hijr ik vaqfa-e-bedaar hai do nindon mein — Ahmad Mushtaq

tanhaai mein karni to hai ik baat kisi se
lekin vo kisi vaqt akelaa nahin hotaa

khair badnaam to pahle bhi bahut the lekin
tujh se milnaa thaa ki par lag gae rusvaai ko

ahl-e-havas to khair havas mein hue zalil
vo bhi hue kharaab, mohabbat jinhon ne ki

ek lamhe mein bikhar jaataa hai taanaa-baanaa
aur phir umr guzar jaati hai yakjaai mein

main ne kahaa ki dekh ye main ye havaa ye raat
us ne kahaa ki meri paDhaai kaa vaqt hai

pataa ab tak nahin badlaa hamaaraa
vahi ghar hai vahi qissa hamaaraa

mere khvaabon ke jharokon ko sajaate rahiye
na sahi vasl magar yaad to aate rahiye

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

sote mein vo jo mujh se ham-aaghosh ho gae
jitne gile the khvaab-e-faraamosh ho gae

niind ke ghar mein hain khvaab aane lage
'ishq hai naachtaa aankh ke sahn mein

ye mere saathi hain pyaare saathi magar inhein bhi nahin gavaaraa
main apni vahshat ke maqbare se nai tamannaa ke khvaab dekhun

usi ke khvaab the saare usi ko saunp diye
so vo bhi jiit gayaa aur main bhi haaraa nahin