maujud mere dil mein jo zakhmon ke daagh hain — Hilal Badayuni

maza to jab hai ki dil kaa andheraa miT jaae
gharon mein laakh charaaghaan kiyaa kare koi

sirf rishta nahin ek ehsaas hai
duur ho kar bhi maan to mire paas hai

kuchh aur de na paae zamaane ko ham 'hilaal'
paighaam-e-amn deinge isi shaaeri se ham

gharib shakhs ko miltaa nahin kisi bhi tarah
ye ishq ho gayaa sarkaari naukri ki tarah

jab chhuaa hogaa us ne phulon ko
hosh khushbu ke uD gae honge

tumhaare saamne jazbaat saare khol saktaa huun
jo sunnaa chaahte ho tum main vo bhi bol saktaa huun

nigaah-e-naaz ki maasumiyat are tauba
jo ham fareb na khaate to aur kyaa karte

gin rahaa huun harf un ke ahd ke
mujh ko dhokaa de rahi hai yaad kyaa

do gaz zamin fareb-e-vatan ke liye mili
vaise to aasmaan bhi bahut hain zamin bahut

khud-farebi si khud-farebi hai
paas ke Dhol bhi suhaane lage

dil miraa shaaki-e-jafaa na huaa
ye vafaadaar bevafaa na huaa

har ik shikast-e-tamannaa pe muskuraate hain
vo kyaa karein jo musalsal fareb khaate hain