simaT gai to shabnam phuul sitaara thi — Azra Parveen

chaar samtein aaina si har taraf
tum ko kho dene kaa manzar aur main

zamin ke aur taqaaze falak kuchh aur kahe
qalam bhi chup hai ki ab moD le kahaani kyaa

us ne mere naam suraj chaand taare likh diyaa
meraa dil miTTi pe rakh apne lab rotaa rahaa

rang apne jo the bhar bhi kahaan paae kabhi ham
ham ne to sadaa radd-e-amal mein hi basar ki

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

shor din ko nahin sone detaa
shab ko sannaaTaa jagaa detaa hai

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

bigDaa huaa hai rang jahaan-e-kharaab kaa
bhar luun nazar mein husn kisi ke shabaab kaa

khvaab-gah mein siyaah khushbu thi
ittifaaqan charaagh bhi gul thaa