lauT kar yaqinan main ek roz aaungaa — Anjum Irfani

charaag chaand shafaq shaam phuul jhiil sabaa
churaain sab ne hi kuchh kuchh shabaahatein teri

adaa huaa na kabhi mujh se ek sajda-e-shukr
main kis zabaan se karungaa shikaayatein teri

safar mein har qadam rah rah ke ye taklif hi dete
bahar-surat hamein in aablon ko phoD denaa thaa

ham fanaa-nasibon ko aur kuchh nahin aataa
khuun sharaab kar lenaa jism jaam kar lenaa

tesha-ba-kaf ko aaina-gar kah diyaa gayaa
jo aib thaa use bhi hunar kah diyaa gayaa

koi puraanaa khat kuchh bhuli-bisri yaad
zakhmon par vo lamhe marham hote hain

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

ret par ik nishaan hai shaayad
ye hamaaraa makaan hai shaayad

pyaaso raho na dasht mein baarish ke muntazir
maaro zamin pe paanv ki paani nikal paDe

gham hai na ab khushi hai na ummid hai na yaas
sab se najaat paae zamaane guzar gae

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

kaho kyaa mehrbaan naa-mehrbaan taqdir hoti hai
kahaa maan ki duaaon mein baDi taasir hoti hai