kuchh aise zakhm bhi dar-parda ham ne khaae hain — Iqbal Azeem

ab ham bhi sochte hain ki baazaar garm hai
apnaa zamir bech ke duniyaa kharid lein

ai ahl-e-vafaa daad-e-jafaa kyuun nahin dete
soe hue zakhmon ko jagaa kyuun nahin dete

junun ko hosh kahaan ehtimaam-e-ghaarat kaa
fasaad jo bhi jahaan mein huaa khirad se huaa

manzil to khush-nasibon mein taqsim ho chuki
kuchh khush-khayaal log abhi tak safar mein hain

jab ghar ki aag bujhi to kuchh saamaan bachaa thaa jalne se
so vo bhi un ke haath lagaa jo aag bujhaane aae the

guftugu nazr-e-ehtiyaat hui
qabl is ke ki ibtidaa karte

na tum hosh mein ho na ham hosh mein hain
chalo mai-kade mein vahin baat hogi

aae kuchh abr kuchh sharaab aae
is ke baa'd aae jo azaab aae

kahaan milegi misaal meri sitamgari ki
ki main gulaabon ke zakhm kaanTon se si rahaa huun

bahaar aate hi zakhm-e-dil hare sab ho gae mere
udhar chaTkaa koi ghuncha idhar TuuTaa har ik Taankaa

rind jo zarf uThaa lein vahi saaghar ban jaae
jis jagah baiTh ke pi lein vahi mai-khaana bane

agarche saaghar-e-gul hai tamaam-tar be-bud
chhalak rahaa hai chaman mein magar sharaab-e-vajud