Ghazal

"bhanvar se bach ke vo saahil ke paas Duub gayaa jahaan kaa dekh ke khauf-o-hiraas Duub gayaa ajab se khauf mein lipTaa hai gaanv kaa panghaT sunaa hai phir se koi devdaas Duub gayaa mujhe sharaab hi itni mili thi duniyaa se ki maare sharm ke meraa gilaas Duub gayaa gavaara ho na sakaa us ko bahr kaa ehsaan labon pe le ke qayaamat ki pyaas Duub gayaa kahun to kis se kahun apne dil ki taklifein mire hi gham mein miraa gham-shanaas Duub gayaa huaa jo saamnaa suraj kaa mere zakhmon se falak pe chhoD ke apnaa libaas Duub gayaa 'nadim' apne ghamon se nikal chukaa thaa magar gham-e-jahaan se ho kar udaas Duub gayaa"

"kaabe se ranj hai na adaavat kunisht se dil ye bahal na paaegaa apnaa bahisht se is aarzu mein ek hi pal ko sukun mile ham dil badal rahe hain tire sang-o-khisht se ik tum hi the na jis ko kabhi raas aa saki duniyaa ye chal rahi hai miri sarguzisht se raah-e-vafaa mein ab kyaa luTaaoge soch lo daakhil to ho gae ho dil-o-jaan ki kisht se jis se azaab-e-ishq ki taaqat mein ho kami munh ham nahin lagaate kabhi us palisht se dil hai ke raqs kartaa hai zanjir baandh kar lag kar kahin na baiThaa ho ye ahl-e-chisht se har gosha hai sukun ke aab-e-baqaa se tar baahar nikal ke dekh zaraa khub-o-zisht se baDh kar junun ne kar hi diyaa aasmaan buland taalim le rahaa thaa vo meri sarisht se Thahro 'nadim' saans to lene do zoaf mein ghabraa rahaa hai ishq mire sar-navisht se"

"bazm-e-khubaan se uThe daar-o-rasan tak pahunche aap hi aap mire paanv gagan tak pahunche ek main hi thaa jo sayyaad ki jholi mein giraa uD gae saare parinde jo chaman tak pahunche sirf dil hi ko jalaanaa to koi baat nahin ishq ik aag agar hai to badan tak pahunche bandishon hi ki numaaish hai hayaat-e-aadam ek dhaage se bandhe aur kafan tak pahunche umr kamtar hi se koshish thi musalsal jaari sher apnaa bhi koi tarz-e-sukhan tak pahunche aakhiri ek ye khvaahish hai mire siine mein khaak jab meri uDe apne vatan tak pahunche sharm kaa phuul main aankhon se teri chun lungaa is se pahle ki jhaDe aur dahan tak pahunche aasmaanon ko dabaa legaa vo pairon ke tale shauq insaan kaa gar us ki lagan tak pahunche kyaa zarurat ki karein chal ke tavaaf-e-duniyaa fikr apni ye agar gang-o-jaman tak pahunche soch lenaa thaa tujhe itnaa ki kyaa hogaa 'nadim' aaj kaa sher agar tere sajan tak pahunche"

"nibhaayaa ishq ne rishta jo pyaas paani kaa uDaa ke le gayaa hosh-o-havaas paani kaa kaTe shajar ke sisakte hue se patton par dikhaai detaa hai chehra udaas paani kaa sharif logon ki aankhon mein aag rakh degi pahan ke niklegi jab vo libaas paani kaa vo aise dekhtaa rahtaa hai meri aankhon mein lagaane baiThaa huun jaise qayaas paani kaa kinaare ho ke khaDe shor sun rahe ho kyaa utar ke dekho tahon mein hiraas paani kaa tumhein sanvarne ki sajne ki kyaa zarurat hai chamaktaa rahtaa hai rukh par ujaas paani kaa lipaT gae hain mire paanv se sabhi aflaak jo mere haath mein aayaa gilaas paani kaa isi liye to miraa sar buland rahtaa hai hamesha azm rahaa mere paas paani kaa 'nadim' ghuum ke saare jahaan mein dekh liyaa koi bachaa hi nahin ab shanaas paani kaa"

"vafaa ki raah mein dushvaariyaan bahut si hain magar junun ki bhi tayyaariyaan bahut si hain jalaal apni mohabbat kaa sab se unchaa hai badan mein aise to bimaariyaan bahut si hain hamaare paas faqat dil kaa dard hai lekin tumhaare paas to ayyaariyaan bahut si hain har ek shakhs ki fikrein judaa judaa Thahrin jahaan-e-aam mein khuddaariyaan bahut si hain vafaa ki saari misaalein ginaa to duun lekin vatan mein apne bhi ghaddaariyaan bahut si hain dilon mein palte hue khvaab jaante hi nahin tabaah karne ko be-kaariyaan bahut si hain kisi ne mujh se kahaa thaa ki yaar sun to sahi adaa mein husn ki makkaariyaan bahut si hain saji hai bazm-e-mohabbat ye jaan kis ke liye yahaan to logon mein bezaariyaan bahut si hain 'nadim' kyuun tu tah-e-iztiraab Duub gayaa dilon ke khel mein bhi paariyaan bahut si hain"

"ragon mein meri sharaaron kaa raqs jaari hai junun hai ranj hai gham hai ki be-qaraari hai dil-e-asir ke zakhmon mein kyaa nahin maujud vafaa hai ishq hai vahshat hai jaan-nisaari hai labon pe dasht hai aankhon mein khuun ke dhabbe samundaron se magar apni ru-bakaari hai adaa-e-naaz se kartaa hai zulm vo mujh par use na khauf-e-khudaa hai na sharmsaari hai havaa mein ghulti hui khushbuon ne farmaayaa gurez tum se nahin jag se parda-daari hai jise gale se lagaayaa banaa diyaa suraj bulandiyon se kahin baDh ke khaaksaari hai thirak rahe hain munDeron pe mor khvaahish ke vo jab se aaya hai dil mein surur taari hai tumhaare chehre se bahtaa hai nuur kaa jharnaa tumhaari zulfon se aalam mein aabiyaari hai falak se hoti hai naazil duaaon ki tanvir ibaadaton se miraa rang-e-aah-o-zaari hai qarib aa ke kabhi dekho meri tanhaai is intizaar ke daaman mein kyaa khumaari hai parinde shaakh se ik ek kar ke uDte gae hamin bache hain hamaari bhi ab ke baari hai badan to surat-e-divaar ishtihaar huaa zabaan pe ishq ke chhaalon ki laala-kaari hai Dhali hai shaam bujhaane mein aag suraj ki charaagh-e-dard jalaane mein shab guzaari hai hamaare khvaab bhaTakte hain dasht-o-sahraa mein kise bataaein ki kyaa aarzu hamaari hai 'nadim' donon jahaan us ki dosti pe nisaar usi se ranj usi se hi gham-gusaari hai"

"ye ishq hai vahshat hai ki aashufta-sari hai jo kuchh hai mire sar pe magar taaj-vari hai aankhon mein chamakti hai kashish us ke badan ki jalti hai zamin dhuup ki har shaakh hari hai har chaare se baDhtaa hai mire zakhm kaa risnaa laanat hai agar vaqt ki ye chaaragari hai har mauj mein hai us ke badan ke kai jaadu vo rashk-e-qamar rashk-e-jinaan rashk-e-pari hai ummid bhi khud lauT ke ab aa na sakegi is daur ke rahbar ki ajab raahbari hai Thahraa hi nahin dasht-navardi kaa musaafir aashiq ke muqaddar mein faqat dar-ba-dari hai sharmaa ke shab-e-gham miri baanhon mein simaT aa main ne hi sitaaron se teri maang bhari hai mujh se vo 'nadim' ab bhi taalluq na rakheinge aadat hai buri meri har ik baat khari hai"

"badan pe khaak vo apni lagaa ke leTaa hai falak ko paanv ke niche dabaa ke leTaa hai afiim apne ghamon ki vo khaa ke leTaa hai ghurur-e-ishq ko takiya banaa ke leTaa hai jhulas rahaa hai sitaaron kaa jism garmi se junun ki aag se vo dil jalaa ke leTaa hai ab us ke zarf pe kyon ho na do-jahaan qurbaan jo kahkashaan ko bhi ghar mein sajaa ke leTaa hai ab us ki laaj bhi allaah rakhne vaalaa hai jo us ki shaan mein duniyaa luTaa ke leTaa hai kisi ke rahm-o-karam se nahin bulandi hai vo kohsaar pe apni anaa ke leTaa hai hai us ke paanv ki miTTi mein ek ganjina vo apnaa dard isi mein chhupaa ke leTaa hai havaa ke paanv se baandhi hai maut ki aahaT vafaa ke dasht mein dhuni ramaa ke leTaa hai vo boriyaa jise tabrez oDhaa kartaa thaa use 'nadim' zamin par bichhaa ke leTaa hai"

"ishrat-gah-e-jahaan mein tamaasha hai chaar-su yaani fareb-e-dasht-e-tamanna hai chaar-su naqsh-o-nigaar vahshat-e-dil-gir ke sivaa daamaan-e-gul-farosh mein aur kyaa hai chaar-su sair-o-tavaaf-e-gauhar-e-ranj-o-alam karo hadd-e-nazar mein ishq ki duniyaa hai chaar-su sun kar bayaan-e-baad-e-sabaa ho gayaa yaqin teri zabaan-e-shirin kaa charchaa hai chaar-su ik bahr-e-tirgi ke sivaa kyaa thi kaaenaat ab to tiri adaaon kaa jalva hai chaar-su auraaq aasmaan ke bhi dekhe hain khol kar ham donon hi ke ishq kaa qissa hai chaar-su ik din khilegaa ban ke gul-e-inqalaab-e-ishq meraa lahu zamin pe bikhraa hai chaar-su suraj bhi jis ki taab se tharraa ke haT gayaa vo barq zer-e-hasti-e-ashyaa hai chaar-su hai markaz-e-nashaat-e-do-aalam 'nadim' ji bachchon ne mere naqsha vo khinchaa hai chaar-su"

"shokhi-e-dard-e-dil-e-zaar gul-e-naghma hai us kaa har lahja-e-guftaar gul-e-naghma hai soi soi si khalaaon ko ham-aaghosh karo qulzum-e-zakhm se bedaar gul-e-naghma hai khvaab-e-imkaan-e-vafaa hai vo mujassam koi ham hue jis ke parastaar gul-e-naghma hai chaandni ki hai nai shama shagufta pur-nur sar-taa-paa ishq kaa shahkaar gul-e-naghma hai chaand suraj ye sitaare hain sharaare us ke us ki angDaai to anvaar gul-e-naghma hai shash-jihaat us ke hain auraaq-e-ziyaa oDhe hue muskuraataa huaa sansaar gul-e-naghma hai mauj-dar-mauj badan kartaa hai jaadu jaise har adaa us ki pur-asraar gul-e-naghma hai aaina si hai vo doshiza mohabbat ki misaal honT shoala hai to rukhsaar gul-e-naghma hai rishta-e-ruh ne baandhaa hai hamein kis ke 'nadim' main qalandar huun miraa yaar gul-e-naghma hai"

"badan ki mauj mein angDaaiyaan ulajh jaaein tilism aisaa ki binaaiyaan ulajh jaaein jo tere paanv ki bikhri ho khaak raahon mein vahaan se guzrein to parchhaaiyaan ulajh jaaein khuli ho zulf to sar par dupaTTaa rakh lenaa na aisaa ho kahin purvaaiyaan ulajh jaaein zabaan-e-ishq jo kholein kahin pe sannaaTe baDe baDon ki bhi daanaaiyaan ulajh jaaein nigaah duur hi rakkho hamaare zakhmon se jo in ko dekhein to gahraaiyaan ulajh jaaein majaaz Thiik hai dil ke taDapte rahne kaa hamaari mauj mein tanhaaiyaan ulajh jaaein ilaaj ishq kaa karne jo aae chaaragar maraz mein saari masihaaiyaan ulajh jaaein uruuj saare badal jaate hain zavaalon mein agarche paanv se rusvaaiyaan ulajh jaaein sunein ye dil se mire dard ki azaan agar 'nadim' aap ki shahnaaiyaan ulajh jaaein"

"dhuaan gar uThtaa hai dil se ki jaan se uThne do mujhe na roko hasino jahaan se uThne do kisi ki khaak-e-kaf-e-paa hai kaaenaat miri sitaaro chhoDo mujhe aasmaan se uThne do tum apne sar pe ye ilzaam kyon uThaate ho vafaa kaa muddaaa meri zabaan se uThne do tumhaare jaane ki tadbir bhi nikaalungaa charaagh bujhte hue aashiyaan se uThne do chaTaan gham ki jo dil par rakhi hai sadiyon se kabhi to dard ke aab-e-ravaan se uThne do mere kafan mein bhi ik daagh tum lagaa denaa miri ye laash magar aastaan se uThne do tumhaare tiir ko mil jaaegi jagah koi bas ek aah dil-e-mehrbaan se uThne do kahaan kaa chaand kyaa suraj kahaan ke sayyaare mujhe fareb ki is kahkashaan se uThne do 'nadim' vasl ki surat nikaal hi legaa badan ko pahle zaraa darmiyaan se uThne do"

"rah rah ke hoti jaati hai duniyaa tamaam-shud hotaa nahin hai ishq kaa qissa tamaam-shud pyaase to apne honT bhigo kar chale gae lekin havas se kab huaa dariyaa tamaam-shud bikhraa ke moti ishq ke har naqsh-e-paa ke saath us ne kiyaa hai dasht-e-tamannaa tamaam-shud girtaa hai ek pardaa andhere kaa ziist par hotaa hai roz ek tamaasha tamaam-shud kuchh bhi nahin bachegaa jahaan mein sivaa-e-ishq majnun tamaam ho gayaa lailaa tamaam-shud ghuncho ki mauj us ke tabassum pe hai ayaan kar degi meri aankhon kaa sahraa tamaam-shud aankhon mein le ke phirti hai naaz-o-adaa ke rang lahraa ke khinch luun to ho sahbaa tamaam-shud ik zakhm jis mein tiir bhi paayaa gayaa na jazb us par huaa hai ilm-e-masihaa tamaam-shud Dubeinge ek qulzum-e-khun hi mein ham sabhi hogi har ek hasti-e-ashyaa tamaam-shud keh kar gayaa ye aashiq bedaar arsh se ham jaa rahe hain tum karo charchaa tamaam-shud uTThegi jab bhi mauj qayaamat ki tab 'nadim' kaaba tamaam hogaa kalisaa tamaam-shud"

"ishq ko khun-e-jigar ki hai talab kahte hain zakhm khaane ko vafaaon kaa adab kahte hain husn ki dhuup mein nikhraa huaa phulon saa badan dil ke luT jaane kaa is ko hi sabab kahte hain khaak maltaa hai falak aa ke mire qadmon ki khaaksaari ko bulandi kaa laqab kahte hain vo bhi lahraa ke har ik dard sunaa karti hai qaid kaa vaaqia zanjir se jab kahte hain tum ye maano ki na maano hai tumhaari marzi ishq ko daan sahi jiine ko Dhab kahte hain dil mein tufaan jo chhupaae ho chhupaae rakkho saaraa afsaana larazte hue lab kahte hain tum divaane ho ye sach hai ise taslim karo ham nahin kahte faqat shahr mein sab kahte hain in ko dekhun to inhein meri nazar lag jaae aisaa hotaa hai kahin aap ghazab kahte hain dil jo rotaa hai use gaate hue nikle 'nadim' log is dard-e-mohabbat ko adab kahte hain"

"kyaa huaa kyuun huaa kis liye kyaa khabar jo huaa so huaa tu use bhuul jaa jaag kar raat bhar ho gai hai sahar ab na khud ko jalaa tu use bhuul jaa kaun aayaa yahaan chal paDin aandhiyaan kaun viraan kar ke gayaa gulsitaan kis ne rakh diin lab-e-gul pe chingaariyaan ye kise hai pata tu use bhuul jaa raat ki baat thi phir sahar ho gai vaqt chaltaa rahaa dopahar ho gai shaam aane ko hai raat chhaane ko hai bikhre sapne uThaa tu use bhuul jaa ham-navaa ham-safar mo'tabar raahbar phir mileinge tujhe tu shuru' kar safar kho gayaa jo guhar aaegaa lauT kar apni hasti banaa tu use bhuul jaa sochnaa hai tiraa vo na tum ko milaa sach to ye hai magar tu na us ko milaa us ki qismat mein shaayad thi tishna-labi ho gayaa jo khafaa tu use bhuul jaa ye tiraa khvaab hai kitnaa naayaab hai tere rukh par usi ki chaDhi taab hai ek khurshid hai ek mahtaab hai maan meraa kahaa tu use bhuul jaa dil mein jo dard hai raah ki gard hai jhaaD de jo use vo baDaa mard hai dekh le zindagi garm hai sard hai chhoD shikva-gila tu use bhuul jaa ghar se baahar nikal karvaTein mat badal chal mire saath chal aansuon mein na Dhal dekh le shaakh par ek bhigaa kanval muskuraane lagaa tu use bhuul jaa"