zamaane ko duun kyaa ki daaman mein mere — Aleem Masroor

afsaana mohabbat kaa puuraa ho to kaise ho
kuchh hai dil-e-qaatil tak kuchh hai dil-e-bismil tak

jaane kyaa mahfil-e-parvaana mein dekhaa us ne
phir zabaan khul na saki shama jo khaamosh hui

uTh ke us bazm se aa jaanaa kuchh aasaan na thaa
ek divaar se niklaa huun jo dar se niklaa

nikle tiri mahfil se to saath na thaa koi
shaayad miri rusvaai kuchh duur chali hogi

bhiiD ke khauf se phir ghar ki taraf lauT aayaa
ghar se jab shahr mein tanhaai ke Dar se niklaa

anjaam-e-kashaakash hogaa kuchh dekhein to tamaashaa divaane
yaa khaak uDegi gardun par yaa farsh pe taare nikleinge

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

ai gham-e-zindagi na ho naaraaz
mujh ko aadat hai muskuraane ki

ghamon ne gher liyaa hai mujhe to kyaa gham hai
main muskuraa ke jiyungaa tiri khushi ke liye

bhare hon aankh mein aansu khamida gardan ho
to khaamushi ko bhi izhaar-e-muddaaa kahiye