ham Thahre raheinge kisi taabir ko thaame — Inam Nadeem

ye mohabbat bhi ek neki hai
is ko dariyaa mein Daal aate hain

apni hi ravaani mein bahtaa nazar aataa hai
ye shahr bulandi se dariyaa nazar aataa hai

jiye garche isi duniyaa mein ham bhi
magar duniyaa hamaari aur hi thi

pukaarte the mujhe aasmaan magar main ne
qayaam karne ko ye khaak-daan pasand kiyaa

ek lamha lauT kar aayaa nahin
ye baras bhi raaegaan rukhsat huaa

bujh jaaegaa ik roz tiri yaad kaa shola
lekin mire siine mein dhuaan yuun hi rahegaa

mere khvaabon ke jharokon ko sajaate rahiye
na sahi vasl magar yaad to aate rahiye

hamaaraa ishq ravaan hai rukaavaTon mein 'zafar'
ye khvaab hai kisi divaar se nahin ruktaa

afsos umr kaT gai ranj-o-malaal mein
dekhaa na khvaab mein bhi jo kuchh thaa khayaal mein

main ne dekhaa hai bahaaron mein chaman ko jalte
hai koi khvaab ki taabir bataane vaalaa

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

ik yaqin-parvar gumaan aur ik hayaat-aamez khvaab
jaise koi aaegaa aur uljhanein le jaaegaa