Ghazal

"kisi qimat adab se main daghaa-baazi nahin kartaa zamin-e-shaa'iri mein sirf laffaazi nahin kartaa jo 'aalim hain na jaaein ghair-islaami nikaahon mein kuchh aisaa faisla hargiz koi qaazi nahin kartaa jo 'arz-e-haal hai us haal se vaaqif zamaana hai isi khaatir bayaan main qissa-e-maazi nahin kartaa tamanna chhoD de vo raahat-e-duniyaa-o-uqbaa ki khudaa-e-paak ko jo shakhs bhi raazi nahin kartaa samajh letaa huun ai 'sajjaad' pahle haqq-o-baatil ko andhere mein kabhi main tir-andaazi nahin kartaa"

"tamaam 'umr yahi aarzu kiye jaao mile vo yaa na mile justuju kiye jaao nahin surur to yaad-e-surur kyaa kam hai tum aaj zikr-e-sharaab-o-subu kiye jaao yaqin karo ki milegi zarur manzil-e-dost magar ye shart bhi hai justuju kiye jaao kisi ki shokh nazar se nazar jo mil jaae zabaan khamosh rahe guftugu kiye jaao farishte rashk kareinge falak pe ai 'sajjaad' tum apne daaman-e-tar se vuzu kiye jaao"

"zehn jab fikr-saaz hotaa hai khuub raaz-o-niyaaz hotaa hai 'ishq nazzaara-baaz hotaa hai husn majbur-e-naaz hotaa hai fitratan ibtidaa-e-ulfat mein ek rang-e-majaaz hotaa hai har nazar ke khamosh naghmon mein mahshar-e-soz-o-saaz hotaa hai kaun kyaa hai yahaan pe ai 'sajjaad' aaj bhi imtiyaaz hotaa hai"

"duniyaa mire daaman ki havaa maang rahi hai din raat sanvarne ki du'aa maang rahi hai khud zindagi jiine ki du'aa maang rahi hai gesu se tiri kaali du'aa maang rahi hai gulshan ki kali mauj-e-sabaa maang rahi hai har shaakh ke honTon pe sadaa maang rahi hai khvaabon se khayaalon se khataa maang rahi hai ye raat bilaa jurm sazaa maang rahi hai ne'mat thi miri jaan magar maang rahi hai jiine ke liye rab se du'aa maang rahi hai khushbu se mohabbat se 'inaayat se karam se phir vaadi-e-dil ThanDi havaa maang rahi hai har saans ghanimat hai yahaan aaj bhi 'sajjaad' har saans miri rab ki razaa maang rahi hai"

"kahin ham na honge to kyaa kijiyegaa kisi aur se dil lagaa lijiyegaa miri yaad aae to logon se bach kar akele mein aansu bahaa lijiyegaa agar pyaas se main lab-e-jaan Thahrun nigaahon se thoDaa pilaa dijiyegaa agar phir kisi moD par saamnaa ho zaraa pyaar se muskuraa dijiyegaa salaamat rahe aap ki bevafaai hamaare liye bhi du'aa kijiyegaa hamein aap ki dosti par yaqin hai jo chaahegaa dil vo sazaa dijiyegaa hamaare tabib-e-mohabbat se kahnaa zaraa dil lagaa kar davaa kijiyegaa bhari bazm se uTh ke 'sajjaad' saahib diyaa ghar ke andar jalaa lijiyegaa"

"yuun lag rahaa hai josh mein Dhalne lagi hai shaam aur vaqt kaa mizaaj badalne lagi hai shaam chaTTaan ban ke saamne aai hai kaali raat aangan mein mere jab se Tahalne lagi hai shaam fasl-e-bahaar aa gai phir bazm-e-yaar mein kis kis adaa se dekh machalne lagi hai shaam dukh dard ne har ik su lagaa di hai kaisi aag aahon ki garmiyon se pighalne lagi hai shaam kis tarh bach sakegi vatan teri aabru nafrat kaa zahr kaise ugalne lagi hai shaam 'sajjaad' ne diyaa hai mohabbat bharaa payaam is pyaar ki sadaa pe machalne lagi hai shaam"

"pyaar mein shart kisi tarh ki manzur nahin ham agar duur nahin tum bhi to majbur nahin vaqt aane do bahut log mileinge tum ko kyaa samajhte ho ki ab 'sarmad'-o-'mansur' nahin maantaa huun ki adaaein hain tiri tauba-shikan jo bhi hai phir bhi tu jannat ki koi huur nahin chal paDo to nahin is baat kaa hogaa ehsaas duur hai manzil-e-maqsud magar duur nahin vo jo chaahe to har ik chiiz ko haasil kar le ‘mir-sajjaad' jise kahte hain maa'zur nahin"

"musaafir chale the abhi tak na pahunche ye afvaah teri gali tak na pahunche nae poe khud saanp hi ki ghizaa hai ye fitna kahin aadmi tak na pahunche vo kyaa sar kareinge samundar ki maujein jo chal ke khud apni nadi tak na pahunche ziyaada mohabbat se dil kaanptaa hai kahin ye karam be-rukhi tak na pahunche zamaane se 'sajjaad' ham chal rahe hain magar aaj bhi raushni tak na pahunche"

"bosida raaston ke musaafir badal gae ab to puraane log bhi aakhir badal gae fanni nazaakaton kaa zamaana guzar gayaa jo apne fan mein log the maahir badal gae sab apne hi vujud mein gum ho ke rah gae haalaat-e-zindagi ke manaazir badal gae pahchaan mein na aae qayaafa se koi shakhs ab aadmi ke baatin-o-zaahir badal gae 'sajjaad' gulsitaan ke bulbul hue faraar aisi havaa chali hai ki shaa'ir badal gae"

"parvaana-sifat jaan ki parvaa nahin karte miT jaate hain vo 'ishq ko rusvaa nahin karte tum aur baDhaa dete ho uljhan mire dil ki taskin ki surat kabhi paidaa nahin karte ik main huun tumhaare liye jaan dene ko tayyaar ik tum ho ki vaa'da kabhi iifaa nahin karte hai dafn mire siine mein har raaz-e-mohabbat mar jaaeinge par raaz ko ifshaa nahin karte ai 'mir' koi chaara na thaa is ke 'alaava kyaa karte jo ham teri tamanna nahin karte"

"dil ho gayaa phaphulaa pyaare tamaam jal ke kyaa tujh nihaal se hon ummid-vaar phal ke tanhaa na dil mire ne zulfon se taab khaayaa gulshan ke biij sumbul khaataa hai taab bal ke aise tire jhamakte daanton ko dekh pyaare paani ho jaae moti maare na kyuun ki jhalke kyaa jaantaa thaa mujh ko rusvaa kareinge sab mein ye tifl-e-ashk mere aankhon ke biich pal ke"