Ghazal

"teraa vo karam teri jafaa yaad hai ab tak sab kuchh mujhe ai jaan-e-hayaa yaad hai ab tak aayaa thaa zabaan par miri kyon harf-e-tamannaa kyon ho gayaa thaa koi khafaa yaad hai ab tak shaanon pe mire vasl ki shab khaas adaa se rahti thi tiri zulf-e-rasaa yaad hai ab tak kahne pe mire aao mire paas to baiTho vo un ke bigaDne ki adaa yaad hai ab tak aa jaao agar tum to tumhin se kabhi puchhun kyaa bhuul gayaa huun mujhe kyaa yaad hai ab tak barsi thi jo paimaana uThaate hi hamaare kyaa tum ko bhi vo mast ghaTaa yaad hai ab tak rahtaa thaa mire haath mein jo dast-e-hinaai us haath ki khushbu-e-hinaa yaad hai ab tak muddat hui us ko ki miri khalvat-e-shab mein paighaam jo laai thi sabaa yaad hai ab tak taaid mein jis ke the dhaDakte hue do dil kyaa tum ko vo paimaan-e-vafaa yaad hai ab tak thaa 'soz' sar-e-mai-kada jab koi ham-aaghosh vo sohbat-e-rangin ba-khudaa yaad hai ab tak"

"mere afkaar-o-khayaalaat kaa mehvar tum ho al-gharaz meri har ik baat kaa mehvar tum ho mere din-raat hain mansub tumhin se ba-khudaa din kaa mehvar bhi ho tum raat kaa mehvar tum ho kyon na maqbul-e-zamaana hon hikaayaat miri meri taabinda hikaayaat kaa mehvar tum ho ye haqiqat vahi samjheinge jo hain ahl-e-nazar mere sab kashf-o-karaamaat kaa mehvar tum ho kyon na pur-soz hon ashaar ghazal ke meri mere ashaar miri zaat kaa mehvar tum ho"

"marhale aasaan saare ho gae tum hamaare ham tumhaare ho gae aap se milnaa khushi ki baat hai aap to aankhon ke taare ho gae miT gaiin mahrumiyaan aur faasle sab se chhuT kar vo hamaare ho gae aap ke aate hi taariki gai dil mein raushan chaand taare ho gae aai jab girdaab mein kashti miri duur nazron se kinaare ho gae ashk the aankhon mein the jab tak miri aa ke palkon par sharaare ho gae vo jo aae to miri qismat ke 'soz' kis qadar unche sitaare ho gae"

"ye koi baat hui mil ke judaa ho jaanaa kaash aae tumhein paaband-e-vafaa ho jaanaa is tasavvur hi se dil kaanp rahaa hai meraa mere mahbub kaa aur mujh se judaa ho jaanaa ye sar-e-arsh-e-muaallaa bhi pahunch jaae to kyaa nahin mumkin kabhi insaan kaa khudaa ho jaanaa ahl-e-mahfil ne to samjhaa thaa haqiqat is ko ik dikhaavaa thaa tiraa mujh se khafaa ho jaanaa aarzu hai miri taqdir mein likkhaa hotaa rahguzar mein tiri naqsh-e-kaf-e-paa ho jaanaa haasil-e-umr-e-ravaan is ke sivaa kuchh bhi nahin 'soz' us jaan-e-tamannaa pe fidaa jaanaa"

"aankh mein aansu labon par aah dil mein dard hai tere saudaai ki nazron mein to duniyaa gard hai ik jhalak dekhi thi us ne un ki auj-e-charkh par rashk se mahtaab kaa chehra abhi tak zard hai khush-nasibaan-e-rah-e-ulfat to manzil paa gae apne hisse mein jo aai vo safar ki gard hai meri barbaadi ne un ko aur rusvaa kar diyaa ab to duniyaa kah rahi hai vo baDaa be-dard hai ibtidaa-e-ishq ki vo garmi-e-lazzat kahaan ik zamaana ho gayaa ye aag bilkul sard hai us ki chhoDo tum na bhaTko mulkon mulkon pyaar mein 'soz' to rusvaa hai divaana hai kucha-gard hai"

"laakh ho maazi daaman-gir mustaqbil ki dekh lakir sab se mohabbat karnaa siikh kah ke gayaa kal ek faqir sab allaah ke bande hain koi nahin duniyaa mein haqir ahd-e-javaani biit gayaa kar ab jiine ki tadbir kohkan ab bhi zinda hai laa na sakaa jo ju-e-shir kaise main us ko sher kahun jis mein na ho koi taasir dilkash hain kirdaar ye sab lailaa ho shirin yaa hiir apni qismat aap banaa kyuun hai gilaa-sanj-e-taqdir soz-e-darun bhi neamat hai naam usi kaa hai iksir 'soz' gham-e-jaanaan hi to hai ahl-e-mohabbat ki jaagir"

"mohabbat karne vaale kab kisi kaa naam lete hain zabaan khaamosh rahti hai nazar se kaam lete hain vo kaise log hain yaarab giraate hain jo insaan ko yaqinan vo farishte hain jo baDh kar thaam lete hain taajjub-khez hai dastur yaarab teri duniyaa kaa miTaate hain jo duniyaa ko vahi inaam lete hain yahi apni ibaadat hai yahi hai bandagi apni tumhaaraa zikr karte hain tumhaaraa naam lete hain jafaaein hain adaavat hai sitam hai bevafaai hai khushi se apne sar ham baDh ke har ilzaam lete hain kahaan kaa nashsha mai kaisi na maikhaane na mai-noshi tiri aankhon ke paimaanon se bhar kar jaam lete hain tabaahi kaa gila tum se nahin to phir karun kis se miri ulfat ke afsaane tumhaaraa naam lete hain"

"shikva-e-gardish-e-taqdir se kyaa hotaa hai kaarsaaz ahl-e-mohabbat kaa khudaa hotaa hai shikve hote hain mohabbat mein gila hotaa hai koi apnon se bhi is tarah khafaa hotaa hai muskuraae vo mire gham ki hikaayat sun kar shaayad ab un ko bhi ehsaas-e-jafaa hotaa hai aa hi jaataa hai mohabbat mein ik aisaa lamha muddaaa dil kaa jab aankhon se adaa hotaa hai ik qayaamat si guzar jaati hai apne dil par jab gale mil ke koi ham se judaa hotaa hai dil dhaDaktaa hai ki anjaam na jaane kyaa ho jab kabhi lutf-o-karam un kaa sivaa hotaa hai ishq ke naala-e-mahrum rasaa ho ke rahe ab taghaaful bhi ba-unvaan-e-vafaa hotaa hai shikva-e-gardish-e-ayyaam se haasil ai 'soz' qaid-e-hasti se koi yuun bhi rihaa hotaa hai"

"ab vo ham se milaa nahin karte ham bhi koi gila nahin karte zakhm-e-dil bharte bharte bharte hain itni jaldi bharaa nahin karte log vo shaakh kaaT dete hain phuul jis par khilaa nahin karte mat bujhaao diye umidon ke ye diye phir jalaa nahin karte ek muddat se vo nahin aae ham bhi ab hausla nahin karte aag bujhti hai dil ki rone se daagh dil ke dhulaa nahin karte jag mein un kaa bhalaa nahin hotaa jo kisi kaa bhalaa nahin karte chaal duniyaa ko jo nahin bhaati chaal aisi chalaa nahin karte rafta rafta bahaar aati hai phuul yak dam khilaa nahin karte haan sahar ho to Duub jaate hain shab ko taare Dhalaa nahin karte 'soz' ham naa-sipaas logon par raaz-e-hasti khulaa nahin karte"

"un ko dekhaa to tabiat mein ravaani aai dil ke ujDe hue gulshan pe javaani aai pyaas kyaa us ki bujhaaeinge koi aariz-o-lab lab-e-dariyaa na jise pyaas bujhaani aai garmi-e-ranj-o-alam hi mein basar ki ham ne zindagi mein to koi rut na suhaani aai us kaa unvaan tiraa naam hi rakkhaa ham ne bhuli-bisri jo koi yaad kahaani aai ham mohabbat kaa bhi minaar banaa sakte the ham ko nafrat ki na divaar giraani aai dekh kar us gul-e-shaadaab ko ik mahfil mein baad muddat ke phir ik yaad puraani aai aarzu dil ko thi ai 'soz' ghazal-khvaani ki raas aai to hamein marsiya-khvaani aai"