Ghazal

"meraa tan sar se judaa karte hi bekal ho gayaa vo adhuraa rah gayaa aur main mukammal ho gayaa husn ki taavil mein bas itni tabdili hui TaaT kaa TukDaa tire shaanon pe makhmal ho gayaa pahle gahre paaniyon mein us ki bud-o-baash thi ab havaa ke dosh par aayaa to baadal ho gayaa phuul ki ik zarb se aansu nikal aae mire ek halki baat kaa ehsaas bojhal ho gayaa vaqt ki nabzon pe is kaa haath bhi kamzor thaa saans ki raftaar par main bhi musalsal ho gayaa is qadar maanus thi khilqat andhere se 'nasim' raushni phuTi to saaraa shahr paagal ho gayaa"

"dost ban kar bhi kahin ghaat lagaa sakti hai maut kaa kyaa hai kisi ruup mein aa sakti hai in makaanon mein ye dhaDkaa saa lagaa rahtaa hai agli baarish dar-o-divaar giraa sakti hai teraa din ho ki miri raat nahin ruk sakte apne mehvar pe zamin khud ko ghumaa sakti hai aisi tartib se raushan hain tiri mahfil mein ek hi phunk charaaghon ko bujhaa sakti hai meraa fan mere khad-o-khaal pe taqsim huaa meri biini miri tasvir banaa sakti hai fitratan us ki mahak chaaron taraf phailegi phuul se mauj-e-sabaa shart lagaa sakti hai khush na ho itnaa ki yuun raushaniyaan phuuT paDein is chakaa-chaund mein binaai bhi jaa sakti hai gudgudaahaT mein 'nasim' us ne nahin sochaa thaa ye hansi TuuT ke bachche ko rulaa sakti hai"

"jahaan jahaan bhi havas kaa ye jaanvar jaae dilon se mehr-o-mohabbat ki fasl char jaae khule hain unchi haveli ke paaltu kutte faqir-e-raah zaraa dekh-bhaal kar jaae vahin se huun main jahaan se dikhaai detaa huun vahin tilak huun jahaan tak miri nazar jaae hai koi der se us paar muntazir meraa rukaa huaa huun ki naddi zaraa utar jaae vo baad-e-tund hai har peD ki ye koshish hai havaa ke saath koi dusraa shajar jaae hudud-e-zaat se aage khudaaon ki had hai mein sochtaa huun agar zehn kaam kar jaae bhari paDi hai ufunat se inch inch zamin is ek phuul ki khushbu kidhar kidhar jaae abhi talak tire raste mein pul-siraat pe hai guzarne vaalaa zaruri nahin guzar jaae 'nasim' gaanv ki masjid mein raat kaaTegaa ik ajnabi saa musaafir hai kis ke ghar jaae"

"itnaa na ghuum raat ko phulon ki baas mein soe paDe hain chaaron taraf saanp ghaas mein har samt us ne aatishi shishe lagaa diye saDkon pe log aae the kaale libaas mein gardish mein zindagi rahi afvaah ki tarah umrein guzaar di gaiin khauf-o-hiraas mein aglaa nisaab nur-e-basirat se paDh liyaa aankhein to chhoD aae the pahli class mein ye aur baat zer-e-zamin dafn ho gaiin varna jaDon kaa khuun hai phal ki miThaas mein ab baar baar us ki taraf dekhte ho kyaa ab sirf meri tishna-labi hai gilaas mein manzar kisi tilism ki zad mein na ho 'nasim' sarson kaa rang dauD rahaa hai kapaas mein"

"chhoTe baDe bure bhale din raat ke liye har shai hai sirf surat-e-haalaat ke liye maujud hain is aaina-khaana mein har taraf mere hi aks meri mulaaqaat ke liye jo baat sochne ki hai kab sochtaa huun mein kab sochtaa hai koi meri zaat ke liye phirti hain dil mein suratein qurb-o-javaar ki aabaad hai ye shahr mazaafaat ke liye chhoTe se peD ki jaDein jaati hain duur duur sahraa mein rizq DhunDne har paat ke liye main ruk gayaa chaDhi hui naddi ke saamne kuchh vaqt mere paas thaa barsaat ke liye ham log hain saleT pe likkhe hue 'nasim' miTnaa paDegaa agle savaalaat ke liye"

"vo mere zehn pe itnaa savaar ho gayaa thaa main kam-sini mein junun kaa shikaar ho gayaa thaa karegaa kaun tiri vusaton kaa andaaza jo ham-kanaar huaa be-kanaar ho gayaa thaa tamaam umr phir apni talaash mein guzri main apne aap se ik din faraar ho gayaa thaa mujhe ganvaa ke liyaa dil ne sujh-bujh se kaam fuzul-kharch kifaayat-shiaar ho gayaa thaa bhaTak rahaa thaa koi sar-phiri havaaon mein phir is ke baad supurd-e-ghubaar ho gayaa thaa mili thi maan ki ghulaami se ye sar-afraazi ki baadshaahon mein meraa shumaar ho gayaa thaa mujhe bhi achchhe bure ki shanaakht ho gai thi 'nasim' jin dinon be-rozgaar ho gayaa thaa"

"kis burj mein falak ne sitaare milaae hain dast-e-shab-e-firaaq mein saae hi saae hain gulzaar-e-zindagi ke hain gul-daan ke nahin ye phuul kaar-khaana-e-qudarat se aae hain khasta hue tane to jaDein phuTne lagin peDon ne apne apne badan phir ugaae hain saamaan-e-bud-o-baash thaa jangal se shahr tak ham apnaa bojh nafs ke ghoDon pe laae hain duniyaa mein itne shor-sharaabe ke baavajud jo bolte nahin hain vahi ahl-e-raae hain ham sar-phiron kaa zauq-e-sukunat na puchhiye jab shahr tang ho gae sahraa basaae hain lagtaa hai apnaa zehn bhi apnaa nahin 'nasim' khud-saakhta khayaal bhi jaise paraae hain"

"bichhaD ke tujh se tiri aarzu mein jiine se main TuT-phuT rahaa huun nae qarine se dayaar-e-'ishq mein ansaar hi na the aabaad muhaajiron ko bhi nisbat rahi madine se ruki hui hain sar-e-dast vaqt ki nabzein utar rahaa hai koi raushni ke ziine se ye dil kaa haadisa ham ko bhanvar mein pesh aayaa kahaan chhalaang lagaataa koi safine se pighal ke bhar gaiin daaman mein qimti dhaatein pahaaD aag ugalne lagaa hai siine se 'nasim' aur baraamad vahaan se kyaa hotaa bas apne Dhaanche nikal aae hain dafine se"

"badan kaa kaam thoDaa hai magar mohlat ziyaada hai so jo ghaflat ziyaada thi vahi ghaflat ziyaada hai hamein is aalam-e-hijraan mein bhi ruk ruk ke chalnaa hai unhein jaane diyaa jaae jinhein ujlat ziyaada hai na jaane kab kisi chilman kaa ham nuqsaan kar baiThein hamein chehraa-kushaai ki zaraa rukhsat ziyaada hai kabhi main khud ziyaada huun tan-e-tanhaa ki vahdat mein kabhi meri zarurat se miri vahdat ziyaada hai tujhe halqa-ba-halqa khinchte phirte hain duniyaa mein so ai zanjir-e-paa yuun bhi tiri shohrat ziyaada hai ye dil baahar dhaDaktaa hai ye aankh andar ko khulti hai ham aise marhale mein hain jahaan zahmat ziyaada hai main qarnon ki tarah bikhraa paDaa huun donon vaqton mein miri jalvat ziyaada hai miri khalvat ziyaada hai so ham fariyaadiyon ki ek apni saf alag se ho hamaaraa masala ye hai hamein hairat ziyaada hai"

"ye basti pyaar ki neamat se khaali hoti jaati hai ki har haatim ki surat bhi savaali hoti jaati hai kisi se puchh lo taabir apne apne khvaabon ki dayaar-e-misr mein phir khushk-saali hoti jaati hai ye kaise rang utre hain jinhein dekhaa nahin jaataa ye kaisi subh phuTi hai jo kaali hoti jaati hai puraane maqbaron mein bhi daraaDein paDti jaati hain nai taamir bhi naqsh-e-khayaali hoti jaati hai bahaav aae din umr-e-ravaan kaa ghaTtaa jaataa hai ye ThaaThein maarti naddi bhi naali hoti jaati hai"

"kah gayaa thaa vo kuchh ishaare se baat samjhaaein hanste taare se us se milte hi aankh bhar aai lahar ik aa lagi kinaare se gaaliyaan ab vo kyuun nahin dete kyaa khataa ho gai hamaare se kis ko jaa kar bataaun main ye baat din guzartaa nahin guzaare se bhuul jaate ho naam tak meraa kyaa tavaqqo rakhun tumhaare se"

"tamaam 'umr mayassar bas ek khaana havaa main apni zaat ke sanduq mein puraanaa huaa mahaaz-e-vaqt se agle paDaav ki jaanib main ruk gayaa to koi dusraa ravaana huaa nazar uThaa ke phalon ki taraf nahin dekhaa shajar se Tek lagaae hue zamaana huaa ye kaaenaat bhi qad ki munaasibat se thi ki ik parinde ko pattaa bhi shaamiyaana huaa 'nasim' is se baDaa ranj aur kyaa hogaa vo mujh se puchh rahaa hai ki kaise aanaa huaa"

"jis vaqt us ne bakht hamaare banaae the ham ne hatheliyon pe sitaare banaae the kuchh panchhiyon ne ghonsle peDon ke jhunD mein unchi jaghon pe khauf ke maare banaae the main ne bas ek nahr nikaali thi haath se dariyaa ne aap apne kinaare banaae the hasb-e-muraad dast-e-hunar bolne lagaa gunge ne chand aise ishaare banaae the kuchh zindagi ba-yaad-e-azizaan zarur thi kuchh dost ham ne jaan se pyaare banaae the ham ne hayaa pahan ke mohabbat-shi'aar ki guDiyon ke vaaste bhi gharaare banaae the dil mein 'nasim' husn ki takfil ke liye aankhon ne kaise kaise idaare banaae the"

"jahaan jahaan bhi havas kaa ye jaanvar jaae dilon se mehr-o-mohabbat ki fasl char jaae vahin se huun main jahaan se dikhaai detaa huun vahin talak huun jahaan tak miri nazar jaae hudud-e-zaat se aage khudaaon ki had hai main sochtaa huun agar zehn kaam kar jaae bhari paDi hai ufunat se inch inch zamin us ek phuul se khushbu kidhar kidhar jaae vo baad-e-tund hai har peD ki ye koshish hai havaa ke saath koi dusraa shajar jaae 'nasim' gaanv ki masjid mein raat kaaTegaa ik ajnabi saa musaafir hai kis ke ghar jaae"

"mein aisaa zauq-e-zebaaish ba-ru-e-kaar le aayaa ki khud-aaraai ki khaatir libaas-e-daar le aayaa zamin ki mehvari gardish se umrein ghaTti baDhti hain guzartaa vaqt saae ko pas-e-divaar le aayaa magar mujh ko ye ehsaas-e-nadaamt maar Daalegaa paraae peD se phal toD kar do chaar le aayaa ye saare log us ke haq mein raae dene vaale hain vo apni saari tasvirein sar-e-baazaar le aayaa jahaan se vaapsi kaa raasta qismat se miltaa hai vahaan tak qaafile ko qaafila-saalaar le aayaa viraasat mein 'nasim' is se baDi jaagir kyaa hogi main dil ki dhaDkanon mein apni maan kaa pyaar le aayaa"