Ghazal

"ghar ko bhi kar diyaa viraane mein shaamil main ne zauq-e-vahshat ko mire vo bhi to kaafi na huaa na huaa us pe bhi vo shokh vafaa kaa qaail zulm hans hans ke sahe aur kabhi shaaki na huaa duun kis ummid pe ab jaan ki vo zulm-shi'aar kuche mein apne mire dafn pe raazi na huaa jis ne un mast-nigaahon se milaain aankhein phir vo minnat-kash-e-paimaana-e-saaqi na huaa baada gar khuld mein hai sab ke liye amr-e-mubaah jis ne masjid mein piyaa vo bhi to aasi na huaa dil mein jab hook uThi zabt-e-fughaan kar na sakaa raaz is ghar kaa jo thaa mujh se vo makhfi na huaa 'umr jis dasht mein majnun ne guzaari apni vo mire zauq-e-junun ke liye kaafi na huaa"

"qufl-e-zindaan aaj kholaa jaaegaa laash qaidi ki nikaali jaaegi aa rahaa hai un kaa ab 'ahd-e-shabaab zulm ki buniyaad Daali jaaegi zindagi bhar ham rahe mahrum-e-did saath tasvir-e-khayaali jaaegi aa rahi hai zulf un ki taa-qadam kis kamar se ye sanbhaali jaaegi sajda-gaah-e-'aam hogaa un kaa dar qaid masjid ki uThaa li jaaegi zulm Dhaane vaale ye bhi jaan lein aah-e-mazlumaan na khaali jaaegi sajda-e-but se agar rokaa gayaa ik nai masjid banaa li jaaegi fasl-e-gul mein daa'vat-e-pir-e-mughaan shaikh saahab se na Taali jaaegi"

"kis tarh vo 'aalam ko na divaana banaa de ye husn ye andaaz-o-adaa jis ko khudaa de dekhi nahin jaati hai kisi se miri haalat ab vo bhi ye kahte hain khudaa us ko shifaa de phir hosh ke 'aalam mein bhalaa aauun main kyunkar ghash mein mujhe daaman se jo vo apne havaa de jaan-baazi-e-parvaana pe kiije na ta'ajjub qismat hai jise himmat-e-mardaana khudaa de vo dekh ke kahte hain miri naz' mein uljhan yuun maut javaani mein kisi ko na khudaa de kyaa jaane vo kyaa lutf hai aashufta-sari mein jab tak na kisi ko dil-e-divaana khudaa de muusaa talab-e-did pe israar na kiije kyaa ho jo naqaab-e-rukh-e-raushan vo uThaa de khilqat ki zabaan kaa hai ye adnaa saa karishma thoDi si ho baat aur vo afsaana banaa de aae hain 'ayaadat ko sirhaane dam-e-aakhir allaah miri naz' ke lamhaat baDhaa de kyon sajde mein us ke na jhukein sab ki jabinein ik khaak ke putle ko jo insaan banaa de"

"kitne hi paa-e-sanam par kiye sajde main ne kabhi puuraa na huaa shauq jabin-saai kaa muskuraahaT lab-e-naazuk pe nigaahein nichi kis se sikhaa hai ye andaaz dil-aaraai kaa aa gayaa un kaa shabaab un ki nigaahein badlin baDh gayaa shauq unhein kuchh sitam-aaraai kaa jalve khud husn-e-jahaan-taab ke phaile har su jab huaa shauq unhein anjuman-aaraai kaa dafn kar ke mujhe rukhsat hue yaar-o-ahbaab tuul ab hashr talak hai shab-e-tanhaai kaa"

"havaa ne ye kiyaa ehsaan ki jaa kar un ke aivaan mein miraa rang-e-parida bhar diyaa tasvir-e-jaanaan mein bagule hain na sahraa hai na saaein saaein aavaazein lagegaa ji hamaaraa kis tarah se baagh-e-rizvaan mein unhin ki yaad jannat mein bhi taDpaane lagi dil ko na dekhi jab adaaein un ke aisi hur-o-ghilmaan mein bagule hain faqat ik munis-e-tanhaai sahraa mein inhin ke saath mein har samt phirtaa huun bayaabaan mein nazar lagne kaa un ke vaaste ganDaa banaane ko bachaa rakkhe hain main ne taar kuchh apne garebaan mein junun-e-'ishq thaa makhsus mujh se baa'd majnun ke na aayaa baa'd mere koi divaana bayaabaan mein mah-o-maa'shuq ho abr-e-bahaaraan ho gulistaan ho isi kaa naam jannat hai nigaah-e-hosh-mandaan mein nasihat ke bahaane se janaab-e-shaikh aae hain nazaara kar rahe hain baiTh kar bazm-e-hasinaan mein"

"bachpanaa guzraa aayaa 'ahd-e-shabaab uD gai niind dekhne lagaa khvaab chaandni phaili hai mire ghar mein jaagtaa huun ki dekhtaa huun khvaab talab-e-did par giri bijli chaahne vaale kaa yahi thaa javaab kyon na phir ghash pe ghash mujhe aae un ko aaghosh mein liye hai shabaab zulfein bikhri hain ru-e-anvar par jaan-e-‘aashiq pe hai do-guna 'azaab bhejaa masjid se mai-kade ki taraf shaikh ko bhi dikhaa di raah-e-savaab hasratein saari mar gaiin dil ki kaisaa aabaad ghar huaa hai kharaab mausam-e-gul ho saaghar-e-mul ho but-e-raa'naa ho aur 'ahd-e-shabaab na rahe phir namaaz ki haajat shaikh gar pi lein ek jaam-e-sharaab aasmaan par jo maah-e-kaamil hai ham ne dekhaa zamin pe us kaa javaab kis ne rukh se naqaab ulTi hai maah-e-kaamil ko aa rahaa hai hijaab"

"mujh se puchho vo dilrubaa kyaa hai aur qayaamat kaa saamnaa kyaa hai husn ki ik adaa taghaaful hai vo nahin jaantaa jafaa kyaa hai husn-e-sho'la-fashaan se khvaahish-e-did ai hakim aap ko huaa kyaa hai miri haalat ko dekh kar samjho husn kyaa chiiz hai adaa kyaa hai dil mein rah rah ke Tiis uThti hai yaa-ilaahi ye maajraa kyaa hai 'ishq aur mah-vashaan-e-ghamza-o-naaz tujh ko ai 'shams' ye huaa kyaa hai"

"rusvaa kare mujhe ki asir-e-balaa kare jo chaahe vo miraa dil-e-dard-aashnaa kare raazi huun main vo qatl kare yaa jafaa kare bas mein kisi ke dil na kisi kaa khudaa kare muusaa na taab laae tabassum ki ek din main chaahtaa huun roz ye bijli giraa kare meri tarah kaa dil na kisi ko nasib ho un ki tarah javaan na kisi ko khudaa kare maqsud imtihaan miri himmat kaa hai agar har roz aashiyaane pe bijli giraa kare be-khaTke aao hashr mein ulTe hue naqaab kis ki majaal hai jo tumhaaraa gila kare haan muskuraa ke naaz se angDaai lijiye bijli kisi ke dil pe gire to giraa kare jis dil ki 'shams' koi na hasrat nikal sake mar jaae vo gharib na aakhir to kyaa kare"

"kambakht ho buraa dil-e-khaana-kharaab kaa mujh par 'azaab kar diyaa 'aalam shabaab kaa dekhaa jo main ne naama-e-aa'maal hashr mein qissa likhaa thaa mere aur un ke shabaab kaa hain yaad un ki aaj talak dil-farebiyaan kuchh der khvaab dekhaa thaa ham ne shabaab kaa mere liye to donon qayaamat se kam na the tifli kaa un ki 'ahd zamaana shabaab kaa dekhi jo achchhi shakl tabi'at machal gai kuchh puchhiye na haal hamaare shabaab kaa 'aalam mein ghaflaton ke vo donon guzar gae tifli kaa 'ahd aur zamaana shabaab kaa ham ne bhi dil ko thaam liyaa sun ke ye khabar ab aa gayaa hai un kaa zamaana shabaab kaa garmi baDhi ragon mein lahu dauDne lagaa piiri mein yaad aayaa zamaana shabaab kaa hoti hain dard-e-dil mein bhi mahsus lazzatein hai haasil-e-hayaat zamaana shabaab kaa"

"fitna-zaa vahshat-fazaa daam-e-qazaa hote gae jis qadar baDhte gae gesu balaa hote gae husn bhi baDhtaa gayaa jitnaa shabaab aataa gayaa dekhne ki chiiz vo naam-e-khudaa hote gae jis qadar baDhtaa gayaa soz-e-darun 'ushshaaq kaa tirgi ghaTti gai dil aaina hote gae 'shams' kaam aaiin na kuchh apni ziyaa-afshaaniyaan roz gardish mein falak ki mubtalaa hote gae"

"hai shaana-kash rafiq jo gesu-e-yaar mein rag-rag hai mere dil ki ghazab ke fishaar mein aadam bhi aa ke roe yahaan hijr-e-yaar mein ye rasm hai qadim is ujDe dayaar mein jaage the shab ko soe hain din ko mazaar mein duniyaa hui idhar se udhar hijr-e-yaar mein jaadu bharaa thaa us nigah-e-sharmsaar mein milte hi aankh dil na rahaa ikhtiyaar mein ham tinke chun rahe hain nasheman ke vaaste bijli chhupi hai daaman-e-abr-e-bahaar mein aae 'adam se gulshan-e-hasti ki sair ko daaman ulajh gayaa hai yahaan khaarzaar mein aankhein lagi hain dar pe nikaltaa nahin hai dam Thahri hui hai ruuh tire intizaar mein josh-e-junun ne dasht ko gulzaar kar diyaa hai khuun mere paanv kaa har nok-e-khaar mein gesu ki yaad hai kabhi rukh kaa khayaal hai kaTti hai 'umr ab isi lail-o-nahaar mein masjid mein jaa ke dekhiye vaa'iz kaa haal-e-zaar parhez-e-mai zabaan pe hai aankhein khumaar mein qaatil ko mere samjhe the dushman koi miraa niklaa talaash se vo mire dost-daar mein 'ishq-e-butaan ne kar diyaa meraa tabaah haal kis ko hai dakhl maslahat-e-kirdgaar mein yaan josh-e-girya aur vahaan hukm-e-zabt hai paD jaati hai girah mire ashkon ke taar mein gardish pe apni 'shams' hamein sabr aa gayaa kis ko milaa sukun is ujDe dayaar mein"