Ghazal

"ik ranj-e-dil ke jis se sivaa chaahtaa nahin kuchh bhi ho phir main us ki jagah chaahtaa nahin us ko bhi main talab huun magar mujh se kuchh judaa koi bhi mujh ko meri tarah chaahtaa nahin uktaa chukaa huun ruuh ki laa-faaniyat se par vo jism huun ke raah-e-fanaa chaahtaa nahin koi bhi tere zakhm si taasir kaise de lekin main us kaa aur maza chaahtaa nahin is baar tu mile to tujhe chumnaa bhi hai main zindagi mein aur gila chaahtaa nahin har laa-davaa maraz ko duaaon se hai umiid teraa koi mariz davaa chaahtaa nahin maanaa ki ahd-e-vasl kaa bhi paas hai magar aakhir vo kaise ho jo khudaa chaahtaa nahin"

"rah-e-yaqin pe gumaan kaa ghubaar aataa hai jab us ko paar karo tab qaraar aataa hai tamaam bhiiD chalaati hai ik khudaa se hi kaam kisi kisi ke sahife mein yaar aataa hai 'ajab nahin hai jo donon hi ho gae patthar use bhi meri tarah intizaar aataa hai tiri pasand hi meri pasand hai shaayad kabhi kabhi mujhe mujh par bhi pyaar aataa hai dayaar-e-sina-e-khaali se khauf mat khaao yahaan pe dekhnaa parvardigaar aataa hai main garm-o-sard mein uljhaa huun mausam-e-dil ke go baarishon kaa mujhe ishtihaar aataa hai"

"vo rang-o-bu vo khaal-o-khad nahin rahaa ki ab vo phuul mustanad nahin rahaa sukhanvari kaa zo'm khaa gayaa hamein kisi kaa she'r bhi sanad nahin rahaa hameshgi na tum mein thi na ham mein thi hamaaraa pyaar taa-abad nahin rahaa yahaan hain ham nigaah to jhukaaiye jo thaa hamaaraa ab vo qad nahin rahaa havas ke pankh lag gae junun ko tiraa khayaal taa-ba-had nahin rahaa ye dil bhi ab dimaagh ho gayaa 'asar' kamaal hai ye be-khirad nahin rahaa"

"sunsaan bastiyon ki taraf dekhte raho shahron se jangalon ki taraf dekhte raho sukhi paDi nadi ko kabhi paar mat karo saahil se saahilon ki taraf dekhte raho khvaahish baraah-e-raast usi ik badan se hai khvaahish se khvaahishon ki taraf dekhte raho kuchh khaas ahl-e-fan ko manaazir dikhaao aur phir 'aam manzaron ki taraf dekhte raho ye dekhte raho ki koi dekhtaa bhi hai un dekhte huon ki taraf dekhte raho vo chaand hi bhale ki jinhein chhu sako 'asar' tum us ki baaliyon ki taraf dekhte raho"

"is dukh kaa tamannaai banaataa na use main ai kaash kabhi dil se lagaataa na use main ham 'ishq se puure nahin hote the vagarna duniyaa vo kabhi mujh ko dikhaataa na use main takhliq yahaan baa'is-e-takmil-e-khalaa hai varna na khudaa mujh ko banaataa na use main bas qurb se bujhti hai kahaan aag badan ki sote hue varna to jagaataa na use main donon hi sukhan-fahm hain donon ko hai ye mauj yuun hi vo ghazal mujh ko sunaataa na use main be-vajh tavaqqo' hi nahin rahti kisi se bhaati na kabhi vo mujhe bhaataa na use main"

"zindagi mein rang bharte khair-o-shar achchhe lage mujh ko is shaakh-e-junun ke sab samar achchhe lage vaqt ki raftaar se takraar mein thaa ik khalaa aur is takraar se ham be-khabar achchhe lage hijr ho yaa vasl sab khaayaa piyaa aur niind li saare mausam apne apne vaqt par achchhe lage aataa jaataa ruuh kaa mehmaan mujhe achchhaa lagaa aur use mujh-jism ke divaar-o-dar achchhe lage manzilein achchhi lagin to raastaa achchhaa lagaa raastaa achchhaa lagaa to ham-safar achchhe lage us gali ke moD par ik nursery thi phuul the mujh ko us tak le ke jaate raahbar achchhe lage aap ko meraa hunar achchhaa lagaa ho yaa nahin mujh ko sab achchhaa lagaa sab ke hunar achchhe lage"

"mujh ko na jaantaa miri daanaai jaantaa koi to meri baat ki gahraai jaantaa khud ko sameT laataa baDe ehtiyaat se gar main mire khayaal ki yakjaai jaantaa ab tak jo mere saath huaa sab buraa huaa varna mujhe yaqin hai main achchhaai jaantaa be-sabr ho ke koi kahin mar gayaa to Thiik varna yahaan pe kaun shakebaai jaantaa tere visaal mein huaa ye tajraba bhi faash kaise vagarna main kabhi tanhaai jaantaa har shakhs ne hi kar liyaa goyaai par yaqin koi to meri aankh ki sachchaai jaantaa"

"ai khudaa-e-vahm main thak gayaa ye nizaam sochte sochte tiri raah dekhte dekhte tiraa naam sochte sochte tu khayaal hai ki saraae hai jahaan aa gayaa to main bas gayaa mujhe rah gae mire jism ke dar-o-baam sochte sochte na yahaan kaa huun na vahaan kaa huun to kahaan kaa huun mujhe ye bataa ye main kis maqaam pe aa gayaa vo maqaam sochte sochte kahaan kaun samt se aa gai mire vaaste ye sadaa-e-qum kahaan kaun samt mein chal diye mire gaam sochte sochte yahi sochnaa to azaab hai miri zaat kaa miri zaat par ki shurua sab mire ho gae hain tamaam sochte sochte"

"ye mujhe kaisaa gumaan hai kaun si tashkik hai duur bhi ho jaae to lagtaa hai tu nazdik hai main to tere bolne par khush huun khud par fakhr kar tu miri chup se dukhi hai ye miri tazhik hai sab ko dene vaale ab to haq-risaani kar miri varna tab tak jo milegaa main kahungaa bhiik hai dekh meri chashm-e-bad kaa tirgi se ikhtilaat dekh meri aankh mein har raushni taarik hai umr kahne mein lagaa di aur phir ham par khulaa sher kahnaa ishq naiin hai balki ik taknik hai aage aage jaaeinge to jald mar jaaeinge ham zindagi ki dauD mein pichhe hi rahnaa Thiik hai"

"sadaa rahi ho bhale kitni be-qaraar us ki mujhi tak aa ke ruki hai sadaa pukaar us ki chaman gavaara kare 'umr khush-gavari mein khilaa rahi hai jo gul shaakh-e-nau-bahaar us ki guzartaa hai to 'ajab khushbuein bikhertaa hai qadam qadam pe mahakti hai rahguzaar us ki thamaae thamtaa nahin dard mere siine kaa rukaae rukti nahin aansuon ki dhaar us ki sanvaartaa hai bahut kham tu us ki zulfon ke kabhi to bahr-e-khudaa aadatein sudhaar us ki qabaa miyaan hai us ki ki bhuul se bhi kahin kisi badan ko na lag jaae tez dhaar us ki"

"meraa asbaab-e-safar dhuup huaa karti thi main jidhar jaaun udhar dhuup huaa karti thi us mahalle mein bhaTaktaa thaa mire man kaa safir jis mein uDti si khabar dhuup huaa karti thi chhaanv ke baad ki khvaahish bhi huaa karti thi chhaanv dhuup ke baad kaa Dar dhuup huaa karti thi kyaa hue ab vo mohabbat ki shuruaat ke roz jab yahaan aaTh-pahar dhuup huaa karti thi ab tire ruup ki kirnon se hai raushan ye hayaat tujh se pahle bhi magar dhuup huaa karti thi chhaanv mein aauun to sab log chale aate the meri tanhaai kaa ghar dhuup huaa karti thi"

"log kahte hain ik sadaa huun main khair khud hi mein gunjtaa huun main aankh jaise kai daricha hai aur andar se jhaanktaa huun main tu ne chaahaa thaa gher le mujh ko dekh baahon mein aa gayaa huun main apne saae se puchh letaa huun kyaa tire saath chal rahaa huun main teri baaton mein ho gayaa huun gum apni aavaaz kho chukaa huun main is kinaare se us kinaare tak apni manzil ko taaktaa huun main us se ab kyaa shikaayatein hon asar jis se fariyaad kar rahaa huun main"

"vo ik jhalak vo mauj mujh mein aa ke sab bahaa gai darakht jaane kyaa hue nadi kahaan samaa gai jahaan mein ye ajab nahin diyaa jale havaa chale bas is pe ghaur kijiye diyaa bujhaa havaa gai mire chalaae tiir jaane kaise mujh ko aa lage miri uDaai khaak mujh ko khaak mein milaa gai fareb-e-ishq mein jo thi badan ko ik badan ki bhuuk ye bhuuk itni baDh gai ki phir mujhe hi khaa gai tiraa khayaal phuul hai ki tujh ko sochte hue koi mahak kahin se aa ke chaaron or chhaa gai miraa safar qiyaam maangtaa hai mere ham-safar tu apni soch aage baDh miri saraae aa gai"

"zamin par mo'jiza karne ki saazish buton ko devtaa karne ki saazish hamaaraa chikhnaa jismon ke andar khamoshi ko sadaa karne ki saazish darakhton par banaanaa naqsha dil ke inhein goyaa haraa karne ki saazish kushaada ik qafas hai aasmaan bhi ise kiije khalaa karne ki saazish hamin se manzilon kaa kaam lenaa hamin ko raasta karne ki saazish ye har mausam parindon ko uDaanaa ye pinjron ko khafaa karne ki saazish tujhe mujh se tavaqqo' hi nahin kuchh mujhe yaani khudaa karne ki saazish"