sath-e-dariyaa par ubharne ki tamannaa hi nahin — Afzal Minhas

zindagi ki zulmatein apne lahu mein rach gaiin
tab kahin jaa kar hamein aankhon ki binaai mili

raste mein koi peD jo mil jaae to baiThun
vo baar uThaayaa hai ki dikhne lage shaane

jaane ye hiddat chaman ko raas aae yaa nahin
aag jaisi kaifiyat hai khushbuon ki lahr mein

bikharte jism le kar tund tufaanon mein baiThe hain
koi zarre ki surat hai koi Tiile ki surat hai

gir paDaa tu aakhiri ziine ko chhu kar kis liye
aa gayaa phir aasmaanon se zamin par kis liye

dil ki masjid mein kabhi paDh le tahajjud ki namaaz
phir sahar ke vaqt honTon par duaa bhi aaegi

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

us shaan-e-aajizi ke fidaa jis ne 'aarzu'
har naaz har ghurur ke qaabil banaa diyaa

main ne apni palkon par gham-kade sajaae hain
aarzu ke maatam mein sogvaar hasti hai

ab bhi barsaat ki raaton mein badan TuTtaa hai
jaag uThti hain ajab khvaahishein angDaai ki

hai kahaan tamannaa kaa dusraa qadam yaa-rab
ham ne dasht-e-imkaan ko ek naqsh-e-paa paayaa

bin maange mil rahaa ho to khvaahish fuzul hai
suraj se raushni ki guzaarish fuzul hai