Ghazal

"jab achchhe the din raat kam yaad aae buraa vaqt aayaa to ham yaad aae jo samjho mohabbat ki tauhin hai ye sitam-gar se pahle sitam yaad aae zamaane se jab paD gayaa vaasta to tiri zulf ke pech-o-kham yaad aae mili jo mohabbat ke badle mein nafrat hamein ahl-e-duniyaa ke gham yaad aae hansi aa gai un ki baaton pe yunhi vo samjhe ki un ke karam yaad aae jo hans kar kisi ne kisi se kahaa kuchh hamein bhi kisi ke sitam yaad aae kabhi dil ko dil se jo dekhaa bichhaDte 'sadaf' ko tumhaare karam yaad aae"

"dard ko dard kaho dard ke qaabil ho jaao aisaa bhi kyaa hai ki khud dil hi se ghaafil ho jaao tum ko tufaan se laDnaa jo nahin hai manzur phir to behtar hai ki kashti nahin saahil ho jaao imtihaan ishq mein honaa hai to hogaa vo zarur aag ke khel mein pahle hi se shaamil ho jaao is se pahle ki kisi aur kaa main ho jaaun main tumhein zahr duun aur tum mire qaatil ho jaao lau charaaghon ki baDhaane se nahin kuchh haasil nuur ban ke shab-e-zulmaat pe naazil ho jaao saikDon tajrabe be-kaar kiyaa karte ho ho mire dard mein shaamil to miraa dil ho jaao shor barpaa hai ki nikle ho talaash-e-gham mein makhzan-e-gham hai miraa dil yahin daakhil ho jaao ahmaqon se jo kabhi vaasta paD jaae 'sadaf' baat karne se kahin achchhaa hai jaahil ho jaao"

"kabhi anjaane mein jab bhi kisi kaa dil dukhaataa huun to phir tanhaaiyon mein baiTh kar aansu bahaataa huun mujhe maalum hai manzar hasin vo ho chuke dhundle magar kyuun roz aankhon mein vahi manzar bulaataa huun miri is baat se naaraaz hain kuchh bastiyon vaale khushi ghar ghar luTaataa huun magar gham kyuun chhupaataa huun miri saanson ki quvvat kaa bahut mushkil hai andaaza main phunkon se charaaghon ko nahin suraj bujhaataa huun miri fitrat hai apne haafize ko taaza rakhne ki main apnaa haafiza kamzor hone se bachaataa huun"

"raaz tak zehn ko rasaai de aur aankhon ko tu dikhaai de raah pe dil rahe javaani mein mujh ko is 'umr mein sujhaai de asl chehra dikhaai de tab naa ab kise kaun munh-dikhaai de main kahin devtaa na ban jaaun meri sirat mein kuchh buraai de mere hisse mein ‘izzat-o-shohrat itni de ghair ko dikhaai de shor mein tu bhi kyon 'sadaf' gum hai apni aavaaz mein sunaai de"

"ham apni mohabbat kaa tamaashaa nahin karte karte hain agar kuchh to dikhaavaa nahin karte ye sach hai ki duniyaa ki ravish Thiik nahin hai kuchh ham bhi to duniyaa ko gavaaraa nahin karte ik baar to mehmaan banein ghar pe hamaare ye un se guzaarish hai taqaazaa nahin karte duniyaa ke jhamele hi kuchh aise hain ki un ko ham bhuul to jaate hain bhulaayaa nahin karte fardaa pe hain nazrein to kabhi haal pe nazrein maazi ko magar muD ke bhi dekhaa nahin karte jin mein ki buzurgon ki koi qadr nahin ho ham aise gharon mein kabhi rishta nahin karte baarish ho ki tufaan ho yaa aag kaa jangal ham ghar se nikal jaaein to sochaa nahin karte jo khvaab nazar aataa hai sarsabz zamin kaa us khvaab ki taabir bataayaa nahin karte baazaar mein bikte nahin vo log umuman rishton kaa jo apne kabhi saudaa nahin karte"

"ye zarf ki tu khush hai kahin rishta joD ke naadim zamir meraa tiraa saath chhoD ke yuun to abhi abhi miri aankhein hui thiin band lekin azaan-e-dil ne jagaayaa jhinjhoD ke is ek chehre mein kai chehre simaT gae ik aaina banaayaa hai kirchon ko joD ke di bhaaiyon ne mujh ko jo hisse mein buDhi maan dozakh mein jaa ke baiThe hain jannat ko chhoD ke aaegaa zindagi mein ye din bhi kabhi 'sadaf' laaungaa aasmaan se sitaaron ko toD ke"

"nazar sab ki havas kaa ik makaan hai yahaan koraa badan miltaa kahaan hai zamaane kaa asar hai ye bhi shaayad miri aavaaz mujh se bad-gumaan hai jahaan bachpan ko hanstaa chhoD aae vahaan yaadon kaa ab bargad javaan hai anaa ki jang jitun ab ki haarun ki har haalat mein meraa hi ziyaan hai mujhi mein DhunDh lo mil jaae shaayad 'sadaf' ko puchhte ho tum kahaan hai"

"jab se ham chup-chaap ghar rahne lage kyaa kahein divaar-o-dar kaise lage unche qad vaalon se ki jab dosti apne qad ke log hi achchhe lage mehrbaani vaqt ki hai aur kyaa ham jo kuchh logon se ab milne lage kyaa kahein ye ho gayaa hai kyaa hamein khud pe ronaa thaa magar hansne lage bolte jaate the jaane kis se kyaa khud ko ab chup-chup se ham kaise lage qimti kapDon ke taajir ho 'sadaf' kyaa magar khud ko kabhi nange lage"

"mere khayaal-o-khvaab mein surat usi ki thi meri bujhi nazar ko zarurat usi ki thi suraj to apne saath liye dhuup Dhal gayaa lekin vo dar se lipTi tamaazat usi ki thi duniyaa ki uljhanon se agar thaa main be-khabar shaamil mire gunaah mein vahshat usi ki thi ashkon ko qaid kar ke bhalaa kyaa ghazab kiyaa aankhein usi ki aur zarurat usi ki thi ye aur baat hai ki thi khaamosh zindagi lekin hamaari maut se nisbat usi ki thi har chand ai 'sadaf' vo rahaa ham se duur duur lekin hamaare dil pe hukumat usi ki thi"

"junun mein dhyaan se aakhir phisal gai koi shai na jaane kis ki duaa se sambhal gai koi shai abhi abhi miri aankhon mein kuchh dhuaan saa uThaa abhi abhi mire siine mein jal gai koi shai bahut sambhaal ke rakhne ki ham ne koshish ki hamaare haath se phir bhi nikal gai koi shai main jab bhi dekhtaa huun zindagi kaa pichhlaa varaq to aisaa lagtaa hai dil mein kuchal gai koi shai hamaari zindagi garche thi muntashir pahle jo vaqt aayaa to saanche mein Dhal gai koi shai na koi zauq-e-tamaashaa na koi rang-e-hayaat zaruraton ke bahaane badal gai koi shai"

"aaina aisaa kabhi dekhaa na thaa mere chehre mein miraa chehra na thaa niind lipTi rah gai is khvaab se dar-haqiqat khvaab jo apnaa na thaa ik paDosi dusre se naa-balad be-muravvat shahr to itnaa na thaa raushni kaa ye bhi hai ik tajraba main jahaan bhaTkaa thaa andhiyaaraa na thaa haath jo kholaa to bachcha ro paDaa band muTThi mein koi sikka na thaa"

"mahrumiyon kaa mujh ko jo aadi banaa diyaa main puchhtaa huun tujh se diyaa bhi to kyaa diyaa haan ai hujum-e-ashk ye achchhaa nahin huaa tu ne hamaare zabt kaa rutba ghaTaa diyaa kaise amaan milegi hamein tez dhuup se suraj ne har darakht kaa saaya jalaa diyaa ik ajnabi ki baat mein jaadu kaa thaa asar patthar dilon mein dard-e-mohabbat jagaa diyaa jab apne saath saath thaa khush-haal thaa bahut khud se bichhaD ke khud ko gadaagar banaa diyaa kal raat tere vaade kaa bhi khul gayaa bharam zakhmon ko hanste dekh ke main muskuraa diyaa rangini-e-bahaar ke ham muntazir hain kyuun baad-e-khizaan ne rang-e-gulistaan uDaa diyaa dil kaa charaagh khud hi jalaayaa kabhi 'sadaf' aur khud hi us charaagh ko aakhir bujhaa diyaa"

"ye jo lambi raat hai yaaro kuchh hi din ki baat hai yaaro khaamoshi kaa shor se rishta ye bhi ajab si baat hai yaaro daagh dilon ke dhul jaaeinge aankhon mein barsaat hai yaaro paas na maayusi aa jaae insaan ke liye ye maat hai yaaro shikva nahin kuchh mushtaaq sadaf ko kam se kam vo saath hai yaaro"

"rafta rafta Dar jaaeinge qiston mein ham mar jaaeinge main ne chughli khaai to phir dushman bhukon mar jaaeinge hikmat se aari mansube kitnon ke dar par jaaeinge andar aisi khaamoshi hai sannaaTe bhi Dar jaaeinge haivaanon se bach kar rahiye sahraa ko bhi char jaaeinge"