aatish-e-gul koi chingaari nahin shoala nahin — Matin Niazi

aise khoe sahar ke divaane
lauT kar shaam tak na ghar aae

tufaan se bach ke Duubi hai kashti kahaan na puchh
saahil bhi e'tibaar ke qaabil nahin rahaa

gham-e-insaan ko siine se lagaa lo
ye khidmat bandagi se kam nahin hai

yahi aaina hai vo aaina jo liye hai jalva-e-aagahi
ye jo shaaeri kaa shuur hai ye payambari ki talaash hai

gham-e-maaal gham-e-zindagi gham-e-dauraan
hamaare ishq kaa charchaa kahaan kahaan na rahaa

agar duniyaa tujhe divaana kahti hai to kahne de
vafaadaaraan-e-ulfat par yahi ilzaam aataa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

kahaan milegi misaal meri sitamgari ki
ki main gulaabon ke zakhm kaanTon se si rahaa huun

khinch laai jaanib-e-dariyaa hamein bhi tishnagi
ab gulu-e-khushk kaa khanjar pe ram hone ko hai

kyuun na apni khubi-e-qismat pe itraati havaa
phuul jaise ik badan ko chhu kar aai thi havaa

chaman mein shor hai bhanvron ki chaahat kaa bahut lekin
mohabbat gul ki bulbul se hai khaamoshi ke parde mein