khudi ki daulat-e-uzmaa khudaa ne mujh ko bakhshi hai — Afzal Allahabadi

yuun ilaaj-e-dil bimaar kiyaa jaaegaa
sharbat-e-did se sarshaar kiyaa jaaegaa

main chaahtaa thaa ki us ko gulaab pesh karun
vo khud gulaab thaa us ko gulaab kyaa detaa

abhi to us kaa koi tazkira huaa bhi nahin
abhi se bazm mein khushbu kaa raqs jaari hai

teri nisbat mili mujhe jab se
main koi aarzu nahin kartaa

mein iztiraab ke aalam mein raqs kartaa rahaa
kabhi ghubaar ki surat kabhi dhuaan ban kar

ghamon ki dhuup mein milte hain saaebaan ban kar
zamin pe rahte hain kuchh log aasmaan ban kar

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

bhulaa na paayaa use jis ko bhuul jaanaa thaa
vafaaon se miraa rishta bahut puraanaa thaa

yazid-e-vaqt miraa khuun bahaanaa chaahtaa hai
vo karbalaa mein mujhe phir se laanaa chaahtaa hai

hamaare darmiyaan ab kuchh nahin hai
magar phir bhi chhupaanaa chaahtaa huun