us ko aavaaz do mohabbat se — Mahtab Alam

ik safar phir mari taqdir huaa jaataa hai
raasta paanv ki zanjir huaa jaataa hai

naaqido tum to mire fan ki parakh rahne do
apne sone ko main pital nahin hone dungaa

dil bhi toDaa to saliqe se na toDaa tum ne
bevafaai ke bhi aadaab huaa karte hain

vatan ko phunk rahe hain bahut se ahl-e-vatan
charaagh ghar ke hain sargarm ghar jalaane mein

tum zamaane ke ho hamaare sivaa
ham kisi ke nahin tumhaare hain

zehn aise bhi na ban jaaein nisaabon vaale
guftugu mein bhi huun alfaaz kitaabon vaale

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

'ishq mein intihaa ki had na hui
'aashiqi teri mustanad na hui

urdu mein baat kijiye urdu mein boliye
haq hai zabaan kaa pyaar kaa ras is mein gholiye

niind ke ghar mein hain khvaab aane lage
'ishq hai naachtaa aankh ke sahn mein

biich dariyaa mein utar kar dekhiye
'ishq-dariyaa mein kinaare kuchh nahin