Ghazal

"har takalluf bilaa-zarurat hai sach kahun aap se mohabbat hai main use jitnaa dekhnaa chaahun vo bhi utni hi khub-surat hai main bahut khush huun aur khushi kaa sabab aap bilkul nahin hain vahshat hai meri saansein bhi ho gaiin mashrut 'ishq kyaa hai koi musibat hai aur vo kis tarah kare izhaar main na samjhun to mujh pe laa'nat hai aane vaale dinon mein jiitaa huun mujh ko aaindagaan se nisbat hai"

"jo chand lamhon mein ban gayaa thaa vo silsila khatm ho gayaa hai ye tum ne kaisaa yaqin dilaayaa mughaalta khatm ho gayaa hai zabaan honTon pe jaa ke phiki hi lauT aati hai kuchh dinon se namak nahin hai tire labon mein yaa zaaiqa khatm ho gayaa hai gumaan gaanv se main chalaa thaa yaqin ki manzilon ki jaanib magar tavahhum ke jangalon mein hi raasta khatm ho gayaa hai vo guftuguon ke narm chashme kahin fazaa mein hi jam gae hain vo saare message vo shaa'iri kaa tabaadala khatm ho gayaa hai kal ek sadma paDaa thaa ham par ke jis ne dil ko hilaa diyaa thaa chalo ke siine kaa jaaeza lein ki zalzala khatm ho gayaa hai mire tasavvur mein itni vus'at nahin ke teraa badan samaae main tujh ko sochun to aisaa lagtaa hai haafiza khatm ho gayaa hai main tujh ko paa kar hi mutmain huun ab aur koi talab nahin hai jo aaj tak thaa nasib se vo mutaalba khatm ho gayaa hai"

"anaa kaa bojh kabhi jism se utaar ke dekh mujhe zabaan se nahin ruuh se pukaar ke dekh meri zamin pe chal tez tez qadmon se phir us ke baad tu jalve mire ghubaar ke dekh ye ashk dil pe girein to bahut chamaktaa hai kabhi ye aaina tezaab se nikhaar ke dekh na puchh mujh se tire qurb kaa nasha kyaa hai tu apni aankh mein Dore mire khumaar ke dekh zaraa tujhe bhi to ehsaas-e-hijr ho jaanaan bas ek raat mere haal mein guzaar ke dekh abhi to sirf kamaal-e-ghurur dekhaa hai tujhe qasam hai tamaashe bhi inkisaar ke dekh"

"josh-e-junun mein aap kaa aanchal pakaD liyaa ghabraa ke ek saanp ne sandal pakaD liyaa aansu ba-zid ki saath hamaare hi jaaegaa lekin ghaneri palkon ne kaajal pakaD liyaa ye mashvara hai aap bhi ham-raaz DhunD lein ham ne to ik mahalle kaa paagal pakaD liyaa tere tasavvuraat se fursat nahin mujhe is bhuut ne to gaanv kaa pipal pakaD liyaa ham khud ko 'aql-mand jataate to kis tarah so ye kiyaa ik 'aql se paidal pakaD liyaa"

"jism phulon ke gaThile ho gae narm lahje bhi nukile ho gae kyaa andhere ke labon mein zahr thaa raushni ke honT niile ho gae inkisaari aur anaa ki jang mein mere andar do qabile ho gae 'ishq ki faslein abhi pakki nahin sabr ke phal to rasile ho gae saans ukhDegi abhi to dekhnaa aandhiyon ke kas to Dhile ho gae ham andhere mein bahut sarsabz the raushni paDte hi piile ho gae"

"ye jo paude hain junun ke ye javaan bhi honge rashk-e-sahraa hi nahin rashk-e-khizaan bhi honge itnaa nazdik se mat dekh miri aankhon ko in mein kuchh pichhli mohabbat ke nishaan bhi honge pyaas hi pyaas hai binaai ke kashkolon mein ashk aankhon se bacheinge to ravaan bhi honge us ki khushbu hi nahin aati miri saanson se ghaur se dekhiye honTon ke nishaan bhi honge ye jo lapTein abhi uTThi hain miri shohrat ki in mein kuchh log abhi jal ke dhuaan bhi honge"

"tumhein kyaa shai chhupaani paD gai hai labon par kyaa nishaani paD gai hai mohabbat khel samjhe khuub khele magar tum se nibhaani paD gai hai tiraa bachnaa bahut mushkil hai jaanaan tire pichhe javaani paD gai hai jo 'izzat dar-ba-dar ho kar kamaai tire dar par ganvaani paD gai hai hasin itnaa hai meraa jaani dushman 'adaavat bhi nibhaani paD gai hai"

"‘uqaabi zor khush-fahmi mein aksar TuuT jaataa hai havaaein gher leti hain to shahpar TuuT jaataa hai kinaare to maze se baiTh kar sairaab hote hain magar lahron ko Dhone mein samundar TuuT jaataa hai kahin nazrein jamaaun to jalan hoti hai aankhon mein zaraa palkein jhapaktaa huun to manzar TuuT jaataa hai calender bhi kahaan tak khasta-haali ko chhupaaeinge nai jaghon se rozaana palastar TuuT jaataa hai miraa dushman pareshaan hai miri maan ki du'aaon se vo jab bhi vaar kartaa hai to khanjar TuuT jaataa hai kabhi insaan ke haalaat aise bhi bigaDte hain ki bigDi ko banaane mein muqaddar TuuT jaataa hai"

"dabi kuchli hui sab khvaahishon ke sar nikal aae zaraa paisa huaa to chyunTiyon ke par nikal aae jahaan masrufiyat ki tegh main ne haath se rakkhi nihattaa dekh kar yaadon ke sab lashkar nikal aae tumhaare paas ho tadbir kaa ikkaa to batlaao hamaari 'aql ke patte to sab joker nikal aae"

"jaise masli hui si chaadar ke shal nikalte nahin muqaddar ke kab vo maidaan-e-jang aaegaa paanv dukhne lage hain lashkar ke Duub kar dekhiye un aankhon mein raaz khul jaaeinge samundar ke pattharon kaa nasib chamkegaa muntazir hain hamaari Thokar ke koi meri tarah chhue to sahi aap bilkul nahin hain patthar ke"

"jo mujh pe thi vo nazr-e-inaayat bahaal kar madhosh kar mujhe meri haalat bahaal kar gumnaamiyon ke habs mein dam ghuT ke rah gayaa badnaam kar mujhe miri shohrat bahaal kar bazm-e-khayaal suuni paDi hai tire baghair masnad sanbhaal dil ki sadaarat bahaal kar is khaamushi ne mujh ko giraan-gosh kar diyaa ik chikh maar meri samaa'at bahaal kar ab chaahtaa huun takhliya tere khayaal se kuchh din mire dimaagh ki khalvat bahaal kar rone se chain miltaa hai lekin rulaae kaun ai malika-e-sukun aziyyat bahaal kar"

"dard-e-dil ki koi davaa hi nahin is liye main to sochtaa hi nahin ab to main sirf jiit saktaa huun haarne ko to kuchh bachaa hi nahin tum se bichhDaa huun aur zinda huun yaa'ni jaise ki kuchh huaa hi nahin jab se aahon kaa silsila TuuTaa saans lene mein zaaiqa hi nahin yaa'ni allaah vaale bas tum ho aur meraa koi khudaa hi nahin mujh ko bhule na bhuul paaegaa main ne ab tak tujhe chhuaa hi nahin"

"sabr ke phal ab rasile ho gae ab tumhaare gham nashile ho gae ek pagDanDi saDak banne ko hai khauf se kuchh peD piile ho gae inkisaari aur anaa ki jang mein mere andar do qabile ho gae ham andhere mein bahut sarsabz the raushni paDte hi piile ho gae kyaa andhere ke labon mein zahr thaa raushni ke honTh niile ho gae"

"mohabbat ke nashe mein chuur hain ham har ik gham ki pahunch se duur hain ham kai aankhein hamein pahchaanti hain hasinon mein bahut mashhur hain ham bas ab jaise hain tere saamne hain bataa ab kyaa tujhe manzur hain ham vafaa imaan-daari be-niyaazi puraane vaqt kaa dastur hain ham vo is darja hasin hai kyaa bataaein mohabbat ke liye majbur hain ham abhi to pyaar se dekhaa hai us ne abhi dilli se kaafi duur hain ham"

"tumhaare shahr se aati hui havaa ki qasam tamaam zakhm hare ho gae khudaa ki qasam tamaam jism mahakne lagaa hai apne aap badan mein phaili hui 'ishq ki vabaa ki qasam khushaamadon se miraa kaam ban gayaa lekin zamir maar diyaa main ne iltijaa ki qasam tumhein pukaar ke ham aaj tak hain sharminda tumhaare kaan se lauTi hui sadaa ki qasam agarche ibn-e-'ali ki main khaak-e-paa bhi nahin magar main pyaas kaa dariyaa huun karbalaa ki qasam main tum ko phone karungaa na tum mujhe message tumhein ghurur ki mujh ko miri anaa ki qasam"

"havaa ke chalte hi baadal kaa saaf ho jaanaa jo habs TuTnaa baarish khilaaf ho jaanaa mire khamir ki dahqaaniyat jataataa hai ye tum se mil ke miraa shiin qaaf ho jaanaa ghurur-e-husn se koi umiid mat karnaa khataaein karnaa to khud hi muaaf ho jaanaa main tez dhuup mein jal kar bhi yaad kartaa huun vo sard raat mein us kaa lihaaf ho jaanaa mujh aise shakhs ko raushan-zamir kar degaa vo be-qaraar hai ye inkishaaf ho jaanaa"

"maraz ke vaaste itni davaa ziyaada hai mire savaal se teri ataa ziyaada hai tumhaari subh mein ek rang hai nadaamat kaa mujhe bhi raat se khauf-e-khudaa ziyaada hai miri vafaaon ki ujrat tumhaari jaan mein hai mire hisaab se ye khun-bahaa ziyaada hai sharaab-e-ishq hai donon ke jaam mein lekin miri sharaab mein khun-e-vafaa ziyaada hai na jaane Dhal gayaa kaise main tere saanche mein mire mizaaj mein vaise anaa ziyaada hai ye shohratein nae dushman bahut banaati hain sambhal ke rahnaa tumhaari havaa ziyaada hai"

"kai dinon ke liye be-qaraar karte hue guzar gayaa koi aankhon se pyaar karte hue hiran ki aankh mein kyaa jaane kaisaa jaadu thaa ki haath kaanp rahe the shikaar karte hue vo us gaDhe ki jo miTTi thi ab nahin milti ye baat soch le dariyaa ko paar karte hue zamir maar diyaa khvaahishaat ne shaayad zaraa bhi sharm na aai udhaar karte hue kisi ne fard-e-shab-e-hijr maang li mujh se jhijak rahaa thaa main aahein shumaar karte hue kuchh apni vaa'da-khilaafi ki intihaa kiije ki sharm aane lagi e'tibaar karte hue"

"khud apni khaal se naakhun judaa kiyaa gayaa thaa vo mujh ko yaad thaa qasdan bhulaa diyaa gayaa thaa bhaTak rahi hai miri aatmaa dhuaan ban kar main vo charaagh huun jis ko bujhaa diyaa gayaa thaa ye koi baat hai aatish-parast logon ki kal ek peD ko zinda jalaa diyaa gayaa thaa mire labon pe bhi lab rakh diye gae the magar miri zabaan ko pahle sukhaa diyaa gayaa thaa tumhein bhi khvaab dikhaaeinge vo shahaadat ke mujhe bhi qatl se pahle sulaa diyaa gayaa thaa"

"tu milaa to 'ishq ke armaan mukammal ho gae dil ke darvaaze hamesha ko muqaffal ho gae gudDiyon mein laa'l hote hain ye saabit ho gayaa TaaT ke parde tire jalvon se makhmal ho gae gham ki kaali raat ummidon pe ham ne kaaT di jab khushi ki chaand raat aai to baadal ho gae dil mein ug aai hain itni uljhanon ki jhaaDiyaan teri yaadon ke jo baaghiche the jangal ho gae ab to apnaa daaman-e-rahmat miri jaanib uchhaal teri jaanib phaile phaile haath bhi shal ho gae"

"ek Thahre hue taalaab mein halchal kar ke chain paaegaa na tu bhi mujhe be-kal kar ke teri aankhon ko diyaa vaqt to lab chhuT gae main ne dekhaa hi nahin tujh ko mukammal kar ke apne joban ki tarah tu bhi hai alhaD jaanaan tu ne sone ko pahan rakkhaa hai pital kar ke teri baahon ke havasnaak taassur ki qasam tu ne chhoDaa hai miraa jism mo'attal kar ke"

"mire andar to ab main bhi kahaan huun bahut din se bas ik khaali makaan huun banungaa jaane kin lafzon kaa paikar main kaaghaz aur qalam ke darmiyaan huun bujhaa kar bhi mujhe bechain hai vo ab us ki aankh mein chubhtaa dhuaan huun buDhaapaa aa gayaa vahshat pe lekin main sahraa ke liye ab bhi javaan huun mu'aafi chaahtaa huun bolne ki mujhe ehsaas hai main bad-zabaan huun"

"daad lene ke liye ab ye hunar bhi chaahiye shaa'iri ko aaj-kal performer bhi chaahiye lawn mein halki chahal-qadmi se kyaa taskin ho paanv ki jaulaaniyon ko ik safar bhi chaahiye sachchi khabron par kahaan akhbaar chaltaa hai miyaan tazkaron ke vaaste jhuTi khabar bhi chaahiye ham bhi sabza hi ugaa leinge dar-o-divaar par haan magar is ke liye ghaalib saa ghar bhi chaahiye sirf abru ki kaTaari se koi martaa nahin qatl karne ke liye tir-e-nazar bhi chaahiye"

"meri taasir teraa jaadu bhi aazmaanaa hai ab ye pahlu bhi kyaa shab-e-vasl mein ye jaaez hai main bhi sone lagaa huun aur tu bhi ab bataao nibaah paaogi bad-zabaan huun main aur bad-khu bhi itnaa chillaa ke kyaa huaa haasil main bhi khaamosh ho gayaa tu bhi ik nishaani thi vasl ki jaanaan aakhirash mar gai vo khushbu bhi"