon mein mujhe hai pyaar se matlab na samjhaa ham ko tu ne yaar aisi jaan-fishaani par bhalaa paaveinge ai naadaan kisi hushyaar se matlab na 'chandaa' ko tamaa jannat ki ne khauf-e-jahannam hai rahe hai do-jahaan mein haidar-e-karraar se matlab"

"gul ke hone ki tavaqqo pe jiye baiThi hai har kali jaan ko muTThi mein liye baiThi hai kabhi sayyaad kaa khaTkaa hai kabhi khauf-e-khizaan bulbul ab jaan hatheli pe liye baiThi hai tir-o-shamshir se baDh kar hai tiri tirchhi nigaah saikDon aashiqon kaa khuun kiye baiThi hai tere rukhsaar se tashbih use duun kyunkar shama to charbi ko aankhon mein diye baiThi hai tishna-lab kyuun rahe ai saaqi-e-kausar 'chandaa' ye tire jaam-e-mohabbat ko piye baiThi hai"

"rahe nau-roz ishrat-aafrin josh-e-bahaar-afzaa gul-afshaan hai karam teraa chaman mein dahr ke har jaa na puchho koi aish-o-khurrami ko ahd mein us ke ki jis ke faiz se ghar ghar hai daur-e-saaghar-e-sahbaa arastu-jaah vo farrukh-nazhaad-e-ahl-e-aalam hai ki jis ke fazl-o-bakhshish kaa jahaan mein hai alam barpaa duaa hai ye mavaali ki tasadduq se aimma ke rakhe saae mein apne lutf ke tujh ko ali maulaa nahin kuchh zeb ai mehr-e-siphar-e-ma'adalat is mein ayaan 'chandaa' pe jo kuchh hai navaazish ye karam-farmaa"

"basant aai hai mauj-e-rang-e-gul hai josh-e-sahbaa hai khudaa ke fazl se aish-o-tarab ki ab kami kyaa hai bayaan main kyaa karun us ke shabistaan kaa ta'al-allah qazaa-o-qadr jis ke jashn kaa ab kaar-farmaa hai sakhaavat mein koi ham-sar na ho us kaa zamaanae mein vahi kartaa hai puuraa jis ke dil mein jo iraada hai khizar ki umr ho us ki tasadduq se aimma ke nizaam-ud-daula aasaf-jaah jo sab kaa masihaa hai bahi-khvaan-e-karam se hai sadaa ummid 'chandaa' ko kisi ki bhi na ho muhtaaj tum se ye tamannaa hai"

"rakhte hain mere ashk se ye dida-e-tar faiz daaman mein liyaa apne hai dariyaa ne guhar faiz pur-nur ajab kyaa hai kare mujh ko karam se rakhti hai do aalam pe tiri ek nazar faiz ik jaam pe bakhshe hai yahaan rutba jism ko kis ki nigah-e-mast se rakhtaa hai khumar faiz mahrum nahin koi tire khvaan-e-karam se hai hasr khudaai kaa hi tujh pe magar faiz 'chandaa' rahe partav se tire yaa ali raushan khurshid ko hai dar se tire shaam-o-sahar faiz"

"rahe raqib se baaham vo sim-bar mahzuz huaa na aah kaa apne kabhi asar mahzuz daregh chashm-e-karam se na rakh ki ai zaalim kare hai dil ko mire teri yak nazar mahzuz na baar baar havas ho nabaat ki mujh ko rakhe jo ek hi bosa mein lab-e-shakar mahzuz tamaasha ek khudaai kaa ham dikhaate hain to kijiye banda-navaazi hue ho magar mahzuz yahi duaa hai ki 'chandaa' kaa dil ali vali tere karam se rahe shaam aur sahar mahzuz"

"dil mein mere phir khayaal aataa hai aaj koi dilbar be-misaal aataa hai aaj kyuun paDaa behosh uTh haatif se ab hai nidaa saahab-e-jamaal aataa hai aaj sang-e-rah huun ek Thokar ke liye tis pe vo daaman sanbhaal aataa hai aaj mushtari o zohra baaham saa'd hain is liye abru hilaal aataa hai aaj tum sivaa 'chandaa' ke dil mein yaa 'ali kis ki 'azmat kaa jalaal aataa hai aaj"

"tum munh lagaa ke ghairon ko maghrur mat karo lag chalnaa aise deson se dastur mat karo Tasve bahaa ke har ghaDi zaari nahin hai khuub ye raaz-e-ishq hai use mashhur mat karo har-chand dil dukhaanaa kisi kaa buraa hai par ranjida khaatiron ko to ranjur mat karo ai hamdamo jo mujh se hai manzur ikhtilaat juz zikr-e-yaar tum koi mazkur mat karo raushan rakho jahaan mein maulaa misaal-e-mehr chanda ke munh se nuur ko tum duur mat karo"

"saaqi hai garche be-shumaar sharaab nahin khush-tar sivaae yaar sharaab qatl par kis ke aaj hoti hai tausan-e-husn par savaar sharaab rakh karam par tire nazar mujrim nosh karte hain be-shumaar sharaab un ko aankhein dikhaa de Tuk saaqi chaahte hain jo baar baar sharaab yaa ali hashr mein do 'chandaa' ko aab-e-kausar ki khush-gavaar sharaab"

"dil ho gayaa hai gham se tire daaghdaar khuub phulaa hai kyaa hi josh se ye laala-zaar khuub kab tak rahun hijaab mein mahrum vasl se ji mein hai kiije pyaar se bos-o-kanaar khuub saaqi lagaa ke barf mein mai ki suraahi laa aankhon mein chhaa rahaa hai nashe kaa khumaar khuub aayaa na ek din bhi tu vaada pe raat ko achchhaa kiyaa suluk taghaaful-shiaar khuub aisi havaa bandhi rahe 'chandaa' ki yaa ali baa-sad-bahaar dekhe jahaan ki bahaar khuub"