Ghazal

"kis haal mein rahti huun kisi taur se sun le lillaah kisi aur kisi aur se sun le patthar ke bhi kaanon se lahu bahne lagegaa rudaad-e-gham-e-ishq agar ghaur se sun le ik baar nahin aisaa kai baar huaa hai dhime se agar naam luun vo zor se sun le jo dil pe guzarti hai kisi se na kahungi sunnaa hai jise jaae vo chit chor se sun le lagti hain buri aaj tujhe nuur ki baatein achchhaa to na bolungi kabhi ghaur se sun le"

"ain mumkin hai miri baat zaraa si nikle koi tasvir mire dil se tumhaari nikle aaj aangan mein tire hijr kaa suraj niklaa aaj mumkin hai mire zakhm se kirchi nikle us ne is shart pe rone ki ijaazat di hai aah nikle na labon se koi siski nikle jaan-kani vo ki farishte bhi panaahein maange aap aaein to miri aakhiri hichki nikle aise niklaa hai mire bakht kaa taaraa dekho haath se TuuT ke beva ke jyuun chuDi nikle koi aae mire jiine kaa sahaaraa ban kar shaakh se phuuT ke konpal koi aisi nikle aaj phir dil mein tire diid ki hasrat jaagi kaash phir kaam koi tujh se zaruri nikle"

"jis tarah haath ki chuDi kaa khanaknaa tai hai Thiik vaise hi mire dil kaa dhDaknaa tai hai lauT aae hain tujhe ghair ki qismat kar ke aaj ki raat to aankhon kaa chhalaknaa tai hai kaifiyat dil ki agar tu ne dikhaai mujh ko aaine phir to miraa tujh pe bhaDaknaa tai hai main ne alfaaz nahin dard piro rakhe hain ye ghazal sun ke miri jaan sisaknaa tai hai be-hisi ne to banaa Daalaa thaa patthar mujh ko is tabassum se to aanchal kaa Dhalaknaa tai hai kuchh khabar bhi hai tujhe dil ko jalaane vaale zakhm khilte hain to phir un kaa mahaknaa tai hai"

"mohabbaton mein hisaab hogaa ye tai kahaan thaa har ek lamha azaab hogaa ye tai kahaan thaa ye tai huaa thaa vafaa ki shama jalaa karegi andheraa ham pe itaab hogaa ye tai kahaan thaa khizaan na aaegi zindagi mein kabhi hamaari udaas belaa gulaab hogaa ye tai kahaan thaa hamaari nazrein savaal ban kar uThaa kareingi sukut-e-lab par javaab hogaa ye tai kahaan thaa yaqin dilaayaa thaa saath mil kar rahaa karoge ki beach apne chanaab hogaa ye tai kahaan thaa azaab hongi palak jhapakne talak ki duuri visaal apnaa bhi khvaab hogaa ye tai kahaan thaa ye phuul ban kar mahak uTheinge khayaal mere mizaaj itnaa kharaab hogaa ye tai kahaan thaa mujhe pukaareinge to kaheinge khushi milegi ki naam apnaa janaab hogaa ye tai kahaan thaa"

"use kahnaa ki jab jab aahaTon pe dil dhaDaktaa hai use kahnaa jahaan saaraa usi ko pyaar kahtaa hai use kahnaa zamaane se baghaavat kar nahin sakti use kahnaa magar tark-e-vafaa se Dar bhi lagtaa hai use kahnaa duaaon mein khudaa se tum ko maangaa hai use kahnaa khudaa dil ki duaaein khuub suntaa hai use kahnaa ki sadiyaan ho gaiin bichhDe hue tum se use kahnaa lahu aankhon se meri ab bhi bahtaa hai use kahnaa muqaddar kaa likhaa ab Tal nahin saktaa use kahnaa bhalaa qismat se koi apni laDtaa hai use kahnaa jise tum pyaar se kahte the 'nilufar' use kahnaa tumhein ye naam kyaa ab yaad rahtaa hai"

"pahle apni haar khud taslim karni hai hamein baad az ab aap ki taazim karni hai hamein aashnaa-e-ranj-o-gham karne se pahle soch lein kal yahi miraas phir taqsim karni hai hamein ishq ki qismat mein gar aah-o-fughaan hi hai to phir ye ibaarat ishq ki tarmim karni hai hamein baad mein kuchh aashiqi ke baab par socheinge ham pahle to haasil abhi taalim karni hai hamein ilm ki khaatir abhi aaThon pahar aur shash-jihat roz qaaem ik nai tanzim karni hai hamein"

"pahle to chaak zakhm-e-jigar dekhte rahe phir dekhne vaalon ki nazar dekhte rahe tham ne kahaan diyaa thaa hamein khvaahishaat ne ruk ruk ke baazuon kaa hunar dekhte rahe lab par khile hue the tabassum ke phuul par jo khaak-nazar the vo sharar dekhte rahe tum ne to zindagi kaa safar khatm kar diyaa ham the ki teri raahguzar dekhte rahe pahle to ham ne dard ke paude lagaae khud phir aansuon ke barg-o-samar dekhte rahe aavaaz de rahi thi nai zindagi hamein ham log magar rakht-e-safar dekhte rahe"

"ghair mumkin hai ki ghaflat koi sayyaad kare kaun hogaa jo mujhe qaid se aazaad kare khauf aisaa ki kahin phir na bhulaa de mujh ko sochti huun ki kahin phir na mujhe yaad kare zabt itnaa ki main dulhan bhi sajaa sakti huun shart itni ki mohabbat se vo irshaad kare vo har ik baat se chaahe to mukar saktaa hai kyaa zaruri hai ki har baat pe hi saad kare kaun kahtaa hai miraa naam liyaa hai us ne us se kahnaa ki zaraa phir se vo irshaad kare ham tire saamne rone bhi nahin aaeinge tu sitam roz nayaa shauq se ijaad kare 'nur' rakhti hai pahaaDon saa kaleja lekin kyaa kare yaad tujhe jab dil-e-barbaad kare"

"pareshaan ho ke apni zindagi se kinaaraa kar liyaa thaa har kisi se hamesha dar-guzar karte rahein kyaa tumhaari be-rukhi ko ham khushi se dukhaa kar dil hamaaraa kyaa milegaa bataao puchhti huun aajizi se maraasim aur gahre ho gae hain sunaa hai aap ke ik ajnabi se kahaan hai aur kaisaa hai abhi vo nigaahein puchhti hain har kisi se samundar maat khaataa jaa rahaa hai hamaare zabt se dariyaa-dili se koi kyon 'nur' se aa kar milegaa bahut bezaar hain sab raushni se"

"ham mubtalaa-e-dard hain inkaar bhi nahin lekin kisi pe tohmat-e-aazaar bhi nahin ham chaahte hain aap ko inkaar bhi nahin lekin labon pe jurat-e-izhaar bhi nahin aati to hain labon pe mire siskiyaan magar aankhon mein aansuon ke gunahgaar bhi nahin dil chaahtaa hai gham ke khazaane ko bech duun lekin mire nasib kaa baazaar bhi nahin be-shak gham-e-hayaat kaa tum hi 'ilaaj ho meraa nasib ye ki main bimaar bhi nahin khushbu ki aarzu hai na chaahat hai nuur ki sach sach kaho ki mujh se tumhein pyaar bhi nahin"

"nazron se noch Daali sab ne qabaa gulon ki laashein paDi hui gulshan mein pattiyon ki rassi pe chal rahi hai nannhi si ek guDiyaa majburiyaan hain shaayad darpesh roTiyon ki har koi chaahtaa hai ghar ghar mein chaand utre chaahat nahin kisi ko aangan mein titliyon ki aalam panaah kaa ab farmaan aa gayaa hai aavaaz tak na aae mahlon mein muflison ki lahje ko aur kitnaa naazuk banaa ke bolein ginti karein kahaan tak maathe ki silvaTon ki tum 'nur' ko na samjhe tum 'nur' ko na jaane shaidaa hai aandhiyon ki shauqin bijliyon ki"

"har dam ruThe rahte ho tum bhi qismat jaise ho hans kar boli zinda huun jab jab puchhaa kaise ho tum ne mujh ko yaad kiyaa sach-much kitne jhuTe ho donon kaa dil TuuT gayaa ab kyon jhagDaa karte ho kyaa vo mujh se achchhi hai jis ki khaatir badle ho main bhi khush huun tum bhi khush main jhuTi tum jhuTe ho jaisaa duniyaa kahti hai achchhaa to tum vaise ho"