dar-o-divaar pe shaklein si banaane aai — Kaif Bhopali

chaahtaa huun phunk duun is shahr ko
shahr mein in kaa bhi ghar hai kyaa karun

kaise maanein ki unhein bhuul gayaa tu ai 'kaif'
un ke khat aaj hamein tere sirhaane se mile

mai-kasho aage baDho tishna-labo aage baDho
apnaa haq maangaa nahin jaataa hai chhinaa jaae hai

ham na piyeinge bhiik ki saaqi
le ye tiraa paimaana paDaa hai

kyaa koi mohabbat mein yuun bhi benaam-o-nishaan ho jaataa hai
main huun ki abhi tak zinda huun duniyaa hai ki bhuli jaati hai

mat dekh ki phirtaa huun tire hijr mein zinda
ye puchh ki jiine mein maza hai ki nahin hai

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

gham-e-habib gham-e-zindagi gham-e-dauraan
kisi maqaam pe ham ji buraa nahin karte

jal uThein yaadon ki qindilein sadaaein Duub jaaein
dar-haqiqat khaamushi sahraa bhi hai dariyaa bhi hai

main baat karne lagaa thaa ki lafz gunge hue
lughat ke dasht mein kis ko sadaa lagaaungaa main