yuun kar rahaa huun un ki mohabbat ke tazkire — Mahirul Qadri

aql kahti hai dobaara aazmaanaa jahl hai
dil ye kahtaa hai fareb-e-dost khaate jaaiye

agar khamosh rahun main to tu hi sab kuchh hai
jo kuchh kahaa to tiraa husn ho gayaa mahdud

naqaab-e-rukh uThaayaa jaa rahaa hai
vo nikli dhuup saayaa jaa rahaa hai

ye kah ke dil ne mire hausle baDhaae hain
ghamon ki dhuup ke aage khushi ke saae hain

ik baar tujhe aql ne chaahaa thaa bhulaanaa
sau baar junun ne tiri tasvir dikhaa di

yahi hai zindagi apni yahi hai bandagi apni
ki un kaa naam aayaa aur gardan jhuk gai apni

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

kabhi ishq saaz-e-hayaat thaa kabhi soz-e-dil ne jalaa diyaa
kabhi vasl mein bhi kasak rahi kabhi dard-o-gham ne bhi mazaa diyaa

tere kahne se main ab laaun kahaan se naaseh
sabr jab is dil-e-muztar ko khudaa ne na diyaa

mohabbat adaavat vafaa be-rukhi
kiraae ke ghar the badalte rahe

main raah-e-ishq ke har pech-o-kham se vaaqif huun
ye raasta mire ghar se nikal ke jaataa hai